ბორის ჯონსონს დასანქცირებაზე საუბრისას ინტერვიუში „იმედი“ და „პოსტივი“ არ უხსენებია - „იმედის კვირის“ მიერ აღმოჩენილი დეტალი „ინდეფენდენს ავენიუ მედიას“ მიერ გავრცელებულ კომენტარში

„იმედის კვირამ“ დიდი ბრიტანეთის მთავრობის მიერ „იმედისა“ და „პოსტივის“ დასანქცირების შესახებ ბრიტანეთის ყოფილი პრემიერის, ბორის ჯონსონის კომენტარში, რომელიც „ინდეფენდენს ავენიუ მედიამ“ გაავრცელა, საინტერესო დეტალი აღმოაჩინა - მისი ინტერვიუს 24-წამიან ჩანაწერში ბორის ჯონსონი არც ტელეკომპანია „იმედს“ და არც „პოსტივის“ ახსენებს.

„ინდეფენდენს ავენიუ მედიას“ ერთ-ერთმა დამფუძნებელმა და მთავარმა რედაქტორმა რედაქტორმა, ტრამპის ადმინისტრაციის მიერ დახურული „ამერიკის ხმის“ ქართული რედაქციის ჟურნალისტმა ია მეურმიშვილმა ბორის ჯონსონი უკრაინაში ჩაწერა.

საიტზე გამოქვეყნებული ინტერვიუს წინასიტყვაობიდან ვიგებთ, რომ ეს ინტერვიუ 24 თებერვალს ჩაიწერა. ანუ უკრაინაში რუსეთის შეჭრის 4 წლისთავზე და ორი ქართული ტელეკომპანიისთვის სანქციების გამოქვეყნების დღეს. ია მეურმიშვილმა 24 თებერვალს ჩაწერილი ინტერვიუ 27 თებერვალს თარგმანის გარეშე გამოაქვეყნა.

27 თებერვალს ატვირთულ 8-წუთიან ჩანაწერში რატომღაც ვერ მოხვდა ის 24-წამიანი ფრაგმენტი, რომელიც 3 დღის შემდეგ, 2 მარტს გამოქვეყნდა არა ორიგინალი, არამედ - მხოლოდ ქართული გახმოვანებით. „ინდეფენდენს ავენიუ მედიას“ მტკიცებით, ბრიტანეთის ყოფილი პრემიერი „იმედსა“ და „პოსტივი“ ახსენებს.

რადგან ორი ქართული ტელეკომპანიის შესახებ ბორის ჯონსონის კომენტარის ეს ნაწილი ინტერვიუს ძირითად ვერსიაში ვერ მოხვდა და მხოლოდ ქართულად გახმოვანებული ვერსია შემოგვთავაზეს, „იმედის კვირამ“ ორიგინალი ვერსია სპეციალური ტექნიკური საშუალების გამოყენებით მოისმინა. შედეგად აღმოჩნდა, რომ ამ 24-წამიან ჩანაწერში ბორის ჯონსონი არც ტელეკომპანია „იმედს“ და არც „პოსტივის“ ახსენებს.

დეტალების დასაზუსტებლად და ამ ვერსიის გადასამოწმებლად „იმედის კვირა“ ინეტრვიუერს დაუკავშირდა თხოვნით, მოეწოდებინა ფრაგმენტის ორიგინალი, რაზეც მან უარი განაცხადა.

რატომ არ გამოქვეყნდა ეს მონაკვეთი ინტერვიუს ვრცელ ვერსიასთან ერთად, რატომ შეინახეს კიდევ 3 დღე და რატომ ვერ ამოვიკითხეთ ბორის ჯონსონის საუბარში „იმედი“ და „პოსტვ“?! ან რატომ არ გაავრცელა მედიასაშუალებამ ორიგინალი ჩანაწერი?

წერილობით პასუხში ია მეურმიშვილი აღიარებს, რომ ბორის ჯონსონს „იმედი“ და „პოსტივი“ არ უხსენებია და რადგან ამ თემაზე დასმულ კითხვას პასუხობდა, გახმოვანებისას ტელევიზიების სახელები თავად ჩაამატეს. ია მეურმიშვილი ირწმუნება, რომ ეს ფართოდ გავრცელებული ჟურნალისტური პრაქტიკაა.

„ბატონი ჯონსონი სწორედ ამ სანქცირებულ ტელევიზიებზე საუბრობდა კითხვაზე პასუხად, თუ რას ნიშნავს ბრიტანეთის მთავრობის მიერ რუსული დეზინფორმაციის გავრცელების ბრალდებით ამ ორი ქართული ტელევიზიის დასანქცირება. სიცხადისა და კონტექსტისთვის, და ფართოდ გავრცელებული ჟურნალისტური პრაქტიკის შესაბამისად, მისი პასუხის ტრანსკრიფციაში ბრაკეტებში „[...]“ დავამატეთ ამ ტელევიზიების სახელები“, - აღნიშნულია პასუხში.

თუმცა, არც მათ ვებგვერდებზე იკითხება, რომ ბორის ჯონსონთან ინტერვიუს ტრანსკრიპტში რედაქციის მიერ არის ჩამატებული „იმედი“ და „პოსტივი“. რა შეკითხვას უპასუხა ბორის ჯონსონმა, უცნობია. ჟურნალისტის კითხვის და გაუხმოვანებელი 24 წამიანი ფრაგმენტის მოწოდებაზე მეურმიშვილმა ისევ უარი თქვა.