გიორგი მარგველაშვილი: მოსამართლეების უვადოდ დანიშვნა, დროებით უნდა შეჩერდეს

"გირგვლიანის შესწორებების“ პასუხი იყო იმ მოსამართლეების დამტკიცება, რომელიც ჩვენ ორი დღის წინ ვნახეთ“, – ამის შესახებ საქართველოს პრეზიდენტმა განაცხადა. ინფორმაციას 1tv ავრცელებს.

გიორგი მარგველაშვილი პარლამენტს და იუსტიციის საბჭოს მიმართავს, ვიდრე "გირგვლიანის შესწორებები“ კანონად არ იქცევა, იუსტიციის საბჭომ მოსამართლეების უვადოდ დანიშვნა უნდა შეაჩეროს.

"გირგვლიანის შესწორებებს“ სასწრაფოდ უნდა დავუბრუნდეთ პარლამენტში. ვიდრე არ იქნება „გირგვლიანის შესწორებები“ შესული ძალაში როგორც კანონი, მათ შორის დაფუძნებული იმ პოლიტპატიმრების სიაზე და იმ ხალხზე ვინც მიბმულია ამ სიასთან, იქამდე უნდა გავაჩეროთ სამუდამო დანიშვნები იუსტიციის საბჭოში. დავნიშნოთ სხვა მოსამართლეები ახალი ვადით. სამუდამო დანიშვნები გავაჩეროთ. "გირგვლიანის შესწორებები” უნდა იქცეს კანონად და სისტემის გაჯანსაღება უნდა დაიწყოს”, – განაცხადა გიორგი მარგველაშვილმა.

იუსტიციის უმაღლესმა საბჭომ უვადოდ 44 მოსამართლე 22 თებერვალს დანიშნა.

უვადოდ გამწესებულ მოსამართლეებს შორის არიან ასევე მოლაშვილის საქმის განმხილველი მოსამართლე, ასევე  სერგო თეთრაძის მოსამართლე გიორგი გოგინაშვილი და მსახიობ გიორგი გიორგანაშვილის (ბახალა) საქმის მოსამართლე შორენა გუნცაძე.

კონტროლის პალატის ყოფილი თავმჯდომარე სულხან მოლაშვილი 2004 წელს, სამსახურებრივი უფლებამოსილების გადამეტებისა და საბიუჯეტო თანხების მითვისების ბრალდებით დააპატიმრეს და 9 წლით თავისუფლების აღკვეთა მიუსაჯეს. 2008 წლის იანვარში მოლაშვილი პრეზიდენტის მოვალეობის შემსრულებელმა ნინო ბურჯანაძემ შეიწყალა.

სულხან მოლაშვილი აცხადებდა, რომ ის პატიმრობის დროს გიგა ბოკერიამ, ზურაბ ადეიშვილმა და გოგა გრიგალაშვილმა აწამეს. 2016 წლის 29 ივნისს ის 47 წლისა მძიმე ავადმყოფობის შემდეგ გარდაიცვალა.

რაც შეეხება "გირგვლიანის შესწორებებს," როგორც ცნობილია, ფრაქცია ქართული ოცნების თავმჯდომარე მამუკა მდინარაძემ განაცხადა, რომ საპარლამენტო უმრავლესობა იწყებს მუშაობას პროექტზე, სახელწოდებით „გირგვლიანის შესწორებები“.

ამ შემთხვევაში საქმე კონკრეტულ დანაშაულებზე პასუხისმგებლობის გამკაცრებას ეხება, რომელიც როგორც მდინარაძე აცხადებს, ერთი მხრივ, უზრუნველყოფს გაცილებით მაღალი სტანდარტით მოქალაქეთა დაცულობას სახელმწიფო ძალმომრეობისგან და მეორე მხრივ, მართლმსაჯულების შეუვალობას.

29 იანვარს პრეზიდენტის ადმინისტრაციამ დანაშაულებრივი სისტემის შემქმნელების დასჯა მოითხოვა. ევროპულმა საქართველოს წევრმა და დეპუტატმა ირაკლი აბესაძემ "გირგვლიანის შესწორებებს" ხელისუფლების მორიგი ფარსი უწოდა. მისი თქმით, ქართული ოცნება სისხლის სამართლის კოდექსს ოპონენტების წინააღმდეგ იყენებს.

უმრავლესობის წევრმა მამუკა მდინარაძემ 29 იანვარს თქვა, რომ "ქართული ოცნება" იწყებს მუშაობას საკანონმდებლო ინიციატივათა პაკეტზე, რომელიც, ერთი მხრივ, უზრუნველყოფს გაცილებით მაღალი სტანდარტით მოქალაქეთა დაცულობას სახელმწიფო ძალმომრეობისგან და მეორე მხრივ, უზრუნველყოფს მართლმსაჯულების ხელშეუვალობას. მდინარაძის თქმით, ამ ცვლილებებს სიმბოლურად შეიძლება „გირგვლიანის შესწორებები” ერქმევა.