ლევან კობიაშვილი: გარდაცვლილი ილია ტუღუში 3 დეკემბრის საპლეიოფო მატჩს არ მსაჯობდა

33 წლის ქართველი მსაჯის სავარაუდო თვითმკვლელობას გამოეხმაურა ლევან კობიაშვილი. სპეციალური ვიდეომიმართვა მან სოციალურ ქსელში გაავრცელა.

"მინდა გამოვეხმაურო ჩვენთვის ძალიან მძიმე შემთხვევას და კიდევ ერთხელ მივუსამძიმრო გარდაცვლილი მსაჯის - ილია ტუღუშის ოჯახის წევრებს, ახლობლებს, მეგობრებს, სრულიად საფეხბურთო სამყაროს.ამასთან, მინდა, ვთხოვო მედიის წარმომადგენლებს, რომ ინფორმაციის გავრცელებისას მეტი სიფრთხილე გამოიჩინონ და ნუ შეიყვანენ შეცდომაში საზოგადოებას. კერძოდ, ვგულისხმობ, გავრცელებულ უსაფუძვლო ინფორმაციას, თითქოს ილია ტუღუში მსაჯობდა 3 დეკემბრის საპლეიოფო მატჩს - ლანჩხუთის გურიასა და თელავს შორის. ილია ტუღუში არ ყოფილა არანაირად დაკავშირებული ამ მატჩთან. მეტიც, მას არ უმსაჯია ეროვნული ლიგის არცერთი მატჩი, ასევე არც ეროვნული ლიგა 2-ისა და ლიგა 3-ის მატჩები, ის მსაჯობდა ახალგაზრდულ პირველობებსა და რეგიონულ გათამაშებას,"- განაცხადა კობიაშვილმა.

მისივე თქმით, ფეხბურთის ფედერაცია მზადაა, საჭიროების შემთხვევაში, ითანამშრომლოს გამოძიებასთან და იმედოვნებს, რომ შესაბამისი უწყებები უმოკლეს ვადაში დაადგენენ სიმართლეს.

მანამდე მსაჯის სავარაუდო თვითმკვლელობას თელავის საფეხბურთო კლუბი გამოეხმაურა.

"6 დეკემბერს, ქართველი მსაჯის, ილია ტუღუშის ტრაგიკულად გარდაცვალების ფაქტი, მედასაშუალებებმა ირიბად თუ პირდაპირ 3 დეკემბერს, ლანჩხუთში გამართული "გურია" - "თელავის" საპასუხო საპლეიოფო შეხვედრას დაუკავშირეს, რის გამოც უფლებამოსილნი ვართ განვაცხადოთ, რომ: ლანჩხუთში გამართული შეხვედრა, რომელსაც ორივე გუნდისთვის პრინციპული მნიშვნელობა ჰქონდა, ჩატარდა ობიექტურად - მატჩს ემსახურებოდა ერთბაშად 6 მსაჯი, რომელთაც მაღალ დონეზე, პროფესიონალურად იმსაჯეს! გვსურს, მკაფიოდ დავაფიქსიროთ, რომ სკ "თელავი" პატივს სცემს სამართლიანი თამაშის პრინციპებს და გთხოვთ, ამიერიდან ყველამ თავი შეიკავოს უსაფუძვლო ჭორების გავრცელებისგან!", - წერია საფეხბურთო კლუბის განცხადებაში.

გარდაცვლილი მსაჯის, ილია ტუღუშის ოჯახს თვითმკვლელობის ვერსიის არ სჯერა და ამბობენ, რომ ახალგაზრდა კაცის გარდაცვალება ჩაწყობილ თამაშებს და თანხის მოთხოვნას უკავშირდება. ჭირისუფალი კონკრეტულ გვარებს და ფაქტებს ასახელებს.

საუბარია გურია- თელავის ბოლო ფლეიოფზე. ამას კატეგორიულად უარყოფენ ლანჩუხთის გურიის ხელმძღვანელები და ის ადამიანები, რომლებსაც გარდაცვალებამდე ტუღუშთან კონტაქტი ჰქონდათ.

გამოძიება ჯერჯერობით თვითმკვლელობამდე მიყვანის მუხლითაა აღძრული. ოჯახი კი საქმის გადაკვალიფიცირებას ითხოვს.

მატჩების მსაჯი ილო ტუღუში სამართალდამცველებმა ჩამომხრჩვალი 6 დეკემბერს იპოვეს. ფაქტზე გამოძიება თვითმკვლელობამდე მიყვანის მუხლით დაიწყო.