სახელმწიფო აუდიტის დასკვნას თბილისის მერი ეხმიანება

სახელმწიფო აუდიტის სამსახურმა 2015-2016 წლებში თბილისის მუნიციპალიტეტის „გამწვანების ღონისძიებების პროგრამის“ ფარგლებში გაწეული ხარჯების შესაბამისობის აუდიტი ჩაატარა. აუდიტის შედეგად გამოვლინდა დარღვევა-ნაკლოვანებები. ამაზე კომენტარი გააკეთა თბილისის მერმა.

""ეს დასკვნა ადასტურებს, რომ მერია მიდის სწორი მიმართულებით და რეფორმების განხორციელება, რომელიც ჩვენ წამოვიწყეთ კონკრეტულად ეკოლოგიის და გამწვანების მიმართულებით, ეს არის სწორი ნაბიჯები, ჩვენი ერთ-ერთი პრიორიტეტია ეფექტიანად დაიგეგმოს და განხორციელდეს გამწვანების ღონისძიებები და მიზნობრივად დაიხარჯოს თითოეული თეთრი, რაც სახელმწიფო ბიუჯეტიდან კონკრეტულად ამ მიმართულებით გამოიყოფა. გასულ კვირას მთავრობის სხდომაზე დავამტკიცეთ იმ ხეთა სახეობები, რომლითაც გალამაზდება ჩვენი დედაქალაქი, ეს გადაწყვეტილება აღარავის მისცემს ლავირების და გამწვანების საკუთარ გემოვნებასა და ინტერესზე მორგების საშუალებას. არ უნდა დავივიწყოთ, რომ გამწვანება საკმაოდ რთული და სპეციფიკური მიმართულებაა და მისი ღონისძიებები მხოლოდ დარგვით არ შემოიფარგლება, თითოეულ ნარგავს სჭირდება მოვლა-პატრონობა, რათა შედეგი იყოს რეალურად გამწვანებული გარემო. ჩვენ უკვე განვახორციელეთ მთელი რიგი სამართლებრივი და ინსტიტუციური ცვლილებები, დღეს დედაქალაქის საკრებულო ამტკიცებს შესაბამის აქტებს, ხოლო გუშინ მთავრობამაც შეიტანა შესაბამისი ცვლლებები დადგენილებაში," განაცხადა კალაძემ.

სახელმწიფო აუდიტის დასკვნაში საუბარია მერიის საკუთრებაში არსებული უძრავი ქონების მართვისა და განკარგვის დროს გამოვლენილ დარღვევებზეც. 

მერიის საკუთრებაში არსებული უძრავი ქონების მართვასა და განკარგვას - აუდიტის სამსახურის ანგარიშში საქართველოს ყოფილი მთავარი პროკურორის ოთარ ფარცხალაძის კომპანიაც მოხვდა. საუბარია ფარცხალაძის კომპანიისთვის მიწის გადაცემის თემაზე. ანგარიშში ხაზგასმითაა აღნიშნული, რომ ერთ-ერთ აუქციონში მონაწილეობა მხოლოდ „ბი ეს არ - სი დი ჯი დეველოპმენტმა“ მიიღო და ამ ფაქტთან მიმართებით გარკვეული ეჭვია გამოთქმული.

შესასრულებელ ვალდებულებებს მერიამ დაამატა „მომიჯნავე საკადასტრო ერთეულთან გაერთიანების“ პირობა. პასუხისმგებელი პირის განმარტებით, ამ პირობის დაწესება გამოწვეულია იმ გარემოებით, რომ მოცემული მიწის ნაკვეთი მდებარეობდა ქაოსურად რეგისტრირებულ არეალზე. იმის გათვალისწინებით, რომ საპრივატიზებო ფართზე განთავსებული იყო კოსმოფიზიკური ობსერვატორია, აუდიტის ჯგუფმა ვერ მოიპოვა მტკიცებულებები, თუ რატომ იყო შეუძლებელი პრივატიზებული ფართის დამოუკიდებლად განვითარება და შესაბამისად, რამდენად მიზანშეწონილი იყო შემზღუდავი პირობის დაწესება. გამოცხადებული აუქციონი ჩატარდა უკონკურენტო გარემოში და მონაწილეობა მიიღო მხოლოდ შპს ბი ეს არ - სი დი ჯი დეველოპმენტმა, რომელმაც შეიძინა ეს ქონება, ღირებულებით - 975.4 ათასი ლარი.

"აუდიტის შედეგად გამოვლენილ დარღვევა-ნაკლოვანებებთან დაკავშირებით გაცემულია შესაბამისი რეკომენდაციები“, - ნათქვამია სახელმწიფო აუდიტის სამსახურის ანგარიშში.