გედევან ფოფხაძე: ბორჯომის საკრებულოს ოპოზიციას მერის შანტაჟის გზით კონტროლი სურს

ბორჯომის მაჟორიტარი დეპუტატი გედევან ფოფხაძე ბორჯომის საკრებულოს კრიზისს ეხმიანება. მისი თქმით, "ქართული ოცნება" საკრებულოს პოლიტიკურ თამაშებში მონაწილეობას არ მიიღებს. ინფორმაციას 1tv ავრცელებს.

ფოფხაძის თქმით, საკრებულოს წევრებმა თავად უნდა გადაწყვიტონ თუ რა დამოკიდებულება ექნებათ იმ „ანტიოცნებურ“ კოალიციასთან, სადაც გაერთიანებულები არიან „ნაციონალური მოძრაობა“, „ევროპული საქართველო“, „პატრიოტთა ალიანსი“  და „ლეიბორისტული პარტია“.

"საკრებულოს წევრთა ჩვენი ნაწილი ამ მოცემულობას უბრალოდ აფიქსირებს. მათი პოზიციაა, რომ იმ საკრებულოში, სადაც კოალიციამ „ქართული ოცნება“ პოლიტიკური პროცესის მიღმა თავიდანვე გამოაცხადა, პასუხისმგებლობა  ყველა საკითხზე თავად აიღოს. თუ კომისიები და თანამდებობები გადაინაწილეს, პასუხისმგებლობებიც უნდა აიღონ. ხალხის მიერ არჩეულ მერსა და მის პოზიციას მხარს ვუჭერ, მაგრამ საკრებულოს პოლიტიკურ თამაშებში მონაწილეობას „ქართული ოცნება“ არ მიიღებს“, - თქვა ფოფხაძემ.

მაჟორიტარის განცხადებით, საკრებულოს ოპოზიციურ პარტიებს სურთ, რომ ბორჯომის მერის პოლიტიკა შანტაჟის გზით აკონტროლონ, რაზეც "ქართული ოცნება ვერ წავა".

ვიმედოვნებ, რომ საზოგადოების აზრის ზეწოლისა და იმ მოცემლობის გათვალისწონებით, რაც ბორჯომშია, საკრებულოში ადამიანები გამოჩნდებიან, რომელთა საღი აზრი უფრო იმძლავრებს და პოლიტიკურ თამაშებში მონაწილეობას არ მიიღებენ.  13 ადამიანს საკრებულოს მუშაობის რეჟიმში უთხრეს, რომ მათ არანაირი პოზიცია არ ექნებათ და  უბრალოდ კვორუმი უნდა შეავსონ. კვორუმის შესრულების როლს არცერთი პოლიტიკოსი და სუბიექტი არ აიღებს. თუ მივდივარ, ჩემი აზრიც უნდა იყოს გათვალისწინებული. მათი პოლიტიკური თამაშის ნაწილი ისიცაა, რომ კვორუმს თვიოთონ აგდებენ, რადგან 15 წარმომადგენელი ჰყავთ", - თქვა ფოფხაძემ.

დღეს პარლამენტის თავმჯდომარემ ბორჯომის საკრებულოს კრიზისთან დაკავშირებით განაცხადა, რომ ამ საკითხით დაინტერესდება და არც საქმეში ჩარევა გამორიცხა.

წელს ბორჯომის თვითმმარველობის 125 თანამშრომელს ჯერ ხელფასი არ აუღია. ამის მიზეზი კი ბორჯომის საკრებულოს მიერ საშტატო ნუსხისა და მერიის თანამდებობის პირთა ხელფასების გაზრდაზე ბორჯომის მერიის მოთხოვნის დაუკმაყოფილებლობაა.

ბორჯომის ახალმა საკრებულომ დღემდე ვერცერთი სხდომა ისე ვერ გამართა, რომ მას ყველა დეპუტატი დასწრებოდა. ბორჯომში საკრებულოს ბოიკოტს ქართული ოცნების დეპუტატებიც უცხადებენ.

ოპოზიცია კი, თავის მხრივ, მერიას საშტატო ნუსხასა და ხელფასების გაზრდილ ოდენობას არ უმტკიცებს.