ისეთი ძლიერი სპეცსამსახურები, როგორიც დღეს საქართველოს ჰყავს, ბევრ ქვეყანას შეშურდება. დღევანდელი ხელისუფლების საშინაო და საგარეო პოლიტიკა მხოლოდ და მხოლოდ ქართველი ხალხის ინტერესებს ეფუძნება - ირაკლი ჩიხლაძის მონოლოგი

სპეკულაცია, რომ საქართველო წარმოაჩინონ სხვის ომში ჩართულ მხარედ, ფაქტია, არც ამჯერად მუშაობს, თუმცა მცდელობებს მაინც არ აკლებენ, - განაცხადა ტელეკომპანია „იმედის“ გენერალური დირექტორის მოადგილემ, გადაცემა „იმედის კვირის“ წამყვანმა, ირაკლი ჩიხლაძემ კვირის მოვლენების შეჯამებისას.

მისივე თქმით, 15 ქვეყნის ცაზე გამოჩნდა საბრძოლო დრონები თუ ბალისტიკური რაკეტები და ახლო აღმოსავლეთი ცეცხლის რკალშია. არსებული დრამატული ვითარების ფონზე კი საქართველო მიზანმიმართული დეზინფორმაციის მორევში აღმოჩნდა.

„ირანი, ისრაელი, ერაყი, იორდანია, ლიბანი, საუდის არაბეთი, გაერთიანებული საამიროები, კატარი, ბაჰრეინი, ქუვეითი, ომანი, კვიპროსი, აზერბაიჯანი, თურქეთი და სირია - 15 ქვეყნის ცაზე გამოჩნდა საბრძოლო დრონები თუ ბალისტიკური რაკეტები. ახლო აღმოსავლეთი ცეცხლის რკალშია. მშვიდობა, საქართველო.

ვითარება უკიდურესად მძიმეა. ახლა ყველას მართებს თავშეკავება, სიფრთხილე და მხოლოდ საკუთარი ქვეყნის ინტერესების გათვალისწინება. ახალი მსოფლიო წესრიგი არა დიპლომატიით, არამედ ცეცხლით და ძალის პოლიტიკით ყალიბდება. ასეთ დროს იმ ერებს, რომლებიც პრაგმატული პოლიტიკის ერთგულნი რჩებიან და იციან სუვერენიტეტის ფასი, აქვთ შანსი აირიდონ კონფლიქტი - არ იქცნენ პოლიგონად მეორე ფრონტისთვის. ამის მწარე გამოცდილება საქართველოს უკვე აქვს.

უკრაინაში რუსეთის შეჭრის პირველივე წუთებიდან მოგვიწოდებდნენ ომში ჩართვისკენ და ყველამ კარგად ვიცით, რომ არა „ქართული ოცნება“ და პარტიის საპატიო თავმჯდომარე ბიძინა ივანიშვილი, დიდი იყო ალბათობა, ბევრი დედა შემოსილიყო ძაძით. ომგამოვლილი ქვეყანა ამას ვეღარ გაუძლებდა.

საქართველო ცეცხლის რკალშია. ერთი არასწორი ნაბიჯი და შეიძლება ცეცხლი ჩვენც მოგვედოს. საბედნიეროდ, ამ ქვეყნის მოსახლეობის უდიდესი უმრავლესობა ამას კარგად ხედავს. იციან, რა გამოწვევების წინაშეა დღევანდელი ხელისუფლება და სრულ მხარდაჭერას უცხადებენ მშვიდობის მცველებს. მშვიდობის დაცვაში ერი და ბერი ერთსულოვანია - ცალკეულ გამონაკლისებს თუ არ ჩავთვლით. არიან პოლიტიკოსები და არასამთავრობო ორგანიზაციები, რომლებიც ვაჭრის თვალით უყურებენ ომს, ცეცხლს, ოკუპაციას, კრიზისებს და სიტყვა ტერორიზმსაც კი.

ფაქტია, ახლო აღმოსავლეთში არსებული დრამატული ვითარების ფონზე, საქართველო მიზანმიმართული დეზინფორმაციის მორევში აღმოჩნდა. კონკრეტულმა ძალებმა ღია საინფორმაციო ომი წამოიწყეს. სპეკულაცია, რომ საქართველო წარმოაჩინონ სხვის ომში ჩართულ მხარედ, ფაქტია, არც ამჯერად მუშაობს, თუმცა მცდელობებს მაინც არ აკლებენ. დღეს უკვე თვისობრივად სხვა რეალობაა. ისეთი ძლიერი სპეცსამსახურები, როგორიც დღეს საქართველოს ჰყავს, ბევრ ქვეყანას შეშურდება. ისიც ხაზგასასმელია, რომ დღევანდელი ხელისუფლების საშინაო და საგარეო პოლიტიკა ეფუძნება მხოლოდ და მხოლოდ ქართველი ხალხის ინტერესებს და არაფერს სხვას“, - განაცხადა ჩიხლაძემ.

მისივე თქმით, სახელმწიფო უსაფრთხოების სამსახურმა უკვე დაიწყო გამოძიება და ანტიქართული ბრალდებების ავტორები სასამართლოში დღეს გამოიკითხნენ.

ვინ ეთამაშება ცეცხლს და რა მოტივით? - სანდრო გამსახურდია მოგიყვებათ, რის საფუძველზე დაადანაშაულეს საკუთარი სამშობლო ტერორიზმის ხელშეწყობაში ხიდაშელმა, გიგაურმა და სხვებმა.