„აფბა“ მოქალაქეებისთვის დაგზავნილი ტექსტური შეტყობინებების მიზეზს განმარტავს

ახალგაზრდა ფინანსისტთა და ბიზნესმენთა ასოციაციის სახელით თბილისის მოსახლეობის ნაწილს მობილურ ტელეფონზე შეტყობინება მიუვიდა, სადაც „აფბა“ მოუწოდებს აბონენტებს გადაამოწმონ მათი საკუთრების უფლებრივი სტატუსი არქიტექტურის სამსახურის საიტზე www.tas.ge. ინფორმაციას "კომერსანტი" ავრცელებს.

მსგავსი შეტყობინების დაგზავნის აუცილებლობა განაპირობა იმ გარემოებამ, რომ თბილისის მიწათსარგებლობის ახალი გენერალური გეგმის მიხედვით დედაქალაქში დაახლოებით  ასეულ ათასობით  კვადრატულ მეტრზე განთავსებულ მიწის ნაკვეთებს ეცვლება იურიდიული სტატუსი,  რაც დაახლოებით 25-30.000  ადამიანის კერძო საკუთრებას ეხება.

ორგანიზაციამ დაიწყო კვლევა, რომლის მიზანი თბილისის მიწათსარგებლობის გენერალური გეგმის(მგგ) ფინანსური და ეკონომიკური ნაწილის შესწავლაა.

მნიშვნელოვანია მოქალაქეებისთვის სწორი და საჭირო ინფორმაციის მიწოდება იმ საკითხებთან დაკავშირებით, რაც გამოწვეულია მგგ-ს არსებული ვერსიის დამტკიცების შემთხვევაში მათი საკუთრების უფლების ხელყოფასთან და იმ ტექნიკურ საკითხებთან, რასაც გულისხმობს, მაგალითად, მიწების ფუნქციურ ზონებად დაყოფა და ასევე სხვა უამრავი ნიუანსი, რის შესახებაც მიწის მფლობელები ინფორმირებულნი უნდა იყვნენ. შესაბამისად, მიზანშეწონილად მიგვაჩნია რამდენიმე განმარტების გაკეთება.

ის ფაქტი, რომ მოსახლეობა არ არის სათანადოდ ინფორმირებული, დაადასტურა ორგანიზაციის „ფეისბუკ“ გვერდზე შემოსულმა უამრავმა შეტყობინებამ და ასევე მრავალმა სატელეფონო ზარებმა, სადაც მოქალაქეები, ერთი მხრივ, ადასტურებენ მათი მიწის ზონის სტატუსის შეცვლას, რის გამოც ვერ ახორციელებენ რაიმე სამშენებლო მოქმედებებს საკუთარ მიწის ნაკვეთებზე, ხოლო, მეორე მხრივ, გამოიკვეთა აბსოლუტური ინფორმაციული ვაკუუმი, როცა მიწის მფლობელმა მოქალაქეებმა არ იციან, რა გზას მიმართონ, როგორ გადაამოწმონ მათ საკუთრებაში არსებული მიწის სტატუსი, ვის უნდა მიმართონ და ა.შ. სწორედ ამიტომ იყო მნიშნელოვანი მათთვის ტექსტური შეტყობინებების დაგზავნა, რათა დროულად მოხდეს შესაძლო ნეგატიური შედეგების თავიდან აცილება.

„აფბა“ მოუწოდებს ყველა დაინტერესებულ ფიზიკურ თუ იურიდიულ პირს, რომლის საკუთრებაში არსებულ მიწის ნაკვეთს შეეცვალა სტატუსი, მოგვაწოდეთ ნებისმიერი ტიპის ინფორმაცია, რაც უკავშირდება საკუთრების უფლების ხელყოფას. ყველა ინფორმაცია კვლევის პროცესის სრულყოფილად დასასრულებლად მნიშვნელოვანია.

ამასთან, დედაქალაქის მერიისა და დოკუმენტზე მომუშავე ორგანიზაციის მხრიდან, საჭიროა პროცესებისთვის მეტი გამჭვირვალობის უზრუნველყოფა, რათა მოქალაქეები სრულყოფილ ინფორმაციას ფლობდნენ იმასთან დაკავშირებით, თუ რა ბედი ელის მათ საკუთრებას ხვალ". - წერია განცხადებაში.