პრემიერი: ევროკავშირის პრესსპიკერმა მხარი დაუჭირა დამხობის აქციას, ქართულ საზოგადოებას არ აინტერესებს, რა განაცხადა ევროკავშირის პრესსპიკერმა, მისთვის მთავარია ჭეშმარიტება

საზოგადოება თვალდახუჭული აღარ მიჰყვება არც აშშ-ის ელჩს, არც ევროკავშირის ელჩს, ეს არის ჩვენი ერთ-ერთი მთავარი მიღწევა, - განაცხადა საქართველოს პრემიერ-მინისტრმა ირაკლი კობახიძემ „ღამის კურიერში“.

როგორც მთავრობის მეთაურმა აღნიშნა, თავის დროზე რევოლუციური პროცესების ძირითადი ინსტრუმენტი იყო პოლიტიკური პარტიები, კლასიკური ფორმით მუშაობდნენ უცხოური სპეცსამსახურები ქვეყანაში, შემდეგ შეცვალეს ტაქტიკა.

„რევოლუციურ პროცესებს მოგვიანებით, ერთ შემთხვევაში სათავეში ჩაუდგნენ მედიის წარმომადგენლებიც კი, მედია პირობითია ამ შემთხვევაში, იცით, ვისაც ვგულისხმობ და შემდეგ უკვე სათავეში ჩაუყენეს ენჯეოები. ენჯეოები გახდა ბოლო ორი-სამი წლის განმავლობაში მთავარი ინსტრუმენტი რევოლუციური პროცესების წარსამართად და შემდეგ როცა ენჯეოებიც გაცვდა, ამას დაემატა მოგვიანებით პრეზიდენტ ტრამპის გადაწყვეტილება USAID და NED-ის დახურვის თაობაზე, რამაც შეზღუდა ენჯეოების დაფინანსება, ამას დაემატა ასევე გამჭვირვალობის კანონი. კიდევ ერთხელ უნდა განიმარტოს საზოგადოებისთვის, თქვენ გახსოვთ რამხელა ფარსში ვცხოვრობდით მთელი ამ წლების განმავლობაში, ენჯეოებს უწოდებდნენ სამოქალაქო საზოგადოებას. არავითარი კავშირი არ აქვს ამ ცნებასთან, ჯერ ერთი სამოქალაქო საზოგადოება არის აბსურდი, როგორც ტერმინი, გამოდის, რომ არსებობს არასამოქალაქო საზოგადოებაც. ჯერ სამოქალაქო და საზოგადოება უკვე ერთგვარი სინონიმებია, მერე როგორ შეიძლება, ვინმეს დაარქვა, თუნდაც ერთ ადამიანს, რა პროფესიისაც არ უნდა იყოს, არასამოქალაქო საზოგადოება. საზოგადოება თავიდან ბოლომდე თავის შინაარსით არის სამოქალაქო. იყო რამდენიმე ენჯეო, ჩაკეტილი წრე, ვინც უცხოეთიდან ფინანსდებოდა, როგორც უცხოური გავლენის ინსტრუმენტი და ამათ უწოდებდნენ სამოქალაქო საზოგადოებას და კიდევ ათასგვარ რამეს. ეს იყო ფარსი, რომელშიც ვცხოვრობდით მთელი ამ წლების განმავლობაში. გახსოვთ, რამდენად მტკივნეული იყო ამ ფარსისთვის ფარდის ახდა და ამ ფარდის ახდას ერქვა გამჭვირვალობის შესახებ კანონი. მთელი ისტერიკა მოაწყვეს ამასთან დაკავშირებით. გახსოვთ მთელი ცრუპენტელობა ამერიკის ელჩის, ევროკავშირის ელჩის ყველაფერი იკადრეს, ყველანაირი სამარცხვინო ტყუილი იკადრეს, რადგან მთავარ ფარსს ავხადეთ ჩვენ ფარდა გამჭვირვალობის შესახებ კანონით“, - განაცხადა ირაკლი კობახიძემ.

მისივე თქმით, ძალიან ბევრი ადამიანი შეიყვანეს მაშინ შეცდომაში, ახალგაზრდები, არა ახალგაზრდები.

„პირველ დღეს მახსოვს, ნეიტრალური ადამიანებიც გამოვიდნენ, ვისაც არ აქვთ კავშირი ჩვენს პოლიტიკურ ოპონენტებთან იმდენად რთული იყო ამ სინამდვილის გააზრება მაშინ, თუმცა მაშინ ჯერ კიდევ იყო ეს აღქმა, რომ აშშ-ის ელჩი თუ რამეს იტყოდა, როგორი ტყუილიც არ უნდა ყოფილიყო, აშკარა ტყუილი, მაინც რაღაცნაირად უნდა გაჰყოლოდი ამ ყველაფერს. ან როცა ევროკავშირის ელჩი იკადრებდა ასეთ ტყუილს, მაინც რაღაცნაირად უნდა გაჰყოლოდი. ერთ-ერთი მთავარი მიღწევა რაც გვაქვს ჩვენ არის ის, რომ საზოგადოება ასე აღარ ფიქრობს. საზოგადოება თვალდახუჭული აღარ მიჰყვება არც აშშ-ის ელჩს, არც ევროკავშირის ელჩს. ევროკავშირის პრესსპიკერი გამოვიდა და პირდაპირ მხარი დაუჭირა დამხობის აქციას. არ აინტერესებს ეს ქართულ საზოგადოებას. ქართული საზოგადოება მსჯელობს ძალიან მარტივად, უყურებს, რა განცხადება გააკეთა ევროკავშირის პრესსპიკერმა, აღარ აინტერესებს ეს ევროკავშირია თუ ბრიუსელია, კრემლია თუ ვაშინგოტნია, თუ რა არის. მისთვის ერთადერთი მთავარი არის ჭეშმარიტება, სწორ რამეს უჭერს მხარს ევროკავშირის პრესსპიკერი თუ უჭერს ქვეყნისთვის არასწორ რამეს, ამ შემთხვევაში ქვეყნისთვის უხეშად არასწორი განცხადება გაკეთდა ევროკავშირის პრესსპიკერის მხრიდან და აღარ გაჰყვა ამას. სხვანაირი ვითარება იყო ჯერ კიდევ 2023 წელს და 2024 წელს, როდესაც ევროკავშირისა და ამერიკის ელჩების ცრუპენტელობამ გამოიწვია ვნებათაღელვა ჩვენს საზოგადოებაში. დღეს ასე აღარ ფიქრობს საზოგადოება და ეს არის ერთ-ერთი მთავარი მიღწევა“, - განაცხადა ირაკლი კობახიძემ.