ბორჯომში მერიის 125 თანამშრომელი ხელფასის გარეშეა დარჩენილი

ქართული ოცნების დეპუტატები ბორჯომის საკრებულოს სხდომებზე არ ცხადდებიან, ოპოზიცია კი მერიას საშტატო ნუსხასა და ხელფასების გაზრდილ ოდენობას არ უმტკიცებს, რის გამოც მერიის 125 საჯარო მოსამსახურეს იანვარში ხელფასი არ აუღია. ამის შესახებ droa.ge წერს.

ბორჯომის საკრებულოს პირველივე სხდომაზე ყველა თანამდებობა ოპოზიციიდან არჩეულმა დეპუტატებმა დაიკავეს, რის გამოც ქართული ოცნების დეპუტატები ბოიკოტის რეჟიმზე გადავიდნენ და საკრებულოს არცერთ სხდომას აღარ დასწრებიან. 

18 იანვარს ბორჯომის საკრებულომ მერიის მიერ შეთავაზებული საშტატო ნუსხა და ხელფასები არ დაამტკიცა. როგორც სხდომაზე დეპუტატებმა განმარტეს, წარდგენილ ცვლილებაში დაახლოებით 700-800 ლარით გაზრდილი იყო მერის, მისი მოადგილისა და სამსახურის უფროსების ხელფასები.

"მივესალმებით ხელფასების მომატებას იმ შემთხევაში, თუ ეს მომატება რიგით თანამშრომლებს შეეხებათ. თუმცა მერიის მიერ შემოთავაზებული ცხრილის მიხედვით, ხელფასები ემატებოდათ მხოლოდ მერს, მერის მოადგილეს, სამსახურის უფროსებს, დაახლოებით 700- 800 ლარით და რიგით თანამშრომლებს კი 20 ლარით. ჩვენ მივიღეთ გადაწყვეტილება, რომ ის თანხა, რაც მათ აქვთ ხელფასის სახით, დარჩეს იგივე. ახლა მთავარია ბორჯომში არსებული პრობლემები მოვაგვაროთ და შემდგომ უკვე ვიფიქროთ ხელფასის მომატებაზე. ხელფასის მომატება ჩვენც არ გვაწყენდა, თუმცა ჩვენ პრემია – დანამატებსა და ხელფასებზე უარი ვთქვით”, – განაცხადა საკრებულოს თავმჯდომარის მოადგილემ გიორგი გოგიჩაიშვილმა.

ბორჯომის საკრებულოს რიგგარეშე სხდომა 13 თებერვალს, 12:00 საათზეა დანიშნული. დეპუტატებმა 24 საკითხი უნდა განიხილონ, მათ შორის, ახალი საშტატო ნუსხა და ხელფასების ოდენობა. 

ბორჯომის საკრებულო ერთადერთი საკრებულოა საქართველოს მასშტაბით, სადაც უმრავლესობა ოპოზიციას აქვს. საკრებულოს 28 დეპუტატიდან 13 ქართულ ოცნებას, 15 კი ოპოზიციას წარმოადგენს. მათ შორის, 11 პატრიოტთა ალიანსის წევრია, 2 - ნაციონალური მოძრაობის, 1-1 კი ევროპული საქართველოს და ლეიბორისტული პარტიის წევრები არიან.