საგარეო უწყება ცხინვალის სამხედრო შენაერთების რუსეთის არმიაში შესვლას ეხმაურება

ოკუპირებული ცხინვალის რეგიონის უკანონო სამხედრო დაჯგუფებების რუსეთის შეიარაღებული ძალების შემადგენლობაში გაერთიანების თაობაზე ე.წ. შეთანხმების რატიფიცირებას საგარეო საქმეთა სამინისტრო გამოეხმაურა.

უწყების მიერ გავრცელებულ განცხადებაში აღნიშნულია, რომ ეს წარმოადგენს საქართველოს აფხაზეთისა და ცხინვალის რეგიონების ფაქტობრივი ანექსიისაკენ მიმართულ მორიგ უკანონო ქმედებას რუსეთის ფედერაციის მხრიდან.

„საგარეო საქმეთა სამინისტრო გმობს ოკუპირებული ცხინვალის რეგიონის უკანონო სამხედრო დაჯგუფებების რუსეთის შეიარაღებული ძალების შემადგენლობაში გაერთიანების თაობაზე ე.წ. შეთანხმების რატიფიცირებას რუსეთის ფედერაციის სახელმწიფო დუმის მიერ, რომელიც 2018 წლის 24 იანვარს განხორციელდა. 

აღნიშნული წარმოადგენს საქართველოს აფხაზეთისა და ცხინვალის რეგიონების ფაქტობრივი ანექსიისაკენ მიმართულ მორიგ უკანონო ქმედებას რუსეთის ფედერაციის მხრიდან, რაც სრულად უგულებელყოფს საერთაშორისო სამართლის ფუნდამენტურ ნორმებსა და პრინციპებს.

საქართველოს ოკუპირებული რეგიონების რუსეთის ფედერაციის სამხედრო სისტემაში ინტეგრაციის გზით, მოსკოვი უხეშად არღვევს ევროკავშირის შუამავლობით 2008 წლის 12 აგვისტოს დადებულ ცეცხლის შეწყვეტის შეთანხმებას. კიდევ უფრო შემაშფოთებელია ის ფაქტი, რომ რუსეთის ფედერაცია კვლავ უარს აცხადებს, აიღოს და შეასრულოს ვალდებულება ძალის არგამოყენების შესახებ და მიზანმიმართულად უშლის ხელს ადგილზე უსაფრთხოების საერთაშორისო მექანიზმების შექმნას.

მსგავსი პროვოკაციული ნაბიჯებით რუსეთის ფედერაცია ცდილობს, ხელი შეუშალოს კონფლიქტის მშვიდობიან დარეგულირებას და ჟენევის საერთაშორისო მოლაპარაკებებში პროგრესის მიღწევას. მეტიც, რუსეთის ქმედებები ზიანს აყენებს ევროპის უსაფრთხოების არქიტექტურას და მიმართულია მთელს რეგიონში ვითარების დესტაბილიზაციისაკენ.

მოვუწოდებთ რუსეთის ფედერაციას, შეწყვიტოს პროვოკაციები, შეასრულოს თავისი საერთაშორისო ვალდებულებები და 2008 წლის 12 აგვისტოს ცეცხლის შეწყვეტის შეთანხმების ყველა პირობა, მათ შორის, თავისი სამხედრო შენაერთების საქართველოს ტერიტორიიდან გაყვანის თაობაზე.

მივმართავთ ასევე საერთაშორისო თანამეგობრობას, სათანადოდ შეაფასოს რუსეთის შორს მიმავალი აგრესიული პოლიტიკა და ქმედითი ზომები მიიღოს, რათა წინ აღუდგეს საქართველოს ოკუპირებულ რეგიონებში მიმდინარე უკანონო პროცესებს“, - აღნიშნულია სამინისტროს მიერ გავრცელებულ განცხადებაში. 

რუსეთის სახელმწიფო სათათბირომ დღეს ოკუპირებულ სამხრეთ ოსეთთან დადებული სამხედრო შეთანხმების რატიფიცირება მოახდინა, რომელიც ცხინვალის სამხედრო შენაერთების ნაწილის რუსეთის შეიარაღებული ძალების რიგებში შეყვანას გულისხმობს. შესაბამისი შეთანხმება 2017 წლის 31 მარტს მოეწერა ხელი. 

21 მარტს სეპარატისტული სამხრეთ ოსეთის დეფაქტო პრეზიდენტი ლეონიდ თიბილოვი და რუსეთის მმართველი ვლადიმერ პუტინი ერთმანეთს მოსკოვში შეხვდნენ. რუსული პრესის ცნობით, მათ ე.წ. სამხრეთ ოსეთის ზოგიერთი შენაერთის რუსეთის შეიარაღებულ ძალებში შესვლასთან დაკავშირებული ხელშეკრულება განიხილეს.

მაშინ საქართველოში, მმართველ გუნდში განაცხადეს, რომ მსგავს შეთანხმებებს იურიდიული ძალა არ აქვს და შესაბამისად, ვერანაირი შედეგი ვერ ექნება.