გიორგი ჩაკვეტაძე „ერთიანი ნეიტრალური საქართველოს“ განცხადებაზე: მზად ვართ, რომ ნებისმიერ მსგავს დებატებში მივიღოთ მონაწილეობა

გიორგი ჩაკვეტაძის თქმით, „ქართული ოცნება“ მზად არის „ერთიანი ნეიტრალური საქართველოს“ მიერ შეთავაზებულ დებატებში მონაწილეობისთვის. განათლების, მეცნიერებისა და ახალგაზრდულ საქმეთა კომიტეტის თავმჯდომარის პირველი მოადგილე აცხადებს, რომ საქართველო ევროპისკენ მიდის, თუმცა ევროკავშირში არსებულ ღირებულებით კრიზისზე საუბრობს.

„ქართული ოცნება“ არის პირველი ხელისუფლება, რომელმაც საქართველოს კონსტიტუციაში ჩაწერა, რომ ჩვენ მივდივართ ევროპის მიმართულებით. ნებისმიერ პოლიტიკურ ჯგუფს შეუძლია ნებისმიერი საკითხი დააყენოს დღის წესრიგში. მზად ვართ, რომ ნებისმიერ მსგავს დებატებში მივიღოთ მონაწილეობა. ვხედავთ, რა ხდება ევროკავშირში, როგორ უფასურდება ევროპული ღირებულებები, თუმცა პოზიტიურად ვართ განწყობილები, იქიდან გამომდინარე, რომ არაერთ ქვეყანაში, მათ შორის ევროკავშირის წევრ ქვეყნებში, კონსერვატიული ძალები უკვე ხელისუფლებაში მოდიან, საუბრობენ იმ ღირებულებებზე, რომლებზეც „ქართული ოცნება“ განსაკუთრებით აქტიურად 2022 წლის შემდეგ საუბრობს. ჩვენ კონსტიტუციაში გვიწერია, რომ მივდივართ ევროკავშირისკენ, თუმცა მივდივართ იმ ღირებულებების დაცვით, რაც ქართველი ხალხისთვის ძალიან მნიშვნელოვანია“, - განაცხადა ჩაკვეტაძემ.

„ერთიანი ნეიტრალური საქართველო“ განცხადებას ავრცელებს და სვამს კითხვას არის თუ არა ეროვნულ ინტერესებთან თავსებადი ის საგარეო კურსი, რომელიც ხელისუფლებას აქვს არჩეული. პარტია მზად არის ამ თემაზე ხელისუფლებასთან პირისპირ დებატებისთვის.