დავით მათიკაშვილი პოლონელი ექსპერტის დასკვნაზე: ეს დოკუმენტი გაჯერებულია ტყუილებით, მრუდე შეფასებებით და მასში აშკარად იკითხება ანტიქართული განწყობა

ეს დოკუმენტი გაჯერებულია ტყუილებით, მრუდე შეფასებებით და მასში აშკარად იკითხება ანტიქართული განწყობა, - განაცხადა საპროცედურო საკითხთა და წესების საპარლამენტო კომიტეტის თავმჯდომარე დავით მათიკაშვილმა „დღის ქრონიკაში“ პოლონელი ექსპერტის მიერ გამოქვეყნებულ დასკვნასთან დაკავშირებით.

მისი თქმით, გარე ძალებს არ უნდათ, საქართველო იყოს დამოუკიდებელი და აწარმოოს დამოუკიდებელი პოლიტიკა, რომ არ იყოს იმ მძიმე ვითარების შემადგენელი ნაწილი, რაც უკრაინაში ხდება.

„შეუიარაღებელი თვალითაც ჩანს, რომ ეს არის თეთრი ძაფით შეკერილი საქმე და კიდევ ერთი თავდასხმა ჩვენს ხალხზე, სუვერენიტეტზე, ჩვენი ხალხის სურვილზე, რომ საქართველო იყოს დამოუკიდებელი და დამოუკიდებლად აწარმოოს პოლიტიკა, რომ არ იყოს იმ მსოფლიო მძიმე ვითარების შემადგენელი ნაწილი, რაც უკრაინაში ხდება. ამ მხრივ ჩვენ სულ უფრო მეტად ვგრძნობთ, რომ მცდელობა, დასაჯონ ამ სურვილისთვის ჩვენი ქვეყანა და ხალხი, სამწუხაროდ, დღესდღეობით ისევ აქტუალურია. რა მაძლევს ამის თქმის საფუძველს?

კარგად ვიცით ჩვენ მოვლენები როგორ განვითარდა. დავიწყოთ იქიდან, რომ ეუთოდან საპარლამენტო ასამბლეა ჩამოვიდა საქართველოში, გარკვეულ ეტაპზე მეტ-ნაკლები სიზუსტით შეაფასა მოვლენები. ევროპიდან პირველად გაისმა ის, რომ დაუშვებელია სახელმწიფო ინსტიტუციებზე თავდასხმა, ბოიკოტი არ არის დემოკრატიის ფორმა და ა.შ. ანუ მოცემულობა, სადაც ევროპული წიაღიდან პირველად გავიგეთ საღი აზრი, იყო წარმოდგენილი. თითქოს იმიტომ, რომ ამ საღ აზრს არ გაემარჯვა და ალბათ იმ ძალებისთვის წინასწარაც ცნობილი იყო გარკვეული ინფორმაცია ეუთოს ვიზიტის მთლიანად პოლიტიკური შინაარსისა და განწყობების შესახებ, ორ დღეში საქართველოში ჩამოვიდა ე.წ. ექსპერტი, ვითომ მიუკერძოებელი, მაგრამ ამ დროს პოლონეთის ხელისუფლებასთან არსებითად დაკავშირებული და გაიარა ყველა მაღალი დონის შეხვედრა. საქართველოდან ჩასული არ არის ექსპერტი, რომ 100 გვერდზე მეტი მოცულობის დოკუმენტი ქვეყნდება, რომელზედაც პასუხი მყისიერად იგზავნება ჩვენი ხელისუფლების მიერ და იქიდან ერთი წინადადების გაზიარებაც არ ხდება. ეს დოკუმენტი გაჯერებულია ტყუილებით, მრუდე შეფასებებით და აშკარად იკითხება ანტიქართული განწყობა. ასეთი დოკუმენტი გამოაცხვეს ძალიან მალე და შექმნეს იმის პლაცდარმი, რომ ხვალ და ზეგ ვინმე საქართველოსადმი მტრულად განწყობილი პირი თუ იტყვის აუგს ჩვენს ქვეყანაზე, იტყვის, რომ მარტო მე კი ნუ დამიჯერებთ, აგერ დასკვნაა, სადაც სრული აბსურდი წერია“, - განაცხადა მათიკაშვილმა.

დეპუტატის თქმით, ამ დასკვნის გამოქვეყნება კიდევ ერთხელ არის მცდელობა, რომ საქართველო გამოყენებული იყოს პროქსი ძალად.