ფოფხაძე: თუ კობახიძე ამბობს, რომ კონსტიტუცია კომპრომისებით პოლიტიკურ მოცემულობას მოერგო, ეს უნდა გვცოდნოდა

საპარლამენტო უმრავლესობის წევრი "ქართული ოცნებიდან" გედევან ფოფხაძე, თანაპარტიელის დავით ჭიჭინაძისა და პარლამენტის თავმჯდომარის ირაკლი კობახიძის მიერ, შრომის უსაფრთხოებასა და საქართველოს კონსტიტუციასთან დაკავშირებით გაკეთებულ განცხადებებს ეხმიანება. ინფორმაციას სააგენტო "ინტერპრესნიუსი" ავრცელებს.

გედევან ფოფხაძის თქმით, თუკი პარლამენტის თავმჯდომარე აცხადებს, რომ "კონსტიტუცია რაღაც კომპრომისების საფუძველზე რაღაც პოლიტიკურ მოცემულობას მოერგო, მინიმუმ ჩვენ ეს უნდა გვცოდნოდა".

ფოფხაძის განმარტებით,  თუ ეს კომპრომისი არის ადამიანის უფლებების საზიანოდ, ეს კომპრომისი არ უნდა გაკეთებულიყო.

“ჩვენ ყველა ერთად გიორგი კვირიკაშვილს დავარწმუნებდით, რომ ასეთი კომპრომისი არ უნდა გაკეთებულიყო, მაგრამ თუ ასეთ თემებზე ერთმანეთთან ორი ადამიანი დაიწყებს საუბარს და გუნდი ამაში მონაწილეობას არ მიიღებს, მაშინ ასეთი საუბრის დეტალების გასაჯაროებაც სწორი არ არის“, - განაცხადა გედევან ფოფხაძემ. 

შეკითხვაზე, რამდენად შესაძლებელია, რომ ჭიჭინაძის მიერ კობახიძის კრიტიკის გამო, უმრავლესობიდან დეპუტატის გარიცხვის საკითხი დადგეს, გედევან ფოფხაძე პასუხობს: "პარლამენტის თავმჯდომარე და დავით ჭიჭინაძეც არიან გუნდის წევრები. გუნდურობა მოითხოვს, როგორც დავით ჭიჭინაძის აზრის გათვალისწინებას, ასევე - ირაკლი კობახიძის. ჩვენ სტატუსიდან გამომდინარე, სხვადასხვა როლები გვაქვს, თუმცა გუნდის წევრები ვართ და არავინ არივის პოზიციას არ უნდა ერგებოდეს".

ფოფხაძის თქმით, გუნდში გუნდში არის მემარცხენე ორიენტაციის ძალები, რომლებიც შრომის ინსპექციის საკითხზე საკუთარ პოზიციას ყოველთვის აფიქსირებდნენ და დავით ჭიჭინაძის გარდა, ბევრია, ვისაც სხვა მოსაზრება აქვს. 

"თუკი საკონსტიტუციო კომისიის ფარგლებში ასეთი განსხავავებული პოზიციები იყო, ყველაზე სწორი იქნებოდა, საკითხი უმრავლესობასთან განხილვის საგანი გამხდარიყო. ჩვენ კონსტიტუციას როგორც კომპრომისის თემას ისე ვუყურებდით, რადგან 113 ხმის გარეშე ვერ ვიღებდით და ვიღაცას რაღაც უნდა დაგვეთმო და რაღაც შეღავათზე წავსულიყავით. თუ ამ 113-ს ერთი მანდატი დააკლდებოდა, კონსტიტუციას რეალურად ვეღარ იღებდი და თუ ვიღაცისთვის რაღაც თემა პრინციპულად მიუღებელი იქნებოდა, ბუნებრივია, ეს პოზიცია ვერ შეიცვლებოდა. რეალურად ჩვენ გვინდა, რომ სახელმწიფომ საკუთარი პოზიტიური ვალდებულება აამუშაოს იმ შემთხვევებში, როცა დასაქმებული საკუთარი უფლებების დაცვას ვერ ბედავს", - თქვა გედევან ფოფხაძემ. 

17 ივლისს დავით ჭიჭინაძე ირაკლი კობახიძის მიერ 16 ივლისს, შრომის უსაფრთხოების კანონპროექტის მიღებასთან დაკავშირებით გაკეთებულ განცხადებას გამოეხმაურა. "თუკი პარლამენტის თავმჯდომარე აღიარებს, რომ მან ისეთი კომპრომისები დაუშვა, რის გამოც ხალხია დახოცილი, მხოლოდ აღიარება საკმარისი არ არის - ეს წასულ კაცს კი არ უნდა მიაძახო, შენც უკან უნდა გაჰყვე და თანამდებობიდან გადადგე", - განაცხადა დავით ჭიჭინაძემ. 

მას პარლამენტის თავმჯდომარე ირაკლი კობახიძემ იმავე დღეს უპასუხა და თქვა, რომ დაგეგმილია სექტემბერში “შრომის უსაფრთხოების შესახებ“ კანონის შინაარსობრივი გადახედვა, ამაღლდება აღნიშნული კანონის სტატუსი და ის ორგანული კანონი გახდება. ამასთან, კობახიძე ამბობს, რომ ის, რაზეც დეპუტატმა დავით ჭიჭინაძემ ისაუბრა, არასწორი ინფორმაციაა.