შალვა პაპუაშვილი: ვინც ხელს აფარებს სააკაშვილის ქვეყანაში შემოპარების ორგანიზატორებს, ამ საქმეში საკუთარ თავს ამხელს - თვითმმართველობის არჩევნების წინ უკრაინის ხელისუფლების ორგანიზებით შემოაპარეს სააკაშვილი, რათა ქვეყანა აერიათ

ვინც ხელს აფარებს სააკაშვილის ქვეყანაში შემოპარების ორგანიზატორებს, შესაბამისად, ამხელს საკუთარ თავს ამ საქმეში, - ასე გამოეხმაურა პარლამენტში გამართულ ბრიფინგზე საქართველოს პარლამენტის თავმჯდომარე უკრაინის პრეზიდენტის ოფისის მრჩევლის, მიხაილო პოდოლიაკის განცხადებას მიხეილ სააკაშვილის საქართველოში ჩამოყვანასთან დაკავშირებით.

შალვა პაპუაშვილის თქმით, ფაქტები თვითონ ღაღადებენ სიმართლეს.

„აბა, ვინ ჩამოიყვანა სააკაშვილი?! ვიცით, მხილებული არის იმ ადამიანის მხრიდან, ვინც უშუალოდ მის ტრანსპორტირებას ახდენდა. მისი შემოპარება 2021 წლის ადგილობრივი თვითმმართველობის არჩევნების წინა დღეებში ორგანიზებული იყო უკრაინის კონტრდაზვერვის სამსახურის მიერ, კერძოდ, მისი ხელმძღვანელის მოადგილის გია ლორთქიფანიძის მიერ. სად არის დღეს გია ლორთქიფანიძე?! ისევ იქ არის. ვინც ხელს აფარებს სააკაშვილის ქვეყანაში შემოპარების ორგანიზატორებს, შესაბამისად, ამხელს საკუთარ თავს ამ საქმეში“, - აღნიშნა პაპუაშვილმა.

მისივე თქმით, 2021 წლის ადგილობრივი თვითმმართველობის არჩევნების წინ უკრაინის ხელისუფლების ორგანიზებით საქართველოში შემოაპარეს სააკაშვილი, რათა ქვეყანა აერიათ. პაპუაშვილმა აღნიშნა, რომ არჩევნების შემდეგ იმთავითვე ჩანდა, რომ უკრაინაში საქმე ომისკენ მიდიოდა.

„ეს კიდევ გვაფიქრებინებს, თუ რა იყო მეორე ეტაპი ამ ქაოსის მოწყობის, თუკი შეძლებდნენ, სააკაშვილს ჩააგდებინებდნენ ხელში ხელისუფლებას, მერე ხომ ეჭვი არ გეპარებათ, რომ უკრაინიდან ზარი გაისმებოდა, მიდით, საქართველო და შევარდით ახლა ერთ ან მეორე რეგიონშიო. ხომ არავის ეპარება ეჭვი, რომ ზუსტად ამას გააკეთებდნენ?! თავად ეს „ნაციონალური მოძრაობა“ და მისი პარტნიორი პარტიები არ ამბობდნენ, რომ დაუწესებდნენ სანქციებს, ჩაკეტავდნენ საზღვრებს, წავიდოდნენ ესკალაციაზე. გახსოვთ, ზურაბ გირჩი ჯაფარიძის განცხადება, რომ ერთი, 10 ათას რუს ჯარისკაცს აქ დავაკავებდითო, აქ რომ ომი დაგვეწყო. ეს უნდოდათ მათ! უნდოდათ, რასაც ეკა გიგაური ევროკავშირის მიერ დაფინანსებული ენჯეოს წარმომადგენელი ამბობდა, რომ შესაძლებლობის ფანჯარა უნდა გამოვიყენოთ, ახლა რუსეთი სუსტი არისო; ეს არის რასაც ევროკავშირის მიერ დაფინანსებული ნინო ლომჯარია ამბობდა, რომ ასეთ ყოფას ჯობია, რომ ბომბები გვესხმოდეს და ჩვენი ბავშვები და ქალები იღუპებოდნენო. ეს ერჩივნა მას. აი, ეს უნდოდათ, მოეწყოთ და ქართველმა ხალხმა კიდევ ერთხელ და მათ შორის, ჩვენმა უსაფრთხოების სამსახურებმა ამის საშუალება არ მისცეს“, - განაცხადა პაპუაშვილმა.