განათლების მინისტრი 51-ე სკოლაში ფსიქოლოგების ჯგუფს აგზავნის

განათლების მინისტრი მიხეილ ჩხენკელი 51-ე სკოლის მოსწავლეებთან დაკავშირებულ ინციდენტს ეხმაურება და გარდაცვლილი მოზარდის ოჯახს სამძიმარს უცხადებს. მის განცხადებას სამინისტროს პრესსამსახური უწყების ოფიციალურ გვერდზე ავრცელებს.

“ მთელ ჩვენ საზოგადოებასთან ერთად, გულის სიღრმემდე შემძრა ხორავას ქუჩაზე დატრიალებულმა ტრაგედიამ.

უპირველეს ყოვლისა, ამ მძიმე წუთებში თანადგომას ვუცხადებ გარდაცვლილი მოსწავლის მშობლებსა და ახლობლებს.

ექიმები ძალისხმევას არ იშურებენ და იმედი გვაქვს, მოხერხდება მძიმედ დაჭრილი მოსწავლის სიცოცხლის გადარჩენა.

ჩვენ უკვე ვთანამშრომლობთ გამოძიებასთან. სკოლის პერსონალი მზადაა მაქსიმალურად შეუწყოს ხელი სიმართლის დადგენას.

ორშაბათს დილიდან მოსწავლეებთან სამუშაოდ სკოლაში მივა ჩვენი ფსიქოლოგების ჯგუფი. მივმართავთ ყველა სხვა საშუალებას სამომავლოდ მსგავსი ტრაგედიის თავიდან ასაცილებლად“, - ნათქვამია ჩხენკელის განცხადებაში.

სამინისტროს ინფორმაციით, საქართველოს განათლებისა და მეცნიერების სამინისტროს ფსიქოლოგები თბილისის 51-ე საჯარო სკოლის მოსწავლეებთან, მათ მშობლებთან, მეურვეებთან თუ კანონიერ წარმომადგენლებთან  24 საათიან რეჟიმში იმუშავებენ. 

მათთან დასაკავშირებლად უწყება აქვეყნებს სამინისტროს ნომერს 2 200220 (შიდა 30-25); ასევე, საგანგებოდ უქმე დღეებისთვის, იმუშავებს 24 საათიანი ფსიქო-კონსულტაციისთვის განკუთვნილი ტელეფონის ნომერი 577994181.

დღეს თბილისის ცენტრში, ვერაზე ორი არასრულწლოვანი დაჭრეს. გავრცელებული ცნობით, 51-ე სკოლასთან მომხდარი შემთხვევისას ცივი იარაღით ერთი მოსწავლე მუცლის, მეორე კი ფეხის არეში იყო დაჭრილი. ერთი მოზარდი საავადმყოფოში მიყვანამდე გარდაიცვალა.

შსს-მ ფაქტზე გამოძიება განზრახ მკვლელობის მუხლით დაიწყო.