აშშ-ის საელჩო: აშშ ამაყობს, რომ საქართველოს მოკავშირეა

საბჭოთა ოკუპაციის დღესთან დაკავშირებით, ამერიკის შეერთებული შტატების საელჩომ თბილისში სპეციალური განცხადება გაავრცელა. ამის შესახებ დიპლომატიური მისიის ოფიციალურ ვებგვერდზე წერია.

"მართალია, ადვილი არ არის ხანგრძლივი ბრძოლა, ყველას სწყურიან თავისუფლათ ამოისუნთქოს მაგრამ დარწმუნდით, უფრო უარესია, თუ მტერი დაგვამარცხებს, თუ ჩვენს ოჯახს, ჩვენ კერას და თავისუფლებას ის გააოხრებს, გათელავს და მიწასთან გაასწორებს. ქართველ ერს დიდი და საყურადღებო ისტორია აქვს; ჩვენ, ქართველები, ყოველთვის განვირჩეოდით თავგანწირვით და დიადი სიყვარულით სამშობლოსადმი. ჩვენი სამშობლო კვლავ აღმოცენდა, აყვავდა, დაგვიდგა ბედნიერი დღეები, ჩვენმა ერმა ბორკილები აიხსნა, მონობას თავი დაახწია და თავისუფლათ ამოისუნთქა. ნუ თუ ეხლა მან ხელები უნდა ჩაუშვას და ეს მონაპოვი უნდა დაღუპოს? არა, ეს ასე არ უნდა მოხდეს და არც იქნება; ქართველი ხალხი არასოდეს არ იყო ლაჩარი და არც იქნება.

ამ სევდიან დღეს ვიხსენებთ პოლკოვნიკ ალექსანდრე ჩხეიძის ქედუხრელ და შთამაგონებელ სიტყვას სამხედრო სკოლის პირველ გამოშვებაზე 1920 წელს. ამ მიმართვიდან ხუთ თვეში წითელმა არმიამ თბილისი აიღო, თუმცა 70-წლიანი საბჭოთა ოკუპაციის მიუხედავად უდრეკი ქართული სული მაინც არ გატყდა. აშშ ამაყობს, რომ საქართველოს მოკავშირეა და განაგრძობს სუვერენული და თავისუფალი ქვეყნის მხარდაჭერას,"- წერია განცხადებაში.

საქართველოს პრეზიდენტმა გიორგი მარგველაშვილმა კოჯორ-ტაბახმელასთან საქართველოს დამოუკიდებლობისათვის ბრძოლაში დაღუპული იუნკერების ხსოვნას პატივი მიაგო. მანამდე იუნკერების ხსოვნას ევროპულმა საქართველომ და მთავრობის წევრებმა პატივი მიაგეს.

საბჭოთა ოკუპაციის დღესთან დაკავშირებით, სახელმწიფო დროშები ყველა სახელმწიფო უწყების შენობაზე დაეშვა, ასევე საქართველოს დიპლომატიურ წარმომადგენლობებში.

1921 წლის 25 თებერვალს, რუსეთის მე-11 არმიამ თბილისი აიღო და საქართველოს ანექსია მოახდინა. საქართველოს დამოუკიდებლობისთვის მებრძოლ იუნკერთა დიდი ნაწილი ბრძოლის ველზე გმირულად დაიღუპა.

საქართველოს პარლამენტის 2010 წლის 21 ივლისის დადგენილების თანახმად, 25 თებერვალი საბჭოთა ოკუპაციის დღედ არის გამოცხადებული. ყოველი წლის 25 თებერვალს, ოკუპაციის მსხვერპლთა პატივსაცემად, წუთიერი დუმილი ცხადდება და საქართველოს მთელ ტერიტორიაზე, სახელმწიფო უწყებების შენობებზე, სახელმწიფო დროშები ეშვება.