შალვა პაპუაშვილი: ქვეყნის გადატრიალებას ვერ შეძლებენ, ამის გარანტორი ბიძინა ივანიშვილი და „ქართული ოცნებაა“ - მე მგონი, რადიკალური ოპოზიცია საკონსტიტუციო სასამართლოსაც დაასწრებს და თვითლიკვიდაციას გამოაცხადებს

მე მგონი რადიკალური ოპოზიცია საკონსტიტუციო სასამართლოსაც დაასწრებს და თვითლიკვიდაციას გამოაცხადებს, - განაცხადა გადაცემაში „იმედი LIVE“ საქართველოს პარლამენტის თავმჯდომარემ.

შალვა პაპუაშვილი ოპოზიციურ ალიანსში არსებულ დაპირისპირებას გამოეხმაურა.

„მერე შეეცდებიან აქედან კიდევ გამოძრომას, უცხოელები ტალახს ჩამოაცილებენ, გაათეთრებენ, ხელს ჩამოართმევენ, რომ ქართველებს აჩვენონ, რომ მისაღები ხალხია. ხომ ვხედავთ სინამდვილეში რა ცირკთან, რა ადამიანებთან გვაქვს საქმე, მათ შორის მიხეილ სააკაშვილს მისი ახალი ვარცხნილობით რომ ვაკვირდებით, ესენი არიან ემოციურად დაზიანებული ადამიანები, რომლებიც მათი ტრავმების პროეცირებას ახდენენ ჩვენ ქვეყანაზე. მათი ტრავმების მსხვერპლი ვართ ამხელა საზოგადოება, რომ რაღაც ტრავმები ვერ გადაუხარშავთ, არ ვიცი ბავშვობის თუ ზრდასრულობის ასაკის და მათი დაზიანებული ემოციური ყოფა უნდა ავიტანოთ და რატომ, იმიტომ, რომ თათი აქვთ დადებული ბრიუსელიდან, რომ აბა თითი არ დააკაროთ ამათ, ესენი ჩვენი ემისრები არიანო“, - აღნიშნა მან.

პაპუაშვილმა ასევე უპასუხა კითხვას - რას ვერ იყოფენ ეს ადამიანები და რა შემთხვევაში უწერია რევოლუციაზე ოპოზიციის ოცნებას ახდენა, რა ფაქტორები უნდა დალაგდეს?

„დათა თუთაშხიაშია“ მომენტი, ვირთხების მჭამელ ვირთხაზე და სინამდვილეში ეს არის პროცესი, როდესაც ვირთხები ერთმანეთს უნდა დაერიონ, რომ გამოჩნდეს ვინ არის უფრო ძლიერი მათ შორის, რომელსაც შემდეგ მისი პატრონი გამოიყენებს იმისთვის, რომ ინადიროს. არანაირი ფაქტორი არ დალაგებდა, ამ ცის კაბადონზე ვარსკვლავები არასდროს არ იქნება ისე, რომ მათ შეძლონ ამ ქვეყნის გადატრიალება და ამის გარანტორი ბიძინა ივანიშვილი და „ქართული ოცნებაა“. ეს აბრაზებთ, 14 წელია ეჯაჯგურებიან ამ ქვეყანას, რომ რამენაირად ამოატრიალონ ხელისუფლება და დააბრუნონ ისევ ის მარიონეტები და ვერაფერი მოუხერხეს. ჩვენმა ქვეყანამ დანის პირზე ბევრჯერ გაიარა, მათ შორის გაიარა იმიტომ, რომ ბიძინა ივანიშვილი არის ის ადამიანი, რომელმაც ყოველგვარი ლოგიკის საწინააღმდეგოდ, 2012 წელს, როდესაც მთელი დასავლური ისტებლიშმენტი, რომელიც მიხეილ სააკაშვილს ტაშს ურეკავდა, როდესაც ციხეში ხალხს აწამებდნენ და ხოცავდნენ, ეს ადამიანი ცხვირწინ ააცალა და დაამარცხა. ასე რომ მნიშვნელოვანია ის, რომ ამის გარანტორი ბიძინა ივანიშვილი, „ქართული ოცნება“ და ქართველი ხალხია, რომელიც საქართველოს ხელისუფლებას ზურგს უმაგრებს“, - განაცხადა შალვა პაპუაშვილმა.