საქართველო შავი ზღვის ეკონომიკური თანამშრომლობის საპარლამენტო ასამბლეის 67-ე სესიას მასპინძლობს

საქართველოში შავი ზღვის ეკონომიკური თანამშრომლობის საპარლამენტო ასამბლეის (PABSEC) რიგით 67-ე გენერალური ასამბლეა იმართება. საპარლამენტო ფორუმის მთავარი თემაა: „ხელოვნური ინტელექტის როლი რეგიონული თანამშრომლობის ხელშეწყობის მიმართულებით: ინოვაცია, დაკავშირებადობა და მდგრადი განვითარება შავი ზღვის რეგიონში“.

შავი ზღვის ეკონომიკური თანამშრომლობის ორგანიზაციის წევრი ქვეყნების 100-ზე მეტი დელეგატი საპარლამენტო ფორუმზე წარმოდგენილ მოხსენებებს განიხილავს და შესაბამის რეკომენდაციებს მიიღებს. მიმდინარე პერიოდში საქართველო ორგანიზაციის თავმჯდომარე ქვეყანაა.

შავი ზღვის ეკონომიკური თანამშრომლობის საპარლამენტო ასამბლეის ბიუროს 72-ე და მუდმივმოქმედი კომიტეტის სხდომაზე, ორგანიზაციის წევრი ქვეყნების საპარლამენტო დელეგაციების ხელმძღვანელებმა მიმდინარე სესიის დღის წესრიგის საკითხები განიხილეს და მომავალი შეხვედრების ადგილები და თარიღები განსაზღვრეს.

შავი ზღვის ეკონომიკური თანამშრომლობის საპარლამენტო ასამბლეის ბიუროს და მუდმივმოქმედი კომიტეტის სხდომას საქართველოს პარლამენტის თავმჯდომარე შალვა პაპუაშვილი, როგორც საპარლამენტო ასამბლეის პრეზიდენტი, გაუძღვა.

„მნიშვნელოვანია, რომ საქართველოს თავმჯდომარეობის პერიოდში ასამბლეა აქტიურად წარმართავდა თავის საქმიანობას და მე, როგორც ასამბლეის პრეზიდენტს, რამდენიმე საპარლამენტო ღონისძიებაში ასამბლეის სახელით მომიწია მონაწილეობის მიღება. ვფიქრობ, ამით, გარკვეულწილად, გავამდიდრეთ და გავააქტიურეთ ასამბლეის მუშაობა. შემდეგ ეტაპზე ასამბლეის პრეზიდენტობა საბერძნეთს გადაეცემა“, - განაცხადა შალვა პაპუაშვილმა.

შავი ზღვის ეკონომიკური თანამშრომლობის საპარლამენტო ასამბლეის რიგით 67-ე გენერალური ასამბლეა 30 ივნისს კასპის მუნიციპალიტეტის სოფელ მეფისქალაქში, საქართველოს პარლამენტის თავმჯდომარის, შალვა პაპუაშვილის და ჩრდილოეთ მაკედონიის რესპუბლიკის ასამბლეის პრეზიდენტის, აფრიმ გაშის მისასალმებელი სიტყვებით გაიხსნება.

შავი ზღვის ეკონომიკური თანამშრომლობის საპარლამენტო ასამბლეაში საქართველოს პარლამენტის მუდმივმოქმედ დელეგაციას პარლამენტის ეკონომიკური პოლიტიკის კომიტეტის თავმჯდომარის პირველი მოადგილე ირაკლი მეზურნიშვილი ხელმძღვანელობს.

შავი ზღვის ეკონომიკური თანამშრომლობის საპარლამენტო ასამბლეა შავი ზღვის რეგიონის უმნიშვნელოვანეს საპარლამენტო პლატფორმას წარმოადგენს, რომელიც წევრ სახელმწიფოებს შორის პოლიტიკური დიალოგის, ეკონომიკური თანამშრომლობისა და რეგიონული სტაბილურობის განმტკიცებას უწყობს ხელს. შავი ზღვის ეკონომიკური თანამშრომლობის ორგანიზაცია 13 წევრი სახელმწიფოსგან შედგება: ალბანეთი, სომხეთი, აზერბაიჯანი, ბულგარეთი, საქართველო, საბერძნეთი, მოლდოვა, ჩრდილოეთ მაკედონია, რუმინეთი, რუსეთი, სერბეთი, თურქეთი და უკრაინა. 6 ქვეყანას - ბელარუსს, ეგვიპტეს, ისრაელს, საფრანგეთს, გერმანიასა და სლოვაკეთს ორგანიზაციის დამკვირვებელი წევრის სტატუსი აქვს.