ვოლსკი: ისრაელთან დაკავშირებით ქართველი ხალხის ინტერესების მიხედვით ვიმოქმედებთ

პარლამენტის ვიცესპიკერის, გია ვოლსკის განცხადებით, ისრაელის დედაქალაქად იერუსალიმის აღიარებასთან დაკავშირებით, საქართველოს ხელისუფლება ქართველი ხალხის ინტერესებიდან გამომდინარე იმოქმედებს. ინფორმაციას ipn-ი ავრცელებს.

„ყველას კარგად ესმის, რომ ეს არის უსაფრთხოების და სტაბილურობის შენარჩუნების ინტერესით განპირობებული. საქართველოს ხელისუფლება იმ ინტერესებიდან გამომდინარე იმოქმედებს, რომლებიც ჩვენს ხალხს გააჩნია. ამერიკის შეერთებულ შტატებს საკმაოდ მძლავრი რესურსი აქვს იმისათვის, რომ ასეთი ნაბიჯი გადადგას, ჩვენ კი, ვიდრე რაიმე მსგავს ნაბიჯს გადავდგამთ, უნდა დავფიქრდეთ, მითუმეტეს, ასეთ ცხელ წერტილთან მიმართებაში", - განაცხადა ვოლსკიმ. 

საპარლამენტო უმრავლესობის წევრი შოთა შალელაშვილი პრემიერმინისტრ გიორგი კვირიკაშვილს მოუწოდებს, საქართველომ აშშ–ს მსგავად, ისრაელის დედაქალაქად აღიაროს იერუსალიმი. 

6 დეკემბერს აშშ-ის პრეზიდენტმა განაცხადა, რომ ვაშინგტონი იერუსალიმს ისრაელის დედაქალაქად ოფიციალურად აღიარებს. ამასთან დონალდ ტრამპმა აღნიშნა, რომ ისრაელში აშშ-ის საელჩო თელ-ავივიდან იერუსალიმში გადაინაცვლებს.

აშშ-ის მხრიდან ისრაელის დედაქალაქად იერუსალიმის აღიარება ჯორჯ ბუშის წინასაარჩევნო დაპირება იყო, თუმცა მან აღნიშნული გადაწყვეტილების მიღებისგან თავი შეიკავა.

იერუსალიმს გაეროსგან გაყოფილი ერთეულის, Corpus Separatum-ის სტატუსი აქვს მინიჭებული. ქალაქი, როგორც ისრაელი, ასევე პალესტინა საკუთარ დედაქალაქად განიხილავს. ანალიტიკოსები წლებია შიშობენ, რომ აშშ-ის მხრიდან იერუსალიმის ისრაელის დედაქალაქად აღიარება რეგიონში კონფლიქტის გამწვავებას გამოიწვევს.