BBC-ის ფილმამდე დიდ ბრიტანეთში ორ თვეში გამოქვეყნებული 2000-მდე ნეგატიური სტატია საქართველოზე, „კამიტის“ პირველი ხსენება, „კვლევის“ დროს ჩამოსული BBC-ის საგამოძიებო გუნდი - ე.წ. საგამოძიებო ფილმის დაგეგმვის დეტალები „იმედის კვირამ“ გაარკვია

„იმედის კვირამ“ გაარკვია, როგორ დაიგეგმა BBC-ის ე.წ. სკანდალური რეპორტაჟი, რომელმაც ქართულ აუდიტორიაზე ვერ იმუშავა.

საინტერესოა, რომ წელს სექტემბერ-ოქტომბერში, საქართველოზე მხოლოდ დიდ ბრიტანეთში 2000-მდე ნეგატიური სტატია დაიწერა, მათი შინაარსი თბილისში მიმდინარე პროტესტს ეხებოდა. იქმნებოდა ზოგადი ფონი კულმინაციისთვის ანუ BBC-ის ე.წ. საგამოძიებო სიუჟეტისთვის.

მანამდე კი, ერთი წლით ადრე სიტყვა „კამიტი“ 2024 წლის 28 ნოემბრის მოვლენებიდან - როდესაც ხელისუფლებას ვითარების განსამუხტად სპეცსაშუალებების გამოყენება მოუხდა, რამდენიმე საათში - 29 ნოემბერს რადიკალების მხარდამჭერი ემიგრანტის ნუგზარ სულაშვილის სტატუსში პირველად ჩნდება. თითქოს, მას „კამიტზე“ სისტემიდან წასული სპეცრაზმელი ესაუბრა.

პროცესში მალევე ჩაერთო, თავის დროზე CIA-ს უშუალო ჩართულობით შექმნილი რადიო თავისუფლება, რომელმაც ზედიზედ 4 სტატია მოამზადა მინიშნებით, რომ წყლის ჭავლში ქიმიკატები იყო გარეული.

2025 წლის 6 იანვარს კი გამოდის სტატია სახელწოდებით „დანაშაული მოსახლეობის წინაშე’’, სადაც ადამიანების მოწამვლის შესახებ საუბარი ექიმებმა დაიწყეს. ექიმებში იგულისხმება გიული ალასანიას მეგობარი, „ნაცმოძრაობის“ ყოფილი დეპუტატი, სააკაშვილის გასტროენტეროლოგი მანანა ჯებაშვილი და ამავე სამეგობროს კიდევ ერთი წევრი - პედიატრი გიორგი ჩახუნაშვილი.

მანანა ჯებაშვილი და მამა-შვილი ჩახუნაშვილები „ნეოლაბში“ იწყებენ კვლევას, რომელიც ჩატარდა 9 იანვრიდან 1 მარტის პერიოდში. სწორედ ეს კვლევა წარმოადგენს BBC-ის ერთ-ერთ მთავარ დასაყრდენს ე.წ საგამოძიებო რეპორტაჟში.

„იმედის კვირასთან“ სატელეფონო საუბარში კონსტანტინე ჩახუნაშვილი არ პასუხობს კითხვას, ვინ დაუკვეთა კვლევა. „იმედის კვირის“ ინფორმაციით, კვლევაში გიული ალასანიას უნივერსიტეტი ჩაერთო, სწორედ საქართველოს უნივერსიტეტის ბიოეთიკის საბჭომ დაამტკიცა და აიღო პასუხისმგებლობა კვლევის ეთიკურობაზე. თუმცა, ალასანია „იმედის კვირასთან“ სატელეფონო საუბარში ამ კვლევას ვერ იხსენებს.

