პრემიერი გადადგომაზე: მინდა გავაწბილო ყველა, ვინც ასეთ მოლოდინებს აჩენს

პრემიერმა გიორგი კვირიკაშვილმა პარლამენტში გამოსვლისას განაცხადა, რომ მან ზედმიწევნით შეისწავლა ჯანდაცვის სამინისტროს მიერ ჩატარებული ტენდერი და დარწმუნდა, რომ აბსოლუტურად დაცულია ყველას უფლება. კვირიკაშვილის განცხადებით, მიუღებელია, როდესაც პირადად მის მიმართ დადებითი შეფასებები გამოითქვა, მისი გუნდის წევრების მისამართით კი - შეურაცხმყოფელი.

"როდესაც გია გაჩეჩილაძემ მე მომმართა, ბუნებრივია, ურთიერთობიდან გამომდინარე მისი გზავნილი მივიღე. მაშინვე ერთადერთი დავალება მივეცი ჩემი ადმინისტრაციის ხელმძღვანელს, რომ გარკვეულიყო დეტალებში - იყო თუ არა დაცული კონკურენტული გარემო, პირობები და თანაბარი შესაძლებლობების პირობები. მან მოიკითხა და მისგან მივიღე ამომწურავი პასუხი ამ საკითხთან დაკავშირებით. მე დავასკვენი, რომ აბსოლუტურად გამჭვირვალედ, კანონის დაცვით იყო ჩატარებული ტენდერი და რომ არ გაეკეთებინა გია გაჩეჩილაძეს ჩემი და ჩემი გუნდის წევრების მისამართით შეურაცხმყოფელი განცხადებები, საერთოდ არ ვაპირებდი არანაირი კომენტარის გაკეთებას ამ თემაზე. მინდა დავამკვიდროთ სტანდარტი, რომ არ შეიძლება ადამიანების ასე მოხსენიება, როგორც ეს გააკეთა გია გაჩეჩილაძემ,"- განაცხადა კვირიკაშვილი. 

პრემიერის თქმით, სწორედ ამას მოჰყვა მისი გადადგომის შესახებ ხმების გავრცელება. "ამას მოჰყვა პოლიტიკური ქარიშხალი - არიქა, გადადგება, გადმოდგება და ასე შემდეგ. მინდა გავაწბილო ყველა ის ადამიანი, ვინც ასეთ მოლოდინებს ტირაჟირებს. მე იმის გამო გავაკეთე განცხადება გადადგომაზე, თუ კანონი დაირღვეოდა",- დასძინა კვირიკაშვილმა.

მომღერალმა და ბიზნესმენმა გია გაჩეჩილაძემ (უცნობი) 12 დეკემბერს, კომპანია „სიტროენ ჯორჯიას“ წარმომადგენლებთან ერთად პრესკონფერენცია გამართა და თქვა, რომ ტენდერებს მხოლოდ ხელისუფლების წევრებთან დაკავშირებული კომპანიები იგებენ.

პრემიერმინისტრმა გიორგი კვირიკაშვილმა გია გაჩეჩილაძეს მოუწოდა სასამართლოს მიმართოს. პრემიერმა ასევე განაცხადა, რომ თუკი მისი გუნდის წევრი გამტყუნდება, ის პრემიერის პოსტიდან გადადგება.