რებეკა ჰარმსი: გავაკეთებ ყველაფერს, რომ საქართველომ არ დაკარგოს ვიზალიბერალიზაცია

ევროპარლამენტარმა რებეკა ჰარმსმა უვიზო რეჟიმთან დაკავშირებით ილაპარაკა და აღნიშნა, რომ არ აქვს ინფორმაცია ზუსტად რა გახდა ორი დღის წინ გერმანიაში ქართველების უკან გამობრუნების მიზეზი, თუმცა განაცხადა, რომ არავითარ შემთხვევაში საქართველომ არ უნდა დაკარგოს უვიზო რეჟიმი.

რებეკა ჰარმსი გამოეხმაურა ასევე გერმანიის ერთ-ერთი რეგიონის რაინვესტფალიის მოთხოვნასაც,  რომლის მთავრობაც ქართველებისთვის უვიზო რეჟიმის გაუქმებას ითხოვს და აღნიშნა, რომ ეს მისთვის მოულოდნელი იყო.

"ჩემთვის სიურპრიზი იყო, როცა რაინვესტფალიამ  ასეთი მოთხოვნა დააყენა, როგორც ჩანს გერმანიის ამ ნაწილში პრობლემა არსებობს. კონტაქტზე ვარ რაინვესტფალიის წარმომადგენელთან და აუცილებლად გავარკვევ, რა გახდა ამის საფუძველი. ამის შესახებ ვესაუბრე ქართველ კოლეგებსაც და ჩვენ გადავჭრით ამ პრობლემას, გააკეთებ ყველაფერს, რომ საქართველომ არ დაკარგოს ის სიკეთეები, რომელიც მისთვის მოაქვს უვიზო რეჟიმს, რადგან უვიზო რეჟიმი არის ჩვენი ერთობლივი მიღწევა და ეს ეხმარება ადამიანებს რომ დაუახლოვდნენ ერთმანეთს, საქართველო დაუახლოვდეს ევროპას და განსაკუთრებით ჩემს ქვეყანას, გერმანიას, ვფიქრობ ეს იყო წარმატება რომელსაც მივაღწიეთ ასოცირების ხელშეკრულების ფარგლებში და ჩვენ ვიპოვით გამოსავალს და საქართველო არ დაკარგავს უვიზო რეჟიმს,“ - განაცხადა ევროპარლამენტარმა, გერმანელმა რებეკა ჰარმსმა.

მანამდე იუსტიციის მინისტრმა თეა წულუკიანმა საქართველოს მოქალაქეებს მიმართა და სთხოვა ევროპასთან უვიზო რეჟიმის პირობები არ დაარღვიონ. მინისტრი გერმანიის აეროპორტიდან 19 ქართველის გამობრუნებას გამოეხმაურა.

"სამწუხაროდ, ჩვენი ქვეყნის არაერთი მოქალაქე არაკეთილსინდისიერად იყენებს იმ უდიდეს მიღწევას, რასაც შენგენის სივრცეში საქართველოს მოქალაქეებისთვის უვიზო მიმოსვლის რეჟიმი ჰქვია. შემიძლია, ვივარაუდო, რომ გამობრუნებული პირები სწორედ არიან იმ მიზეზით გამობრუნებული, რომ მათ გერმანელი, თუ სხვა ევროპელი მესაზღვრეები ვერ დაარწმუნეს, რომ კეთილი მიზნებისთვის ცდილობდნენ შენგენის სივრცეში შეღწევას.შემიძლია, კიდევ ერთხელ მოვუწოდო ჩვენი ქვეყნის თითოეულ მოქალაქეს, რომ ნუ გავწირავთ ქვეყნის უდიდეს მიღწევას, მე ვიტყოდი, ისტორიულ მიღწევას, რასაც ევროპასთან უვიზო რეჟიმი ჰქვია. მოვუფრთხილდეთ, რადგან ასეთი მიღწევები მრავალი თაობის შრომის შედეგია და ჩვენი ქვეყნის ხელის წამოკვრით ნუ მოვეპყრობით ძალიან დიდ წარმატებას. მე ეს ადრეც ვთქვი და ჩემთვის გაუგებარი კრიტიკა დავიმსახურე, რომ რამდენიმე არაკეთილსინდისიერი ადამიანის ქცევამ, შეიძლება მოიტანოს – მეთქი ქვეყნისთვის არასასურველი შედეგი. დღევანდელი ახალი ამბავიც ამას ადასტურებს. მათ შორის გერმანიის ერთ-ერთი ფედერალური ხელისუფლებისადმი მიმართვები, რომ მათ აქვთ იმის აღქმა, საქართველოს მოქალაქეები კარგად არ იქცევიან და შესაბამისად, შეიძლება გარკვეული ზომების მიღებაც მოითხოვონ. ამიტომ, გავფრთხილდეთ და დავიცვათ ის კანონი, რომელი ქვეყნის სივრცეში შეღწევასაც ვცდილობთ", - განაცხადა თეა წულუკიანმა.

14 თებერვალს ქუთაისი-მენინგემის ავიარეისის რამდენიმე მგზავრი გერმანიის ტერიტორიაზე არ შეუშვეს. გერმანიაში შესვლაზე ბორტზე მყოფ 19 მგზავრს საბუთებში არსებული პრობლემების გამო უარი უთხრეს.