მაკა ბოჭორიშვილი: როდესაც ჩვენ კანდიდატის სტატუსს ველოდით, რამხელა იდეოლოგიური ამბავი იყო ჩვენთვის, რომ ევროკავშირის წევრობისთვის ნაბიჯს ვდგამდით. ამ დროს ვიღაცისთვის ეს არის უბრალოდ საშუალება, რომ შენზე მოახდინოს ზეწოლა

ჩვენ საუკუნეების განმავლობაში ვცდილობთ, რომ ჩვენი ევროპული იდენტობა ვამტკიცოთ, რომ ჩვენც ევროპელები ვართ. გეოგრაფიამ ევროპის კუთხეში მოგვათავსა და სულ ვცდილობთ დავამტკიცოთ, რომ ჩვენ ვართ ევროპელები და ევროპულ კულტურასა და ისტორიაში შეგვაქვს წვლილი, - განაცხადა საქართველოს საგარეო საქმეთა მინისტრმა მაკა ბოჭორიშვილმა გადაცემაში „ნოესთან“.

მისივე თქმით, ეს ყველაფერი უკავშირდება ქრისტიანულ ფასეულობებს და ამ ქრისტიანობაშია ის ფესვები, რაც საქართველოს აერთიანებს ევროპასთან.

„რაზე დგას ევროპა - ეს ქრისტიანული ფასეულობებია, ამას იცავ შენ მთელი შენი ისტორია და ზუსტად ამიტომ ხარ მუდმივად ევროპული ფასეულობების დამცველი. შენთვის იდეა რომ არის, ამას ხდიან ინსტრუმენტად - „ახლა მე შენ წაგართმევ უვიზო მიმოსვლას, გავაბრაზებ შენს მოქალაქეებს და ეს შენი გაბრაზებული მოქალაქეები შენ მოგადგებიან, რომ ეს რა გააკეთე“.

ეს არის შანტაჟი მაშინ. როდესაც ჩვენ კანდიდატის სტატუსს ველოდით, რამხელა იდეოლოგიური ამბავი იყო ჩვენთვის, რომ ევროკავშირის წევრობისთვის ნაბიჯს ვდგამდით. ამ დროს ვიღაცისთვის ეს არის უბრალოდ საშუალება, რომ შენზე მოახდინოს ზეწოლა - „შენ კანდიდატის სტატუსი გინდა? - გეტყვი უარს, მერე მიდი და აუხსენი შენს მოქალაქეებს, რომ შენს გამო გითხარი უარი“.

გულსატკენი იყო ნამდვილად, რადგან შენ სხვა ფასეულობითად უყურებ ამ ურთიერთობებს და ვიღაცისთვის არის უბრალოდ ინსტრუმენტი, როგორ მოახდინოს რაღაც პროცესებზე გავლენა“, - აღნიშნა მაკა ბოჭორიშვილმა.