დევიდ კილგური: ჩაბუქს დანაშაული არც საქართველოში და არც თურქეთში ჩაუდენია

მუსტაფა ემრე ჩაბუქის გირაოს სანაცვლოდ გათავისუფლებას კანადის ფედერალური მთავრობის ყოფილი მინისტრი და უფლებადამცველი დევიდ კილგური აფასებს. მისი თქმით, ჩაბუქს დანაშაული არც საქართველოში და არც თურქეთში ჩაუდენია. ინფორმაციას ნეტგაზეთი ავრცელებს.

“ჩემი პროფესიიდან გამომდინარე, ექსტრადიციის არაერთ შემთხვევაზე მიმუშავია კანადაში. ძალიან კმაყოფილი ვარ, რომ ჩაბუქი თავისუფალია, ის პატიმრობაში არც უნდა ყოფილიყო. იმედი მაქვს, რომ ის დაუბრუნდება თავის პროფესიას. როგორც აშშ-სთვის, ისე კანადისა და დანარჩენი მსოფლიოსთვის, ძალიან მნიშვნელოვანია, რომ ის თურქეთს არ გადაეცეს, რადგან მას არ ჩაუდენია დანაშაული არც აქ და არც თურქეთში”, – ამბობს კანადელი უფლებადამცველი, რომელიც საქართველოში ჩამოვიდა და ჩაბუქს მხარდაჭერა გამოუცხადა.

კითხვაზე, იყო თუ არა ჩაბუქი პოლიტიკური პატიმარი, კილგურმა აღნიშნა, რომ ყველა მის გარშემომყოფს ასეთი შთაბეჭდილება რჩება. მისი თქმით, საქართველოს მთავრობამ მკაფიოდ უნდა განუცხადოს თურქეთს, რომ მისი წესებით თამაშს არ აპირებს:

“ამას ფიქრობს ყველა: მისი ოჯახიც და სხვა აქ მყოფებიც. ახლა, როცა ჩაბუქი თავისუფალია, საქართველოს მთავრობამ ერდოღანს უნდა დაუსვას საკითხი, რომ აქ მოქმედებენ კანონით და არ აპირებენ მისი წესებით თამაშს; რომ მსგავსი ქმედებები მას არც აქ და არც სხვა ქვეყნებში გამოუვა”, – აცხადებს კილგური, რომელიც ამჟამად თბილისშია.

მმართველ გუნდში აცხადებენ, რომ ჩაბუქის საქმე თურქეთთან ურთიერთობებზე გავლენას ვერ მოახდენს.

“როგორც ყოფილი უფლებადამცველი, ზოგადად ყოველთვის გათავისუფლების მომხრე ვარ. რაც შეეხება საკითხს, ეს არ იმოქმედებს ჩვენი მეზობლის, სტრატეგიული პარტნიორისა და ჩვენს ურთიერთობაზე. გვაქვს უამრავი რესურსი და ჩვენი კავშირები, გამოცდილება, რაც იძლევა იმის საფუძველს, რომ ერთი კონკრეტული ქეისი ზეგავლენას მოახდენს რაიმე ურთიერთობაზე“, – განაცხადა მამუკა მდინარაძემ.

ჩაბუქი ცოტა ხნის წინ სასამართლომ 1000-ლარიანი გირაოს სანაცვლოდ ცოტა ხნის წინ გაათავისუფლა, პროკურატურა კი 10 000-ლარიანი გირაოს მოითხოვდა. 

პროცესს ჩაბუქის მეუღლე, ამერიკელი კონგრესმენები და არასამთავრობო ორგანიზაციების წარმომადგენლები ესწრებოდნენ.

მუსტაფა ემრე ჩაბუქი საქართველოში 24 მაისს დააკავეს. მას თბილისის საქალაქო სასამართლომ წინასაექსტრადიციო სამთვიანი პატიმრობა შეუფარდა. მას ბრალად შეიარაღებული ტერორისტული ორგანიზაციის წევრობა ედება.

7 ივლისს ლტოლვილთა და განსახლების სამინისტრომ ჩაბუქს ლტოლვილის სტატუსის მინიჭებაზე უარი უთხრა. ეს გადაწყვეტილება ადვოკატებმა თბილისის საქალაქო სასამართლოში გაასაჩივრეს. თბილისის საქალაქო სასამართლოს მოსამართლემ ხატია არდაზიშვილმა მუსტაფა ემრე ჩაბუქისთვის ლტოლვილის სტატუსის მინიჭებაზე დევნილთა სამინისტროს უარი ძალაში დატოვა. საქმე სააპელაციოში გასაჩივრდა, რომელმაც ასევე უარი უთხრა ჩაბუქს მოქალაქეობის მინიჭებაზე.