კალაძემ თბილისის გენგეგმის წარდგენის ვადის დასახელება დღის ბოლომდე მოითხოვა

თბილისის გენგეგმაზე მომუშავე ”სითი ინსტიტუტს” დედაქალაქის მერიამ ვადა დღის ბოლომდე მისცა, რომ მათ დაასახელონ გონივრული ვადა, თუ როდისთვის შეძლებენ სრულყოფილი დოკუმენტის წარდგენას. დღეს გამართულ ბრიფინგზე კახა კალაძემ განაცხადა, რომ ქალაქის განვითარების დოკუმენტი ჯერ კიდევ დაუსრულებელია. 

”მინდა მკაფიოდ ვთქვა, რომ გენგეგმის შესამუშავებლად არქიტექტურის სამსახურსა და ”სიტი ინსტიტუტს” შორის ხელშეკრულება ორი წლის წინ არის გაფორმებული, გაწეულია მნიშვნელოვანი სამუშაოები. მისი ნაწილი რეალური და გამოსადეგია ქალაქის განვითარებისათვის, თუმცა დოკუმენტი ჯერ კიდევ დაუსრულებელია და მთელი რიგი მიმართულებით საფუძვლიანი სამუშაოებია გასაწევი, რათა ამ სახით გენგეგმის მიღებამ მომავალში დამატებითი პრობლემები არ შეუქმნას ჩვენ ქალაქს. კონტრაქტორ კომპანიას ხელშეკრულების პირობების გათვალისწინებით რამდენჯერმე ეცნობა ჩვენი პოზიცია. თუმცა, სამწუხაროდ გენგეგმის მეექვსე დასკვნითი დოკუმენტი ჯერ კიდევ ვერ აკმაყოფილებს მოთხოვნილ სტანდარტებს. 

ხელშეკრულების თანახმად ჩვენ სწორედ დღეს გვეწურება ვადა, მივიღოთ გადაწყვეტილება მიიღებს თუ არა თბილისის მერია ”სიტი ინსტიტუტის” მიერ შემუშავებულ გენერალურ გეგმას, მის დასკვნით დოკუმენტს. ვაცნობიერებთ რა გენგეგმის მნიშვნელობას ჩვენი ქალაქისთვის, ჩვენ ვერ მივცემთ საკუთარ თავს უფლებას დავუშვათ შეცდომა, წავიდეთ კომპრომისზე და მივიღოთ არასრულყოფილი დოკუმენტი. ჩვენ ვითვალისწეინებთ ფაქტობრივ მოცემულობას და იმ სამუშაოებს, რომელიც უკვე გასწია კომპანიამ ამ პროცესში. პირადად ჩემთვის და ჩემი თანაგუნდელებისთვის და ზოგადად ქალაქისთვის ძალიან მნიშვნელოვანია ამ დოკუმენტის მიღება. ყველაფრის გათვალისწინებით, კიდევ ერთხელ ვაძლევთ მათ შესაძლებლობას საკუთარი რესურსების გათვალისწინებით დღის ბოლომდე წარმოადგინონ გონივრული ვადა, თუ როგორ და რა ვადებში შეძლებენ ამ დოკუმენტის სრულყოფას. ჩვენი მხრივ, მერია და მერიის მთელი სამსახურები სრულ მზადყოფნას ვაცხადებთ მათთან კონსტრუქციული თანამშრომლობისთვის, რათა იქნას მიღებული მიწათსარგებლობის გენერალური გეგმა”, - განაცხადა კახა კალაძემ.

25 დეკემბერს თბილისის მერიამ გენგეგმის ჯგუფი 145 600 ლარით დააჯარიმა და ხარვეზების გამოსასწორებლად 10-დღიანი ვადა მისცა. თბილისის მიწათსარგებლობის გენერალურ გეგმაზე მუშაობა 2015 წელს დაიწყო. კომპანია „სითი ინსტიტუტი საქართველო“ მერიის ყოფილმა ხელმძღვანელობამ კონკურსის წესით შეარჩია და ქალაქის მთავარი დოკუმენტის შესაქმნელად 2 800 000 ლარი გამოყო. 

თბილისის განვითარების გენერალური გეგმის პროექტი, რომელიც 2030 წლამდეა გაწერილი, მერიას 18 ივნისს ჩაჰბარდა. მისი შემქმნელების თქმით, ეს დოკუმენტის სამუშაო ვერსიაა და მნიშვნელოვანია პროცესში მოქალაქეთა ჩართვა. თბილისის ახალარჩეული მერმა უკვე დასრულებული გენგეგმა თავიდან შესასწავლად სპეციალურ ჯგუფს გადასცა.