მაკა ბოჭორიშვილი: ვრცელდება ინფორმაციები, რაც ადასტურებს, თუ რა რაოდენობის ვაჭრობას ახორციელებენ დიდ ბრიტანეთში დარეგისტრირებული კომპანიები რუსეთთან. ამ ფონზე, როდესაც ხდება ქართულ საზოგადოებაზე ზეწოლა, ეს აჩენს კითხვებს

ვერავის დავეთანხმები იმაზე, რომ ასეთი მეთოდებით, საქართველოსთან დამოკიდებულებით რაიმე გავლენას ახდენენ საერთოდ რუსეთის დასუსტებაზე, - განუცხადა ჟურნალისტებს საქართველოს საგარეო საქმეთა სამინისტროში, მინისტრმა მაკა ბოჭორიშვილმა ბრიტანეთის ელჩთან შეხვედრის შემდეგ.

კითხვაზე, როგორ გამოიყურება დიდი ბრიტანეთის გადაწყვეტილება ქართული ტელეკომპანიების დასანქცირების შესახებ, მაშინ როდესაც Transparency International-ის ინფორმაციით, რუსეთის საგარეო ვაჭრობის მოცულობამ, გაერთიანებული სამეფოს საზღვარგარეთის ტერიტორიებზე დარეგისტრირებული კომპანიების მეშვეობით, 8 მილიარდი დოლარი შეადგინა.

მაკა ბოჭორიშვილის თქმით, დიდი ბრიტანეთის ელჩთან, გარეთ უორდთან შეხვედრაზე მათ აღნიშნული ინფორმაციის შესახებაც დასვეს კითხვა.

„ამ 40 წუთის განმავლობაში, ჩვენ ამ საკითხსაც შევეხეთ. ვრცელდება ინფორმაციები, რაც ადასტურებს, თუ რა რაოდენობის ვაჭრობას ახორციელებენ დიდ ბრიტანეთში დარეგისტრირებული კომპანიები რუსეთთან. ასეთი მასალები არსებობს, რომელიც წარმოდგენილია, სხვათა შორის, არა მხოლოდ ქართულ, საერთაშორისო მედიაში, საერთაშორისო კვლევებს ეფუძნება და რა თქმა უნდა, ამ ფონზე, როდესაც ხდება ქართულ საზოგადოებაზე ზეწოლა, ეს აჩენს კითხვებს. ჩვენ არ გვეშინია ამ კითხვების დასმის და რა თქმა უნდა, ჩვენ ვსვამთ კითხვას, რა მიზანს ემსახურება ქართულ სახელმწიფოზე ქართულ საზოგადოებაზე ზეწოლა და რა კავშირი აქვს მას საერთოდ, რუსეთთან ბრძოლასთან, როგორც ისინი გვეუბნებიან, რომ ებრძვიან რუსეთს. ვერავის დავეთანხმები იმაზე, რომ ასეთი მეთოდებით, საქართველოსთან დამოკიდებულებით რაიმე გავლენას ახდენენ საერთოდ რუსეთის დასუსტებაზე, ამაში ვერ დავეთანხმები“, - განაცხადა საქართველოს საგარეო საქმეთა მინისტრმა.

საერთაშორისო წნეხის მიუხედავად, რუსეთის საგარეო ვაჭრობის მოცულობამ გაერთიანებული სამეფოს საზღვარგარეთის ტერიტორიებზე დარეგისტრირებული კომპანიების მეშვეობით 2022 წლის თებერვლიდან 2025 წლის იანვრამდე სულ მცირე 8 მილიარდი დოლარი შეადგინა. ინფორმაციას არასამთავრობო ორგანიზაცია Transparency International ავრცელებს.

დიდი ბრიტანეთის ელჩმა, გარეთ უორდმა საქართველოს საგარეო საქმეთა სამინისტრო, სადაც ის ახსნა-განმარტებისთვის იყო დაბარებული, უკომენტაროდ დატოვა.

მაკა ბოჭორიშვილის განცხადებით, როდესაც ამ თემაზეა საუბარი, მას ძალიან მტკიცე სამართლებრივი საფუძველი სჭირდება. ქვეყნის პირველი დიპლომატის შეფასებით, ცინიკურია, როდესაც დიდი ბრიტანეთი რუსეთზე გამარჯვების გზად „იმედსა“ და „პოსტივიზე“ თავდასხმას ხედავს.

როგორც ცნობილია, დიდი ბრიტანეთის მთავრობამ ქართული ტელეკომპანიების, „იმედისა“ და „პოსტივის“ წინააღმდეგ სანქციები შემოიღო. შესაბამისი ინფორმაცია ბრიტანეთის მთავრობის ვებ-გვერდზეა გამოქვეყნებული.