"ქურდულ სამყაროზე“ საკანონმდებლო პაკეტის ინიცირება ბიუროს დღევანდელ სხდომაზეა დაგეგმილი

"ქურდულ სამყაროსთან“ დაკავშირებით მომზადებული საკანონმდებლო პაკეტის ინიცირება ბიუროს დღევანდელ სხდომაზე მოხდება. შინაგან საქმეთა სამინისტროს ავტორობით მომზადებული საკანონმდებლო პაკეტი პარლამენტს უკვე გადაეგზავნა. საკანონმდებლ პაკეტი კი, ექვსი კანონპროექტისგან შედგება. ამის შესახებ 1tv წერს.

მთავრობა განმარტავს, რომ პროექტის მიზანი "ქურდული სამყაროს“ წინააღმდეგ ბრძოლისთვის ადეკვატური სისხლისსამართლებრივი ინსტრუმენტების ჩამოყალიბებაა, რათა უზრუნველყოფილი იყოს „ქურდული სამყაროს“ წინააღმდეგ ეფექტიანი ბრძოლა და სრულფასოვანი მართლმსაჯულების განხორციელება.

„ქურდული სამყაროს“ წინააღმდეგ ბრძოლის მიზნით, 2005 წელს მნიშვნელოვანი საკანონმდებლო ცვლილებები განხორციელდა და „ქურდული სამყაროს“ წევრობა და „კანონიერი ქურდობა“ დასჯად ქმედებად გამოცხადდა. ორგანიზებული დანაშაულის თანამედროვე ფორმები, მისი წესებისა და სტრუქტურის ხშირი ცვალებადობა, ასევე კანონიერი და უკანონო ქმედებების შერევა, დანაშაულებრივი საქმიანობის გზების მუდმივი „დახვეწა“, მოქნილი ცნებების რეგლამენტირების აუცილებლობას საჭიროებს, რომელიც სამართალდამცავ ორგანოს უფრო ეფექტიანი რეაგირების შესაძლებლობას მისცემს. ამ კუთხით, მნიშვნელოვანია საუკეთესო საერთაშორისო პრაქტიკისა და ორგანიზებულ დანაშაულთან ბრძოლის თანამედროვე მიდგომების დანერგვა. პროექტი იმ უცხო ქვეყნების (აშშ, იტალია) გამოცდილებას ეყრდნობა, რომლებიც ორგანიზებული დანაშაულის წინააღმდეგ ბროლის ეფექტიანობით და სამართლებრივი ნორმების მოქნილობით გამოირჩევიან”, – აღნიშნულია კანონპროექტის განმარტებით ბარათში.

საქართველოს შინაგან საქმეთა სამინისტრომ მოამზადა საკანონმდებლო პაკეტი, რომლის მიხედვითაც ე.წ. ქურდულ სამყაროსთან მიმართებაში დასჯადი პირების წრე ფართოვდება.

საკანონმდებლო ცვლილებები ქურდული სამყაროს საქმიანობის მხარდაჭერას, ქურდული შეკრების ორგანიზებას და ქურდული სამყაროს წევრისთვის, ასევე კანონიერი ქურდისთვის მიმართვას დანაშაულად აცხადებს, ასევე ამკაცრებს სასჯელს ქურდული სამყაროს წევრობასა და კანონიერი ქურდობისთვის.

საკანონმდებლო ცვლილებების შედეგად, „კანონიერ ქურდობაზე“ თავისუფლების აღკვეთა 9-დან 15 წლამდე იქნება, ნაცვლად ამჟამად მოქმედი 7-დან 10 წლამდე თავისუფლების აღკვეთისა.

უწყების ცნობით, ცვლილებები ასევე გავრცელდება „ქურდული სამყაროს“ წევრობაზე, რაზეც თავისუფლების აღკვეთა ნაცვლად 5-დან 8 წლამდე, იქნება 7-დან 10 წლამდე.