პაატა ზაქარეიშვილი ტატუნაშვილის ოჯახს ცხინვალში ადვოკატის დაქირავებას ურჩევს

ოკუპირებულ ცხინვალში დაღუპული არჩილ ტატუნაშვილის საქმეზე საკუთარი მოსაზრება დააფიქსირა შერიგებისა და სამოქალაქო თანასწორობის საკითხებში ყოფილმა სახელმწიფო მინისტრმა და ექსპერტმა კონფლიქტების საკითხებში პაატა ზაქარეიშვილმა. მასთან ინტერვიუს "ნეტგაზეთი" ავრცელებს.

პაატა ზაქარეიშვილის თქმით, არჩილ ტატუნაშვილის ოჯახმა ცხინვალში ადვოკატი უნდა დაიქირაოს, იმიტომ რომ იქ, სავარაუდოდ, ამ საქმეზე სასამართლო პროცესები დაიწყება. ადვოკატი კი, ზაქარეიშვილის მოსაზრებით, ადგილიდან ამბის გამოტანას შეძლებს.

"გამოძიება დაიწყება იქ, სასამართლო ჩატარდება და ადვოკატი მეტნაკლებად დაიცავს იქ დაზარალებულების ინტერესებს. ადვოკატის ყოლის შემთხვევაში, ვიღაც მაინც იხმაურებდა, ხმამაღლა ისაუბრებდა და შეატყობინებდა ყველას, რა ხდება სასამართლოზე. ან სად წაიღებენ ცხედარს ექსპერტიზაზე და ა.შ." - ამბობს პაატა ზაქარეიშვილი.

კითხვაზე, დეფაქტო რესპუბლიკაში არსებული სიტუაციის გათვალისწინებით, როგორ წარმოუდგენია მას უფლებათადამცველის აყვანა ცხინვალში, ზაქარეიშვილი ამბობს:

“მეტი მოქნილობაა საჭირო. უამრავი ნაბიჯი არსებობს იმისთვის, რომ ნორმალური ადვოკატი იპოვო იქ. მე მქონდა ასეთი კონტაქტები და ვიცი, ვისთვის შემეძლო მიმემართა მსგავს სიტუაციაში.ცხინვალში მეტნაკლებად ღირსეულ ადვოკატზე გასვლა რთული არ არის.. ცხინვალში თუ არა, ჩრდილოეთ კავკასიაში მაინც. იქაც არიან გმირი და პრინციპული ადამიანები. თუმცა, ამას ფინანსური მხარდაჭერა სჭირდება. ქართულ მხარეს შეიძლება ფორმალურად არ შეუძლია ამის გაკეთება, თუმცა უამრავი ფონდი და საშუალება არსებობს იმისთვის, რომ ოკუპირებულ ტერიტორიებზე მცხოვრები მოსახლეობის ინტერესები დავიცვათ”, - ამბობს პაატა ზაქარეიშვილი.

ყოფილი მინისტრი ტატუნაშვილის ცხედრის ქართული მხარისთვის გადაცემის შესახებაც ლაპარაკობს. მისი თქმით, ილუზია არც ჰქონია, რომ ცხედარს ქართულ მხარეს მალევე გადასცემდნენ.

“რატომ შეიქმნა ილუზია, რომ მალე მოხდებოდა გადმოსვენება?! ალბათ, როგორც ბაშარულის შემთხვევაში მოხდა, ახლაც იტყვიან რომ მათ არ აქვთ შესაბამისი ექსპერტიზის საშუალება და ცხედარს რუსეთში გაგზავნიან, სადაც მას შესაბამისად დაამუშავებენ, სავარაუდოდ. ალბათ, კვალს წაშლიან. ჩემი აზრით, ეს დროში გაიწელება” - დასძენს ყოფილი მინისტრი.

ოკუპირებული ცხინვალის დეფაქტო პრეზიდენტის წარმომადგენელმა პოსტკონფლიქტურ საკითხებში მურატ ჯიოევმა თქვა, რომ ტატუნაშვილს ქართულ მხარეს რუსეთში დამოუკიდებელი ექსპერტიზის ჩატარების შემდეგ გადასცემენ. 

არჩილ ტატუნაშვილი 22 თებერვალს დილით ახალგორიდან გაიტაცეს, 23 თებერვალს, გამთენიისას კი, დეფაქტო ცხინვალის ინფორმაციით, ის სუნთქვის უკმარისობით გარდაიცვალა. 

ტატუნაშვილთან ერთად დაკავებული ორი მოქალაქე - ლევან ქუტაშვილი და იოსებ პავლიაშვილი - ცხინვალის ციხიდან გაათავისუფლეს, თუმცა ჯერ კიდევ ოკუპირებულ ტერიტორიაზე არიან. ახალგორის გამგებელმა, ნუგზარ თინიკაშვილმა თქვა, რომ მათ ოკუპირებული ტერიტორიის დატოვების უფლებას არ აძლევენ, არ უბრუნებენ პირადობის მოწმობებსა და “საშვებს.”