ბექა ნაცვლიშვილი: ტრეფიკინგია, როდესაც ადამიანები ზეგანაკვეთურად ანაზღაურების გარეშე მუშაობენ

საპარლამენტო უმრავლესობის წევრის, ბექა ნაცვლიშვილის შეფასებით, ყალბი ცნობიერება არსებობს იმის, რომ დასაქმებული ადამიანი უბრალო ჭანჭიკია, რომელიც, რომ დაძველდება ან გაფუჭდება, უნდა გადააგდო. ამის შესახებ 1tv წერს.

ბექა ნაცვლიშვილმა შრომის უსაფრთხოებასა და შრომის უფლებებზე დღევანდელ პლენარულ სხდომაზე ილაპარა, სადაც ამ წუთებში საკანონმდებლო ცვლილებებზე მსჯელობენ.

დეპუტატის ცნობით, სასამართლო ინსტანციებში შრომის დავა საშუალოდ სამი წლის განმავლობაში გრძელდება და ამით ზიანდებიან როგორც დასაქმებულები, ასევე დამსაქმებლები. შესაბამისად, ორივე მხარის ინტერესის გათვალისწინებით, ამ სიტუაციიდან ოპტიმალური გამოსავალი შრომის სპეციალური სასამართლო კოლეგიის შექმნა, ან შრომითი დავების განმხილველი მოსამართლეების ვიწრო სპეციალიზაცია იქნება.

"იუსტიციის უმაღლეს საბჭოს მივმართავთ, რომ მოსამართლეების რაოდენობა დაადგინოს, რომელიც განკუთვნილი შრომით დავებზე იქნება. ეს კანონპროექტი ზედამხედველობის მოცვის თვალსაზრისით, დამაკმაყოფილებელი არ არის. არგუმენტი ვერ მოვისმინე, ცვლილებები ყველა დანარჩენ სფეროზე რატომ არ უნდა გავრცელდეს, რომელზეც არ ვრცელდება. ვერც ის მოვისმინე, შრომითი ინსპექციის ინსპექტირება ზოგადად შრომის უფლებებზე როდის გავრცელდება. შრომის უსაფრთხოება და შრომითი უფლებები ერთმანეთისგან განუყოფელი ნაწილია. ყალბი ცნობიერება არსებობს იმის, რომ დღემდე დასაქმებული უბრალო ჭანჭიკია, რომელიც რომ დაძველდება ან გაფუჭდება, უნდა გადააგდო. დოვლათის შექმნის პროცესში დასაქმებული ადამიანი საერთოდ არ მონაწილეობს. ამ ლოგიკას სანამ გავაგრძელებთ, ჩვენი თანამოქალაქეების, მშრომელების ღირსეულ უფლებებზე ასეთი დამოკიდებულება გვექნება“, – აღნიშნა ნაცვლიშვილმა.

კანონმდებელმა შრომით უფლებებზეც გაამახვილა ყურადღება და აღნიშნა, რომ ქვეყანაში ამ თვალსაზრისით ტრეფიკინგი არსებობს.

"დღეს ტრეფიკინგია არა იმ თვალსაზრისით, რომ ვიღაცას სარდაფში კეტავენ, იქ ამუშავებენ და პასპორტს პარავენ, არამედ იმიტომ, რომ ადამიანები ზეგანაკვეთურად მუშაობენ და ეს ანაზღაურებული არ არის, რადგან ყველას ეშინია, ზეგანაკვეთურ სამსახურზე თუ ხმას ამოიღებს, სამსახურიდან გააგდებენ, ახალ ჭანჭიკს მოიტანენ და დაამაგრებენ. იძულებული შრომა არ არის, როცა ადამიანი შრომობს და ანაზღაურება არ აქვს? – ეს საკითხი შრომის უფლებებზე რატომ არ უნდა ვრცელდებოდეს და ახალი ცვლილებები როდის უნდა შემოვიდეს? კიდევ კარგი, რომ ევროკავშირთან ვალდებულებები გვაქვს და კიდევ კარგი, რომ ამ საკითხზე უნდა დავფიქრებულიყავით. თითს 2024 წელზე ვიშვერთ, რომ ეს ვალდებულება მაშინ უნდა შევასრულოთ, მაგრამ 2024 წელს უნდა დაველოდოთ, თუ ცვლილებების განხორციელება საჭირო დღესაა? მართლა კოლონია ხომ არ ვართ, გვეტყვიან, ამ დროს შეასრულეთ და მხოლოდ მაშინ უნდა შევასრულოთ ყველაფერი?“, – განაცხადა ნაცვლიშვილმა.

შრომის უსაფრთხოების დაცვის მოთხოვნით  თბილისში რამდენიმე საპროტესტო აქცია გაიმართა. ერთ-ერთი პროფკავშირების ორგანიზებული იყო. აქციაზე -"გახადე შრომა უსაფრთხო - ამ სლოგანით რუსთაველის მეტროსთან ხელისუფლებისთვის წარსადგენ პეტიციაზე ხელმოწერების შეგროვება დაიწყო.

15 თებერვალს შრომის უსაფრთხოების შესახებ კანონპროექტს ჯანდაცვის კომიტეტში მხარი მეორე მოსმენით დაუჭირეს.

ადამიანის უფლებათა სწავლებისა და მონიტორინგის ცენტრის (EMC) მონაცემებით, 2011 წლიდან 2016 წლის ბოლომდე სამუშაო ადგილებზე 776 ადამიანი დაშავდა და 270 დაიღუპა. 2017 წლის 10 თვის მონაცემებით კი საწარმოო პროცესში დაღუპულთა რაოდენობა ოცდაათია.