რუსთავში ხანძრის დროს ბავშვებიც დაშავდნენ

რუსთავში მეგობრობის მეორე გასასვლელში, ახმეტელის ქუჩაზე ნომერ 3 საცხოვრებელ კორპუსში გაჩენილი ხანძრის ახალი დეტალები ხდება ცნობილი.

კერძოდ, ხანძრის შედეგად, აღნიშნული კორპუსის მე-5 სადარბაზოში, პირველ სართულზე ერთოთახიან ბინაში, მცხოვრები 48 წლის კაცი გარდაიცვალა, კორპუსის მე-4 და მე-5 სართულზე მცხოვრები 57 წლის კაცი და 30 წლის ქალი კი კვამლით ინტოქსიკაციამ იმსხვერპლა.

30 წლის ქალი კლინიკა ,,რუსთავში“ გადაიყვანეს, თუმცა, ის მალევე გარდაიცვალა, კლინიკაში მიიყვანეს კიდევ ერთი ქალი, რომელიც მეზობლების ინფორმაციით, ხანძრის დროს ფანჯრიდან გადახტა და ფეხი მოიტეხა.

კვამლით ინტოქსიკაციით, წუხელ გვიან ღამით, რუსთავის ბავშვთა საავადმყოფოში გადაიყვანეს სამი მცირეწლოვანი ბავშვიც, ექიმების ინფორმაციით, მათი ჯანმრთელობის მდგომარეობა სტაბილურია და ამ დროისთვის სახლში იმყოფებიან.

წინასწარი ინფორმაციით, მე-4 და მე-5 სართულებზე მცხოვრები კაცისა და ქალის გარდაცვალების მიზეზი, პირველი სართულის სავენტილაციო მილიდან ზედა სართულებზე ასული კვამლი გახდა.

ხანძრის ლიკვიდაციას ოთხი ხანძარსაწინააღმდეგო ბრიგადა აწარმოებდა. მეხანძრე-მაშველებმა და საპატრულო პოლიციამ ძლიერი დაკვამლიანების გამო, სადარბაზოში მცხოვრები მოსახლეობის ევაკუაცია განახორციელეს.

შემთხვევის ადგილზე იმყოფებოდა რუსთავის მერი ირაკლი ტაბაღუა.

უსაფრთხოების მიზნით, საცხოვრებელ კორპუსში ელექტროენერგია და ბუნებრივი აირი გათიშეს.