ის, რაც დიდი ბრიტანეთის სახელმწიფომ გააკეთა, არ არის სანქცია - „იმედი“ დაბადებულია გამარჯვებისთვის და ცენზურის დაწესება ქართველ მაყურებელზე შეუძლებელია, თეორიულადაც კი - ირაკლი ჩიხლაძის მონოლოგი

დასავლური ბიუროკრატია და სამეფო კარის პოლიტელიტის პოლიტიკა ისე ყარს, სუნი თბილისშიც კი იგრძნობა! ვამაყობ „იმედით“ და ვამაყობ „იმედელების“, ჩემი ოჯახის შემართებით - ვერავინ ვერასოდეს მოგვერევა, ვიდრე ვიცავთ თავისუფალ სიტყვას, ჩვენი ქვეყნის ინტერესებს, სუვერენიტეტსა და დამოუკიდებლობას!, - განაცხადა ტელეკომპანია „იმედის“ გენერალური დირექტორის მოადგილემ, გადაცემა „იმედის კვირის“ წამყვანმა ირაკლი ჩიხლაძემ.

მისივე თმით, თეორიულად თუ სხვა ქვეყნები დაასანქცირებენ საქართველოში არსებულ „რადიკალურ“ არხებს, იგი ამ ფაქტს აუცილებლად დაგმობს. ჩიხლაძემ აღნიშნა, რომ ის, რაც დიდი ბრიტანეთის სახელმწიფომ გააკეთა, არ არის სანქცია, არამედ ეს არის თავისუფალ სიტყვაზე თავდასხმა.

„მიუხედავად იმისა, რომ წლებია, ისინი ახალისებენ ძალადობას, რევოლუციებს, სიძულვილს, ეწევიან ანტისახელმწიფოებრივ ,,საქმეს“, ახალისებენ უკანონობას და მიწასთან ასწორებენ მედია სტანდარტს, დეზინფორმაცია და სიძულვილი აქციეს მთავარ სტანდარტად. ამ ყველაფრის მიუხედავად მათზე სხვა ქვეყნის თავდასხმას მაინც დავგმობ, მიუხედავად იმისა, რომ მათ მიმართ სოლიდარული არ ვარ. მით უფრო იმ მოვლენების შემდეგ, რაც გასულ წლებში ვიხილეთ - როგორ იქცნენ რადიკალიზმის მთავარ მედროშეებად, რადიკალების მიერ დაფინანსებული ორგანიზაციების მითითებით. უცხო ქვეყნის სპეცსამსახურების დაფინანსებას და ტრენინგებს რა შედეგამდეც მიყავხართ, საკუთარ ნიუსრუმებში იკითხეთ, თუ ვინმე დაგრჩათ ან ოდესმე გყოლიათ ისეთი, ვისაც ჭკუა მოეკითხება. ამ ყველაფრის მიუხედავად, არცერთ ქვეყანას არ აქვს უფლება, ჩაერიოს ჩემი ქვეყნის შიდა საქმეებში და მიიღოს მსგავსი სამარცხვინო გადაწყვეტილება. ის, რაც დიდი ბრიტანეთის სახელმწიფომ გააკეთა, არ არის სანქცია - ყველაფერს თავისი სახელი უნდა უნდა დავარქვათ. პირდაპირ ვიტყვი: ეს არის თავისუფალ სიტყვაზე თავდასხმა! თავისუფალ სიტყვაზე თავდასხმა!

გულწრფელი სოლიდარობა „პოს ტვ“-ის და ყველას, ვინც რადიკალების სამიზნეშია - რადიკალებმა პირდაპირ აღიარეს, როგორ დადიოდნენ კარდაკარ და ითხოვდნენ არა მხოლოდ მედიის და თავისუფალი სიტყვის, არამედ მთლიანად ქვეყნის დასანქცირებას.

დღევანდელი რეპორტაჟებს ინგლისურ ენაზეც გადავთარგმნით, ფაქტია, საერთაშორისო მნიშვნელობის ტელევიზია ვართ. და რადგან ჩვენი სიტყვა, როგორც ლონდონი იუწყება, გლობალურ პოლიტიკაზე საკვანძო გავლენას ახდენს და ამან ბრიტანეთის ბიუროკრატია აღაშფოთა, დროა, მსოფლიომ გაიგოს რეალობა იმის შესახებ, თუ როგორ დაემსგავსა ბრიტანეთის დღევანდელი ბიუროკრატია საბჭოთა გლავლიტს!

დასავლური ბიუროკრატია და სამეფო კარის პოლიტელიტის პოლიტიკა ისე ყარს, სუნი თბილისშიც კი იგრძნობა! ვამაყობ „იმედით“ და ვამაყობ „იმედელების“, ჩემი ოჯახის შემართებით - ვერავინ ვერასოდეს მოგვერევა, ვიდრე ვიცავთ თავისუფალ სიტყვას, ჩვენი ქვეყნის ინტერესებს, სუვერენიტეტსა და დამოუკიდებლობას!

ჩვენ არ ვიღლებით, პირიქით, გაცილებით უფრო ვძლიერდებით, როცა ვინმე თავს გვესხმის ან თავისუფლების შეზღუდვას ცდილობს - როგორც ჩანს, ეს ან არ უთხრეს, ან არ გაითვალისწინეს დიდ ბრიტანეთში.

„იმედი“ უდიდესი ძალაა! ეს სტარმერის კარის თამაშებმაც დაადასტურა. დიდი ბრიტანეთი ქართველი ხალხის „იმედის“ წინააღდეგ - რამხელა პატივია, მსგავსი თავდასხმა ხომ 2007 წელს უკვე ვიხილეთ, მართალია სხვა ფორმით და სხვა ავტორებით, მაგრამ ახლა როგორც ჩანს, რადგან „დიფ სთეითის“ აგენტურა ციხეში მიდი-მოდის და არანარი შანსი აქვს ოდესმე არა თუ ხელისუფლებაში პოლტიკურ ველზე რაიმე ღირებული შექმნას, გარე ძალები ღიად ჩაერთვნენ პროცესში, გადმოვიდნენ შეტევაზე და გონივრული ეჭვის საფუძველზე თავად გადაწყვიტეს, დაადუმონ თავისუფალი სიტყვა - „იმედი“ დაბადებულია გამარჯვებისთვის და ცენზურის დაწესება ქართველ მაყურებელზე შეუძლებელია - თეორიულადაც კი“, - განაცხადა ჩიხლაძემ.

როგორც ცნობილია, დიდი ბრიტანეთის მთავრობამ ქართული ტელეკომპანიების, „იმედისა“ და „პოსტივის“ წინააღმდეგ სანქციები შემოიღო. შესაბამისი ინფორმაცია ბრიტანეთის მთავრობის ვებ-გვერდზეა გამოქვეყნებული.

თავისუფალ მედიაზე დიდი ბრიტანეთის თავდასხმის გამო საქართველოში დიდი ბრიტანეთის ელჩი საგარეო საქმეთა სამინისტროში იყო დაბარებული. მან შეხვედრა კომენტარის გარეშე დატოვა.

საგარეო საქმეთა მინისტრ მაკა ბოჭორიშვილის განცხადებით, 40 წუთის განმავლობაში მას არ მოუსმენია არც ერთი არგუმენტი, რომელიც გაამართლებდა იმ გადაწყვეტილებას, რომელიც მიიღო ლონდონმა.