ნინო წილოსანი გაეროში ევროკავშირის ელჩის განცხადებაზე: ერთადერთი თვითნებური, რაც იყო, ეს იყო ევროკავშირის რიგი ფონდების დაფინანსება, რომელიც საქართველოში თვითნებურად მოედინებოდა და იმ არეულობებს აფინანსებდა, რომელთა შედეგად დაკავებულების დაცვას ახლა ისინი ცდილობენ

ერთადერთი თვითნებური, რაც იყო, ეს იყო ევროკავშირის რიგი ფონდების დაფინანსება, რომელიც საქართველოში თვითნებურად მოედინებოდა და იმ არეულობებს აფინანსებდა, რომელთა შედეგად დაკავებულების დაცვას ახლა ისინი ცდილობენ, - ასე ეხმაურება საქართველოს პარლამენტის თავმჯდომარის მოადგილე ნინო წილოსანი, გაეროში ევროკავშირის ელჩის განცხადებას, რომ გმობს საქართველოში თვითნებურ დაკავებებსა და მზარდ რეპრესიებს.

ნინო წილოსანის თქმით, მსგავსი განცხადებების მიზანია იმ პირების გამხნევება, რომლებიც კვლავ არიან გარე ძალების გავლენების ზემოქმედების ქვეშ.

„იმ ფონზე, როდესაც ძალადობრივი აქციის მონაწილეებიდან ბევრმა გაათვითცნობიერა, რომ სრულებით აბსურდულ პროცესში მიიღო მონაწილეობა, მათ შეწყალება ითხოვეს და თავისუფლებაზე არიან გამოსული, ყველა სხვა დანარჩენის შესაგულიანებლად ვინც ჯერ კიდევ მათი გადმოსახედიდან მყარად არის იმ გარე გავლენების ზემოქმედების ქვეშ, რომელიც მათ საპატიმროში აჩერებს, რა თქმა უნდა გარედან ისევ განცხადებები უნდა წააშველონ. ის, რომ ევროკავშირის ელჩმა გაეროში მოიცალა იმისთვის, რომ საქართველოზე ასეთი დეზინფორმაციები ავრცელოს, რა თქმა უნდა თავად ევროკავშირის ინსტიტუციების გარკვეულ დეგრადაციაზე მიუთითებს. და მით უმეტეს, როდესაც დადასტურებულად ტყუილზე საუბრობს, თავისთავად იკვეთება რიგი ბიუროკრატების ინტერესი, რომ როგორღაც გაამართლონ თავისი თვითნებური დაფინანსებები საქართველოში და გაამართლონ ამ აგრესიული დაფინანსებების შედეგად დაპატიმრებული ადამიანების ციხეში ყოფნა“, - განაცხადა ნინო წილოსანმა.