შენების მოძრაობა საკრებულოებში ანაზღაურებადი თანამდებობების შემოღებას აპროტესტებს

დავით უსუფაშვილის პარტია "შენების მოძრაობა" საკრებულოში ახალი ანაზღაურებადი თანამდებობის შემოღებას აპროტესტებს. ამასთან დაკავშირებით პარტია სპეციალურ განცხადებას ავრცელებს. 

პარტიაში მიაჩნიათ, რომ ამ თანამდებობის შემოღებით მმართველ გუნდს საკრებულოს უმრავლესობის წევრებისთვის ბიუჯეტის ხარჯზე სურთ ხელფასები მისცენ.

"ესაა მაგალითი „ქართული ოცნების“ მხრიდან პარტიულად მოტივირებული გადაწყვეტილების. ამ გადწყვეტილებით მათ უნდათ საკუთარი საკრებულოების წევრების უფრო მეტი რაოდენობის ხელფასით უზრუნველყოფა ბიუჯეტის ხარჯზე. ამ გადაწყვეტილებას არანაირი კავშირი არა აქვს არც თვითმმართველობის განვითარებასთან და არც საკრებულოს მუშაობის ეფექტურობასთან. ამ საკითხის განხილვისას გასათვალისწინებელია შემდეგი გარემოებები და ასპექტები:

•    მიმდინარე წელს 7 ქალაქის თვითმმართველობის სტატუსის გაუქმებისგან საბიუჯეტო ეკონომია შეადგენდა დაახლოებით 3-4 მლნ ლარს. აღნიშნული ქალაქებისა და თემების განვითარებისთვის დამაზიანებელი ნაბიჯი სწორედ ადმინისტრაციული რესურსების ეკონომიის მიზნით გადაიდგა არადა დღეს ხელისუფლება,ახალი თანამდებობის შემოღების გზით ამ თანხების გაცემას საკუთარ წევრებზე აპირებს 

•    კანონპროექტის შესაბამისად, საკრებულოს ფრაქციების თავჯდომარეების მოადგილეები 5 და მეტ წევრიან ფრაქციებს ეყოლებათ. ასეთი ფრაქციების კი საქართვლოს მასშტაბით საკრებულოებში პრაქტიკულად მხოლოდ „ქართულ ოცნებას“ ჰყავს. ანუ მმართველი ძალა ამ ინიციატივით უბრალოდ საკუთარი საკრებულოს წევრებისთვის ხელფასების დარიგებას გვთავაზობს.

•    კანონით საკრებულოებისთვის გათვალისწინებულია გარკვეული შეზღუდვებიც, მაგალითად, თბილისის გარდა სხვა საკრებულოებში უნდა შეიქმნას არაუმეტეს 5 კომისიია, საკრებულოს თავმჯდომარეებეს კი უნდა ყავდეს 1 მოადგილე (გარდა 100 ათას ამომრჩეველზე მეტი ქალაქებისა სადაც 2 მოადგილეა გათვალსიწინებული). ანუ ვიღებთ საოცარ ვითარებას საკრებულოს თავჯდომარისთვის მხოლოდ 1 მოადგილე კანონითაც და პრაქტიკითაც საკმარისია და ფრაქციის თავჯდომარეს 4 მოადგილე შეიძლება დასჭირდეს.

•    ჯერ კიდევ 2013 წელს „ადგილობრივი თვითმმართველობის კოდექსის“ პირველად პროექტში საკრებულოს ფრაქციების თავჯდომარეებისთვისაც კი არ იყო გათვალისწინებული ბიუჯეტიდან შრომის ანაზღაურება და მხოლოდ მაშინდელი საპარლამენტპო უმრავლესობის ძალისხმევით საბოლოდ მიღებული კანონში ეს თანამდებობები განისაზღვრა ანაზღაურებადად. ამჟამად კი ანაზრაურებადი პირების მრავალჯერ გაზრდას გვთავაზობენ ფრაქციის თავჯდომარისთვის 1 დან 4 მდე მოადგილის შემოთავაზებით.

•    წარმოდგენილია არგუმენტი იმის შესახებ, რომ საკრებულოს ფრაქციის თავჯდომარის მოადგილეების შემოღება და მათვის საბიუჯეტო ხელფასების გაცემა ხელს შეუწყობს პარტიების პოლიტიკურ საქმიანობას. უპირველეს ყოვლისა ამ გადაწყვეტილებით სარგებელს მხოლოდ „ქართული ოცნება“ მიიღებს, და მეორეც, პარტიები საარჩევნო შედეგების შესაბამისად იღებენ საბიუჯეტო დაფინანსებას და მათ პოლიტიკური საქმიანობა, მათ შორის საკრებულოს ცალკეული წევრების შრომის ანაზღაურება შეუძლიათ სწორედ ამ დაფინანსებიდან უზრუნველყონ.

საკრებულოების და მისი ფრაქციების მუშაობის პრაქტიკიდან გამომდინარე ძნელად წარმოასადგენია საკრებულოს ფრაქციის თავჯდომარის მადგილეების რაიმე სამსახურეობრივი დამატებითი დატვირთვა. რეალურად მათთვის გაცემული ხელფასი მმართველი ძალის მხრიდან საკუთარი წევრების ფინანსურ დასაჩუქრებას წარმოადგენს ბიუჯეტის ხარჯზე.

ყოველივე აღნიშნულის გათვალისწინებით „შენების მოძრაობა“ მოუწოდებს პარლამენტის წევრებს მხარი არ დაუჭირონ „ადგილობრივი თვითმმართველობის კოდექსში“ ცვლილებებს", - წერია განცხადებაში.

ცვლილების თანახმად, ადგილობრივ საკრებულოებში ფრაქციებს, რომლებშიც, სულ მცირე, 5 წევრია, ფრაქციის თავმჯდომარის მოადგილის შტატი ემატებათ. ასევე, დაწესდა ფრაქციების თავმჯდომარეების მოადგილეთა რაოდენობის ზედა ზღვარი და ის უნდა იყოს ერთ საკრებულოში არაუმეტეს ოთხისა.