სწორედ კვლევის მომზადების პერიოდში, 16-დან 21 თებერვალის ჩათვლით საქართველოში ჩამოვიდნენ BBC-ის საგამოძიებო გუნდის ხელმძღვანელები - მაქს ჰადსონი და ოანა მეროსიკო. „იმედის კვირის“ წყაროს ინფორმაციით, ამ პერიოდში შედგა შეხვედრები BBC MEDIA ACTION -ის მიერ დაფინანსებულ ონლაინ მედიების და ქართული ოპოზიციური არხების წარმომადგენლებთან.

BBC-იმ ჩაწერა რესპოდენტები. ჩახუნაშვილების საოჯახო კვლევა ამ პერიოდში დასრულებული არ იყო, მაგრამ ქართველი რესპოდენტები რატომღაც მინიშნებებს აკეთებდნენ ქიმიურ მოწამვლაზე, რაც მეტად აჩენს ეჭვს, რომ პროცესი წინასწარ გაწერილი სცენარით მიდიოდა.

მოგვიანებით, პედიატრი ჩახუნაშვილების ე.წ. ტოქსიკოლოგიური კვლევა გადაიგზავნა სხვადასხვა დასავლურ სამეცნიერო გამომცემლობაში, მათ შორის, ამერიკულში, მაგრამ იმის გამო, რომ სამედიცინო სტატია იწყება და მთავრდება პოლიტიკური ლოზუნგებით, გამომცემების უმრავლესობამ ის არ გამოაქვეყნა.

საბოლოოდ აგვისტოში კვლევა გაიგზავნა ლონდონში დარეგისტრირებულ კომპანიაში. 11 ნოემბერს „საიენს დაირექთ .ქომმა“ ის შესამოწმებლად მიიღო, 13 ნოემბერს კი უჩვეულოდ სწრაფად დაადასტურა. ზუსტად ამ დღეს, 13 ნოემბერს, ქართულმა ოპოზიციურმა მედიებმა გაავრცელეს 6 ნოემბერს ეუთოში გამოსვლისას ბრიტანეთის ელჩის მიერ გაკეთებული განცხადება, სადაც მან საქართველო რუსეთთან და ბელორუსთან ერთად მოიხსენია.

ჩახუნაშვილების კვლევა ონლაინ ხელმისაწვდომი 17 ნოემბერს, რომელიც 25 ნოემბერს დაარედაქტირეს. „იმედის კვირამ“ ოფიციალური კითხვით მიმართა პორტალს, რომელმაც სხვა ავტორიტეტული გამოცემების მიერ დაბლოკილი კვლევა გამოაქვეყნა, რა გახდა მათი რეკორდულად ჩქარი დასტურის მიზეზი, თუმცა პასუხი ჯერ არ მიუღია.

სწორედ ამ ყველაფრის ფონზე, 1 დეკემბერს გამოქვეყნდა BBC-ის ფილმი, რაც უცნაურად ემთხვევა „კრედიტ სუისთან“ ლონდონის სასამართლოში ბიძინა ივანიშვილის გამარჯვებას.

ფილმს სწრაფად გამოეხმაურნენ ისეთი პირები, როგორებიც დაზვერვის და უსაფრთხოების კომიტეტების ძველი თანამშრომელი ლორდ ფოულკესი და უცხო ქვეყნების სპეცსამსახურების თანამშრომლის, თემურ ალასანიას მეგობარი, „მაგნიტსკის აქტის” ავტორი ბილ ბროუდერია.

ფაქტებზე დაყრდნობით აშკარაა, რომ BBC-ის ე.წ. გამოძიებას გამოძიებასთან საერთო არაფერი აქვს და ის წინასწარ დაწერილი სცენარით დადგმულ სპექტაკლს უფრო ჰგავს.

ფაქტია ისიც, რომ ე.წ. ჟურნალისტური გამოძიების ავტორებმა სწორედ ამიტომ არ გამოიყენეს და არ გაითვალისწინეს „ქართული ოცნების” საზოგადოებასთან ურთიერთობის სამსახურის მიერ მათ შეკითხვებზე გადაგზავნილი ვრცელი პასუხები.

ყველა დეტალი სანდრო გამსახურდიას სპეციალურ რეპორტაჟში.