თბილისის მერია უახლოეს წლებში 700-მდე ახალ ავტობუსს შემოიყვანს

თბილისის მერია მომდევნო წლებში 700-მდე ახალი ავტობუსის შემოყვანას გეგმავს, - ამის შესახებ სააგენტო ipn თბილისის მერის მოადგილე მაია ბითაძეზე დაყრდნობით წერს. მისი თქმით, ძველ ავტობუსებს ჩაანაცვლებენ და დედაქალაქის ავტოპარკს შეავსებენ, რითაც თბილისში მოძრაობა საგრძნობლად განიტვირთება. 

„ყველამ ვიცით რა მიზეზით იგვიანებს ტრანსპორტი - ეს უმეტესწილად საცობების ბრალია. ჩვენი მთავარი პრიორიტეტი საზოგადოებრივი ტრანსპორტის კომპლექსური მოწესრიგებაა. ეს საკითხი თავის თავში გულისხმობს რამდენიმეპუნქტიან გეგმას, რომელსაც ჩვენ საზოგადოებრივი ტრანსპორტის მოწესრიგების მიზნით განვახორციელებთ. საზოგადოებრივი ტრანსპორტით გადაადგილება კომფორტული და ხელმისაწვდომი უნდა იყოს თბილისის მცხოვრებთათვის - ეს ჩვენი უპირველესი საზრუნავია“, - განაცხადა ბითაძემ. 

მისივე თქმით, უნდა შეიქმნას შესაბამისი ინფრასტრუქტურა და მოეწყოს ცალკე სავალი ხაზები, სადაც მხოლოდ საზოგადოებრივ ტრანსპორტს ექნება გადაადგილების საშუალება. ეს ტრანსპორტის მოძრაობას გაცილებით მოაწესრიგებს. თბილისის მერის მოადგილის თქმით, მეტროპოლიტენის მუშაობაც გაუმჯობესდება. 

"დედაქალაქის ბიუჯეტის დიდი ნაწილი უნდა მივმართოთ მეტროს რეაბილიტაციისათვის, რაც ვაგონების გადაადგილებას დააჩქარებს და სამგზავრო დროის ინტერვალს შეამცირებს. გეგმები, რომელიც მერიას აქვს დასახული მომდევნო 4 წლის განმავლობაში, ტრანსპორტის მოძრაობის განტვირთვას და გაუმჯობესებას ითვალისწინებს. ავტოპარკის განახლება ამ პრობლემის მოგვარების მთავარი გზაა“, - განაცხადა ბითაძემ.