ირაკლი კობახიძე: მუხტარლის საქმე ჩვენთვისაც მნიშვნელოვანია

მუხტარლის საქმე არის ერთ-ერთი უმნიშვნელოვანესი საქმე, ჩვენთვისაც მნიშვნელოვანია, გაირკვეს რა მოხდა, როგორ მოხდა და აქედან გამომდინარე, პარლამენტი ამ მიმართულებით განსაკუთრებით დაინტერესებულია, – ამის შესახებ პარლამენტის თავმჯდომარემ ირაკლი კობახიძემ განაცხადა. ინფორმაციას 1tv ავრცელებს.

„ჩვენ თავის დროზე აღვნიშნეთ, რომ არ გამოვრიცხავდით საგამოძიებო კომისიის შექმნას. მუხტარლის საქმე არის ერთ-ერთი უმნიშვნელოვანესი საქმე ჩვენთვის და ამასთან დაკავშირებით ბუნებრივია, არსებობს კითხვები. მათ შორის, უცხოელი პარტნიორების მხრიდან. ესეც რომ არ იყოს, ჩვენთვისაც მნიშვნელოვანია, გაირკვეს რა მოხდა, როგორ მოხდა და აქედან გამომდინარე, პარლამენტი ამ მიმართულებით არის განსაკუთრებით დაინტერესებული,"- აღნიშნა კობახიძემ.

მისი თქმით, აფგან მუხტარლის საქმეზე საგამოძიებო კომისია შექმნა დღის წესრიგიდან მოხსნილი არ არის.

"რაც შეეხება საგამოძიებო კომისიის შექმნას, ამას სჭირდება აწონ-დაწონვა. ჩვენ ვიცით, რომ იყო მოთხოვნა შსს-დან, გადასულიყო გამოძიება პროკურატურაში და ახლა პროკურატურა იძიებს საქმეს, აქედან გამომდინარე, შეიძლება მივცეთ დრო პროკურატურას, რომ ბოლომდე მიიყვანოს გამოძიება. პროკურატურას აქვს სირთულეები საქმის გამოძიების დროს, მათ შორის იმის გამო, რომ აუცილებელია მუხტარლის დაკითხვა ამ საქმესთან დაკავშირებით, რაც ართულებს ბუნებრივია საქმის გამოძიებას. აფგან მუხტარლის საქმეზე საგამოძიებო კომისია შექმნა დღის წესრიგიდან მოხსნილი არ არის. ამ საკითხს შეგვიძლია მივუბრუნდეთ იმ შემთხვევაში, თუ დავინახავთ, რომ გამოძიება შედეგს ვერ დებს“, – აღნიშნა კობახიძემ.

მანამდე პარტია ევროპულმა საქართველომ მუხტარლის საქმეზე საგამოძიებო კომისიის შექმნა მოითხოვა.

დღეს აფგან მუხტარლის გატაცების საქმეზე საზოგადოებრივმა ორგანიზაციებმა და მედიამ საქართველოს პარლამენტსა და მთავარ პროკურორს მიმართეს.

12 თებერვალს ცნობილი გახდა, პარლამენტი მუხტარლის საქმეზე საგამოძიებო კომიტეტის შექმნაზე იმსჯელებს.

უფრო ადრე მუხტარლის საქმეზე ადვოკატმა მთავარ პროკურატურას სპეციალური განცხადებით მიმართა. 

აზერბაიჯანელ ჟურნალისტს და უფლებადამცველს, აფგან მუხტარლის, რომელიც 29 მაისს თბილისში გაუჩინარდა, აზერბაიჯანის სასამართლომ საზღვრის უკანონოდ გადაკვეთის, საზღვარზე 10,000 ევროს არადეკლარირებულად გადატანასა და მესაზღვრისთვის წინააღმდეგობის გაწევის გამო, 6 წლით თავისუფლების აღკვეთა მიუსაჯა.

საქართველოში მუხტარლის საქმეზე შსს-მ გამოძიება სისხლის სამართლის კოდექსის 143-ე მუხლით დაიწყო, რაც თავისუფლების უკანონო აღკვეთას გულისხმობს.