კობახიძე: ფრაქციების თავმჯდომარის მოადგილეების შტატების დამატება ხარჯების ზრდას არ იწვევს

ფრაქციების თავმჯდომარის მოადგილეების შტატების შესაძლო დამატებაზე კომენტარი გააკეთა საქართველოს პარლამენტის თავმჯდომარე ირაკლი კობახიძემ.

,,ფრაქციების თავმჯდომარის მოადგილეების შტატების დამატება ხარჯების ზრდას წინა სამ წელთან შედარებით არ გამოიწვევს. ჩვენ გვაქვს დაანგარიშებული ფრაქციების რაოდენობა წინა სამი წლის განმავლობაში და შევადარეთ ეს მაჩვენებელი ახალ მაჩვენებელს. ზრდა არ იქნება, პირიქით, შემცირდება შესაბამისი ხარჯები. რაც შეეხება, თავად ინიციატივას, მიზანი არის ის, რომ გაუმჯობესდეს ფრაქციების მართვა, რაც პროპორციულად აისახება, როგორც მმართველი პარტიის, ასევე ოპოზიციის ინტერესებზე. პროპორციულად იქნება გადანაწილებული ეს თანამდებობები, როგორც მმართველ, ასევე ოპოზიციურ პარტიებზე," - განაცხადა ირაკლი კობახიძემ.

ცვლილება ორგანულ კანონში შედის, რომელმაც პარლამენტში სიტყვიერი დაპირისპირება გამოიწვია. ოპოზიციის თქმით, ინიციატივა ერთ პარტიაზეა მორგებული. 

ცვლილების თანახმად, ადგილობრივ საკრებულოებში ფრაქციებს, რომლებშიც, სულ მცირე, 5 წევრია, ფრაქციის თავმჯდომარის მოადგილის შტატი ემატებათ. ასევე, დაწესდა ფრაქციების თავმჯდომარეების მოადგილეთა რაოდენობის ზედა ზღვარი და ის უნდა იყოს ერთ საკრებულოში არაუმეტეს ოთხისა.