პარლამენტში მოქალაქეობის შესახებ კანონში შესატან ცვლილებებზე იმსჯელეს

იურიდიულ საკითხთა კომიტეტის ორგანიზებით,  საქართველოს კონსტიტუციური კანონის პროექტის საფუძველზე შექმნილი სამუშაო ჯგუფის, პირველი შეხვედრა გაიმართა. ინფორმაციას საქართველოს პარლამენტი ავრცელებს.

შეხვედრაზე განიხილეს საქართველოს კონსტიტუციური კანონის პროექტიდან გამომდინარე „საქართველოს მოქალაქეობის შესახებ“ საქართველოს ორგანულ კანონში შესაძლო განსახორციელებელი ცვლილებები.

შეხვედრა იურიდიულ საკითხთა კომიტეტის თავმჯდომარემ, ეკა ბესელიამ გახსნა და იმ საკითხებზე ისაუბრა, რაც საფუძვლად დაედო სამუშაო ჯგუფის შექმნას.

„ჯგუფის შექმნის განმაპირობებელი გახდა საქართველოს კონსტიტუციის ცვლილება. კერძოდ, შეიცვალა მუხლის ფორმულირება, რომელიც საქართველოს მოქალაქეობის საკითხს არეგულირებდა. რამდენიმე შეხვედრაზე ჩემს კოლეგებთან საუბარი გვქონდა სხვა პრობლემურ საკითხებზეც. კომიტეტში, ასევ შემოვიდა საკანონმდებლო წინადადება, რომელიც საქართველოს მოქალაქეობის საკითხს შეეხება. მოხდა შეთანხმება, რომ საკანონმდებლო წინადადებაში წარმოდგენილი საკითხები ერთიან ჭრილში დაგვენახა და განგვეხილა სამუშაო ჯგუფის ფარგლებში“, - განაცხადა ეკა ბესელიამ.

საორგანიზაციო საკითხების გაცნობის შემდეგ, პრეზენტაცია წარადგინეს, რომელიც შეეხებოდა შემდეგ საკითხებს: ორმაგი მოქალაქეობის დაშვება, ორმაგი მოქალაქეობის რეგულირების მოდელის განსაზღვრა, ორმაგი მოქალაქეობის მინიჭების წესი, მოქალაქეობის დაკავშირებული ცალკეული საკითხების ცვლილება და სხვა. 

იურიდიულ საკითხთა კომიტეტის თავმჯდომარემ შეხვედრის მონაწილეებს გააცნო პირველადი კვლევის შედეგი იმასთან დაკავშირებით, თუ როგორ არის აღნიშნული საკითხები დარეგულირებული სხვა ქვეყნებში. 

როგორც ეკა ბესელიამ აღნიშნა, ცვლილებების შემუშავება უნდა მოხდეს საერთაშორისო სტანდარტების ჭრილში და ამავე დროს, გათვალისწინებული უნდა იყოს უსაფრთხოების საკითხები. 

პრობლემური საკითხების იდენტიფიცირების შემდეგ, იურიდიულ საკითხთა კომიტეტის თავმჯდომარემ, ეკა ბესელიამ სხვადასხვა უწყებების წარმომადგენლებს მიმართა, რომ მათ მომდევნო შეხვედრის გამართვამდე წარადგინონ პირველადი მოსაზრებები პრინციპულ საკითხებთან დაკავშირებით.

„თუ ჩვენ შემდეგ შეხვედრაზე პრინციპებზე შეთანხმებას მოვახერხებთ, უკვე დავიწყებთ წერის ეტაპს ანუ ფორმულირებებს, რაც უნდა მოერგოს ამ პრინციპებს“,-განაცხადა ეკა ბესელიამ.

შეხვედრას ესწრებოდნენ საქართველოს პარლამენტის წევრები, აღმასრულებელი ხელისუფლების და არასამათავრობო ორგანიზაციების წარმომადგენლები.

ამ ჯგუფმა ახალი საკანონმდებლო ინიციატივა უნდა მოამზადოს, რომელსაც შემდგომ დეპუტატები დასამტკიცებლად განიხილავენ. 

ჯგუფი დაკომპლექტებულია როგორც საკანონმდებლო, ისე აღმასრულებელი ხელისუფლების წარმომადგენლებით. დღევანდელი შეხვედრა იურიდიულ საკითხთა კომიტეტის ორგანიზებით გაიმართა.

26 სექტემბერს, საქართველოს პარლამენტმა ახალი კონსტიტუცია მესამე მოსმენით მიიღო, რითიც ქვეყანაში კონსტიტუციური რეფორმის ათთვიანი პროცესი დასრულდა.