მწერლები: მივიღეთ დაპირება, რომ ბორდი ჩვენს მოთხოვნებს შეისწავლის

მწერლებისა და საზოგადოებრივი მაუწყებლის საბჭოს შეხვედრა დასრულდა. მათი განცხადებით, მიიღეს დაპირება, რომ პირველი არხის მენეჯმენტის პასუხისმგებლობის საკითხზე პროცედურების დაცვით იმსჯელებენ.

"ბორდის წევრების მხრიდან ცალსახად არ დაფიქსირებული პოზიცია, რომ ვასილ მაღლაფერიძის გადადგომის საკითხს იზიარებენ. როგორც გვითხრეს, უნდა დაველოდოთ მათ გადაწყვეტილებას და ამის მიხედვით ვიმოქმედებთ. გვაქვს ინტერესი, რომ მაუწყებლის შელახული რეპუტაცია აღდგეს და ამისათვის საჭიროა ადეკვატური რეაგირება. ბორდი როდის დაასრულებს მოკვლევას, ჯერ ზუსტი პასუხი არ უთქვამთ, თუმცა გვითხრეს, რომ ძალიან არ გაიწელება", - განაცხადა მწერალმა ზაალ ანდრონიკაშვილმა.

საზოგადოებრივი მაუწყებლის ბორდის თავმჯდომარე გრიგოლ გოგელია აცხადებს, რომ პოეტ ზვიად რატიანის შესახებ პირველ არხზე მასალის გაშვებისას სტანდარტები დარღვეული იყო. მისი თქმით, საკითხს შეისწავლიან და შესაბამისი რეაგირებაც იქნება, თუმცა მოიაზრება თუ არა არხის გენერალური დირექტორის, ვასილ მაღლაფერიძის გადაყენების საკითხი, გოგელიას არ დაუკონკრეტებია.

"დღეს იყო სპონტანური შეხვედრა, ავუხსენით დამსწრე საზოგადოებას, რომ ბორდი არის ინსტიტუტი, რომელსაც აქვს შესაბამისი პროცედურები და ამ პროცედურების დაცვით მოხდება მოკვლევაც, გამოკვლევაც და რა გადაწყვეტილებასაც მივიღებთ, იქნება სამართლებრივად განსაზღვრული. იმ სტანდარტების შესაბამისად იქნება რეაგირება, რაც აქვს საზოგადოებრივ მაუწყებელს, ყველანაირი ფორმა შეიძლება ჰქონდეს ამას. არ გაგვივლია ეს საკითხები პროცედურულად, არ გვინახავს სამართლებრივად, რა ვადაში იქნება ეს ყველაფერი. ავუხსენით დღეს დამსწრე საზოგადოებასაც, რომ ვართ ინსტიტუტი, რომელიც შესაბამისი წესების მიხედვით მოქმედებს და ამ წესების მიხედვით მივიღებთ გადაწყვეტილებას. გამოვიკვლევთ ყველაფერს და როგორც იქნება საჭირო, ისე გავაკეთებთ. ბორდმა თავისი პოზიცია დააფიქსირა - ჩვენ ვთქვით, რომ სტანდარტი იყო დარღვეული, შესაბამისად მივიღებთ გადაწყვეტილებას ", - განაცხადა გრიგოლ გოგელიამ.

29 დეკემბერს, საზოგადოებრივი მაუწყებლის ბორდის სხდომაზე განიხილეს, უნდა გაეშვა თუ არა საზოგადოებრივ მაუწყებელს ეთერში დაკავებული და  ნასვამი ზვიად რატიანის ვიდეო? სამეურვეო საბჭოს თავმჯდომარის აზრით,  ვიდეოს გაშვებით მაუწყებელმა ადამიანის უფლებები დაარღვია. არხის გენერალური დირექტორი კი საპასუხოდ  აცხადებს, რომ ვიდეო სხვა მედიასაშუალებებმაც გაავრცელეს.

სადავო მასალა ეხება პოეტ ზვიად რატიანის დაკავებას. საზოგადოებრივმა მაუწყებელმა 27 დეკემბერს გამოაქვეყნა შინაგან საქმეთა სამინისტროს მიერ მიწოდებული ვიდეოკადრები, რომელზეც არაფხიზელ მდგომარეობაში მყოფი ზვიად რატიანია ასახული. 

საზოგადოებრივი მაუწყებლის წინააღმდეგ ქარტიაში განცხადება მწერლებმა და გამომცემლებმა შეიტანეს.

საქართველოს ჟურნალისტური ეთიკის ქარტიის საბჭოს გადაწყვეტილებით, საზოგადოებრივმა მაუწყებელმა ქარტიის პირველი და მეათე პრინციპები დაარღვია.

ქარტიის ცნობით, პირველი პრინციპი ჟურნალისტს სიზუსტის დაცვას ავალდებულებს, მეათე პრინციპის თანახმად კი, "ჟურნალისტმა პატივი უნდა სცეს ადამიანის პირად ცხოვრებას და არ შეიჭრას პირად ცხოვრებაში, თუ არ არსებობს განსაკუთრებული საზოგადოებრივი ინტერესი."

სადავო მასალა ეხება პოეტ ზვიად რატიანის დაკავებას. საზოგადოებრივმა მაუწყებელმა 27 დეკემბერს გამოაქვეყნა შინაგან საქმეთა სამინისტროს მიერ მიწოდებული ვიდეოკადრები, რომელზეც არაფხიზელ მდგომარეობაში მყოფი ზვიად რატიანია ასახული. 

გრიგოლ გოგელია