ზვიად შალამბერიძე აშშ-სთან ურთიერთობაზე: ვისაც მოლოდინი არ ჰქონდა, რომ ჩვენი სტრატეგიული ურთიერთობა აღდგებოდა, იმაზე ადრე გავაწბილებთ, ვიდრე შეიძლებოდა, მათ ეს წარმოედგინათ როგორც ქვეყნის შიგნით, ასევე ქვეყნის ფარგლებს გარეთ

ვისაც მოლოდინი არ ჰქონდა, რომ ჩვენი სტრატეგიული ურთიერთობა აღდგებოდა, იმაზე ადრე გავაწბილებთ, ვიდრე მათ შეიძლებოდა, ეს წარმოედგინათ როგორც ქვეყნის შიგნით, ასევე ქვეყნის ფარგლებს გარეთ, - განაცხადა გადაცემაში „დღის ქრონიკა“ შეერთებულ შტატებთან ურთიერთობაზე საუბრისას რეგიონული პოლიტიკისა და თვითმმართველობის საპარლამენტო კომიტეტის თავმჯდომარის პირველმა მოადგილემ ზვიად შალამბერიძემ.

მისი თქმით, ამ ურთიერთობის ახალ ფაზაში გადასვლით შესაძლოა, რამდენიმე ევრობიუროკრატი გაღიზიანდეს.

„ჩვენ ვასხვავებთ ევრობიუროკრატებს, ამ შემთხვევაში კონკრეტულ ადამიანებს ევროკავშირისგან. არის რამდენიმე ევრობიუროკრატი, რომელიც რა თქმა უნდა, გაღიზიანდება იმით, რომ საქართველო-ამერიკის შეერთებული შტატების ურთიერთობა გადავიდეს ახალ, ძალიან პოზიტიურ ფაზაში, რასაც მოასწავებს ყველა შეხვედრა, რაც კი იყო აქამდე.

დარწმუნებული ვარ, ვისაც მოლოდინი არ ჰქონდა, რომ ჩვენი სტრატეგიული ურთიერთობა აღდგებოდა, იმაზე ადრე გავაწბილებთ, ვიდრე მათ შეიძლებოდა, ეს წარმოედგინათ როგორც ქვეყნის შიგნით, ასევე ქვეყნის ფარგლებს გარეთ.

სამწუხაროა ის, რომ ადამიანები - როგორც უცხოელები, ასევე სამწუხაროდ, საქართველოს მოქალაქეები არიან ჩვენი ქვეყნის წარმატების წინააღმდეგ - როცა ქვეყანა ამერიკასთან სტრატეგიულ ურთიერთობას ალაგებს, არ შეიძლება, ეს წარმატებისკენ გადადგმული ნაბიჯი არ იყოს საქართველოს მხრიდან“, - განაცხადა დეპუტატმა.

შალამბერიძემ „შუა დერეფნის“ მნიშვნელობასა და რეგიონში შეერთებული შტატების როლზეც ისაუბრა.

„რაც შეეხება შუა დერეფანს, რა თქმა უნდა, ძალიან დიდი პრობლემა იყო ყოველთვის აზერბაიჯანი-სომხეთის დაძაბული ურთიერთობა, რომელიც ჰქონდათ წლების განმავლობაში. დღევანდელ დღეს, როცა აზიის ქვეყნებიდან ევროპისკენ მიმავალი ტრადიციული, რუსეთის მხარეს გამავალი გზა აღარ არის უსაფრთხო და ხელმისაწვდომი, ყველაზე დიდ მნიშვნელობას იძენს „შუა დერეფანი“, რომელიც ცალსახად გადის საქართველოს გზაზე და აკავშირებს აზიას, შუა აზიას, საქართველოს და ევროპას.

სამხრეთ კავკასიის ქვეყნები - საქართველო, აზერბაიჯანი, სომხეთი იქნება სტაბილურობის პლაცდარმი, რომელიც იქნება კარგი მოკავშირე იმ ქვეყნებისთვის, რომლებისთვისაც ძალიან მნიშვნელოვანია, ეს ქვეყნები გამოიყენოს სატრანზიტოდ. რა თქმა უნდა, ამერიკის ფაქტორი კიდევ უფრო მეტი სტაბილურობის განმსაზღვრელი და უფრო მეტი ინვესტიციების მოზიდვის წინაპირობა იქნება“, - განაცხადა ზვიად შალამბერიძემ.