მიქაუტაძე: ვფიქრობ, პრემიერს უვადო მოსამართლეებზე სრულყოფილი ინფორმაცია არ აქვს

იუსტიციის უმაღლესმა საბჭომ უვადოდ 44 მოსამართლე 22 თებერვალს დანიშნა. საზოგადოება ზოგიერთ უვადო მოსამართლეს გახმაურებული საქმეებიდან იცნობს. უვადოდ გამწესებულ მოსამართლეთა 44-კაციან სიაში სულხან მოლაშვილისა და სერგო თეთრაძის საქმის მოსამართლეებიც მოხვდნენ.

"კეთილსინდისიერება და კომპეტენტურობა" - საბჭოს წევრებმა მოსამართლეების შერჩევის დროს ამ კრიტერიუმით იხელმძღვანელეს. უვადო მოსამართლეებთან დაკავშირებით 23 თებერვალს პრემიერმინისტრმა გიორგი კვირიკაშვილმა განცხადება გაავრცელა. 

გიორგი კვირიკაშვილის თქმით, მმართველ გუნდში მძიმეა რეაქცია სულხან მოლაშვილის საქმის განმხილველი მოსამართლის მანუჩარ კაპანაძის თბილისის სააპელაციო სასამართლოს სისხლის სამართლის საქმეთა პალატაში უვადოდ გამწესებასთან დაკავშირებით.

მოსამართლეებთან დაკავშირებით საკუთარი არგუმენტები აქვს იუსტიციის უმაღლესი საბჭოს მდივანს გიორგი მიქაუტაძეს. მიქაუტაძე განმარტავს, რომ სასამართლო ხელისუფლება დამოუკიდებელია. 

"მოვისმინე პრემიერის განცხადება და ვფიქრობ, რომ შესაძლოა მას არ ჰქონდა სრულყოფილი ინფორმაცია ამ საკითხებთან დაკავშირებით, არ მიაწოდეს სრულყოფილი ინფორმაცია. სასამართლო ხელისუფლება არის დამოუკიდებელი და დამოუკიდებლად იღებს გადაწყვეტილებებს. ის ვერცერთი ხელისუფლების დაქვემდებარებაში ვერ იქნება", - აცხადებს გიორგი მიქაუტაძე.

მიქაუტაძის განმარტებით, არ არსებობს პრეცედენტი, რომლის თანახმადაც ჯაშუშობის ბრალდებისთვის დაკავებულისთვის აღვეთის ღონისძიების შეფარდებაზე სხვაგვარი გადაწყვეტილება იქნებოდა მოსამართლის მიერ მიღებული. "და რა თქმა უნდა, მოსამართლე გიორგი გოგინაშვილმა სერგო თეთრაძისთვის აღკვეთის ღონისძიებად პატიმრობა გამოიყენა" - ამბობს მიქაუტაძე.

კონტროლის პალატის ყოფილი თავმჯდომარე სულხან მოლაშვილი 2004 წელს, სამსახურებრივი უფლებამოსილების გადამეტებისა და საბიუჯეტო თანხების მითვისების ბრალდებით დააპატიმრეს და 9 წლით თავისუფლების აღკვეთა მიუსაჯეს. 2008 წლის იანვარში მოლაშვილი პრეზიდენტის მოვალეობის შემსრულებელმა ნინო ბურჯანაძემ შეიწყალა.

სულხან მოლაშვილი აცხადებდა, რომ ის პატიმრობის დროს გიგა ბოკერიამ, ზურაბ ადეიშვილმა და გოგა გრიგალაშვილმა აწამეს. 2016 წლის 29 ივნისს ის 47 წლისა მძიმე ავადმყოფობის შემდეგ გარდაიცვალა.