მახარობლიშვილი: საქართველოსთან უვიზო რეჟიმის შეჩერება ევროკავშირის დღის წესრიგში არ დგას

საქართველოსთან უვიზო რეჟიმის შეჩერება ევროკავშირის დღის წესრიგში არ დგას. ამის შესახებ საგარეო საქმეთა მინისტრის მოადგილემ ვახტანგ მახარობლიშვილმა Deutsche Welle-ს მიერ გამოქვეყნებული სტატიის პასუხად განაცხადა, რომელშიც წერია, რომ ევროკავშირმა შესაძლოა საქართველოსთან უვიზო რეჟიმი შეაჩეროს. ინფორმაციას სააგენტო "ინტერპრესნიუსი" ავრცელებს.

ვახტანგ მახარობლიშვილის განმარტებით, თავშესაფრის უსაფუძვლოდ მოთხოვნებთან და ამ პროცედურების დარღვევებთან დაკავშირებით, საქართველოს ხელისუფლება კონკრეტულ ქმედებებს ახორციელებს. მისი თქმით, შესაბამისი უწყებების მხრიდან ასევე მიმდინარეობს აქტიური საინფორმაციო კამპანია, ისევე როგორც, საკანონმდებლო ცვლილებების კუთხით განხილვები.

"მნიშვნელოვანია აღინიშნოს, რომ კიდევ უფრო გააქტიურდა მუშაობა, როგორც ევროკავშირის სააგენტოებთან, ასევე მის წევრ ქვეყნებთან, მათ შორის გერმანიის ფედერაციულ რესპუბლიკასთან.  არა მარტო გერმანიაში, აქტიური თანამშრომლობა მიდის სხვა წევრ ქვეყნებთანაც. განსაკუთრებით, იმ ქვეყნებთან რომლებთანაც ბოლო თვეების განმავლობაში გარკვეული პრობლემატიკა გამოიკვეთა", - ამბობს მინისტრის მოადგილე და დასძენს, რომ ქართული მხარის მიერ გაწეულ ღონისძიებებს ევროკავშირის წევრები ქვეყნები პოზიტიურად აფასებენ.

"გარდა იმ ძალისხმევისა, რომელიც ქართული მხარის მიერ იქნა გაწეული ამ პერიოდის განმავლობაში, რა თქმა უნდა, თავის მხრივ ევრიკავშირის წევრმა ქვეყნებმა გარკვეული ზომები მიიღეს. მათ შორის ქვენების ნაწილმა საქართველო აღიარა, როგორც უსაფრთხო ქვეყნად. მათ შორის, შეიძლება ითქვას გერმანია, რომელიც მომავალში აპირებს საქართველო უსაფრთხო ქვეყნების სიაში შეიყვანოს, მაგრამ უკვე შეამცირა პერიოდი იმ პროცედურების განხილვისთვის, რომელიც საჭიროა უსაფრთხო ანუ თავშესაფრის სტატუსის მაძიებლის დამტკიცების თუ დადასტურების პირობებში.

თავშესაფრით დაკმაყოფილება პრატქიკულად არ ხორციელდება ევროკავშირის მხრიდან, რადგან საქართველო შენგენის ზონის სივრცეში მიჩნეულია, როგორც უსაფრთხო ქვეყანა. მინდა კიდევ ერთხელ ვისარგებლო შემთხვევით და მოვუწოდო საქართველოს მოსახლეობას, გაუფრთხილდეს ამ მონაპოვარს, რომელიც ჩვენს ქვეყანას გააჩნია და ბოროტად არ გამოიყენოს უვიზო რეჟიმი და არ დაარღვიოს მისი წესები“, – განაცხადა ვახტანგ მახარობლიშვილმა.

დღეს Deutsche Welle-მ გამოქვეყნა სტატია, რომელშიც წერს, რომ ევროკავშირმა შესაძლოა საქართველოსთან უვიზო რეჟიმი შეაჩეროს. ამის მიზეზად კი თავშესაფრის მაძიებელი საქართველოს მოქალაქეების რაოდენობის ზრდას ასახელებს. 

საქართველოსთვის ვიზალიბერალიზაციის შეჩერების მექანიზმის შესაძლო ამოქმედებასთან დაკავშირებული პრობლემა დღის წესრიგში ევროკომისიის დასკვნის შემდეგ დადგა.

საქართველო შენგენის ზონის ქვეყნებთან უვიზო რეჟიმით 2017 წლის 28 მარტიდან სარგებლობს. საქართველოს მოქალაქეებს ევროკავშირის წევრ 27 სახელმწიფოში და რამდენიმე არაწევრ ქვეყანაში შესვლა და 90 დღით გაჩერება, ვიზის გარეშე შეუძლიათ.