ზვიად რატიანის მხარდამჭერებმა საზოგადოებრივის წინააღმდეგ ეთიკის ქარტიას მიმართეს

ზვიად რატიანის მხარდამჭერებმა საზოგადოებრივი მაუწყებლის წინააღმდეგ ჟურნალისტური ეთიკის ქარტიას მიმართეს. საქმე ეხება შსს-ს მიერ საზოგადოებრივისთვის მიწოდებულ ვიდეოს, რომელშიც რატიანის დაკავების არასრული სცენაა ასახული.

განცხადების თანახმად საზოგადოებრივმა მაუწყებელმა დაარღვია ქარტიის პირველი (სიზუსტე) და მეათე (პირადი ცხოვრების ხელშეუხებლობა) პრინციპი, ვინაიდან "ზვიად რატიანმა დაკავებიდან იზოლატორში მოთავსებამდე პოლიციელებთან რამდენიმე საათი დაჰყო, როცა მისი თქმით, ისინი მას აყენებდნენ შეურაცხყოფას და ფიზიკურად უსწორდებოდნენ (ის, რომ ზვიად რატიანი ნაცემია, დამტკიცებულია რამდენიმე სამედიცინო ექსპერტიზით). ამ რამდენიმე საათიდან დამონტაჟებულია 3.45 წუთიანი მასალა, რომელიც არ შეიძლება იყოს რამდენიმესაათიანი პროცესის ზუსტად ამსახველი", - ნათქვამია განცხადებაში და იქვე აღნიშნულია, რომ "ამ მასალის ჩვენებით საზოგადოებრივმა მაუწყებელმა დააკმაყოფილა არა საზოგადოების ინტერესი, მიეღო ზუსტი ინფორმაცია, არამედ შინაგან საქმეთა სამინისტროს ინტერესი - ზვიად რატიანი წარმოჩენილიყო უაღრესად დამამცირებელ ვითარებაში."

მეათე პრინციპთან დაკავშირებით კი განმცხადებელები აღნიშნავენ, რომ ზვიად რატიანის მიმართ "არ არსებობს ისეთი საზოგადოებრივი ინტერესი, რომელიც დამამცირებელი და შეურაცხმყოფელი ვიდეოკადრების გავრცელებას გაამართლებს."

განცხადებას ხელს აწერენ:

ნინო ბექიშვილი, ნინო სადღობელაშვილი, თამთა მელაშვილი, ზაზა კოშკაძე, ხათუნა თავდგირიძე, დალილა გოგია, ზვიად კვარაცხელია, გვანცა ჯობავა, შოთა იათაშვილი, ნატო ინგოროყვა, გიორგი შონია, ნესტან ნენე კვინიკაძე, ლაშა ბუღაძე, ლექსო დორეული, მაიკო კუდავა, გიორგი მაისურაზე, მაშო სამადაშვილი, რატი ამაღლობელი, ზაალ ანდრონიკაშვილი, ნინია მაჭარაშვილი, თინა მამულაშვილი, ხათუნა ცხადაძე, თეონა დოლენჯაშვილი, ლაშა ბაქრაძე.

საქმის მიმართ არსებული მაღალი საზოგადოებრივი ინტერესიდან გამომდინარე ქარტიის საბჭო საქმეს 28 დეკემბერს 18:30 საათზე განიხილავს.

რატიანის მხარდამჭერებმა გუშინ სოციალურ ქსელში საზმაუს ბოიკოტი გამოუცხადეს.

ვიდეომასალა, რომლიც საზოგადოებრივმა მაუწყებელმა გამოაქვეყნა, ტელევიზიის ცნობით, მათ შსს-სგან გამოითხოვეს. მასში რატიანის დაკავების პროცესია ასახული.

მანამდე, რატიანის სასამართლო პროცესზე შსს-მ პოეტის დაკავების ამსახველი ვიდეოჩანაწერები წარადგინა, რომლებიც არა პატრულის სამხრე კამერებით, არამედ მობილურითაა გადაღებული. ზვიად რატიანის ადვოკატი კი ითხოვს, რომ შსს-მ რატიანის დაკავების ამსახველი, უწყვეტ რეჟიმში გადაღებული ვიდეომასალა წარმოადგინოს.

ზვიად რატიანი საპოლიციო კონტროლის ფარგლებში დააკავეს.