მესამე სექტორი: სასამართლოს პრობლემებზე პასუხისმგებლობა ხელისუფლებამ უნდა აიღოს

კოალიცია “დამოუკიდებელი და გამჭვირვალე მართლმსაჯულებისთვის” სასამართლოში განვითარებულ მოვლენებს ეხმაურება და იწყებს კამპანიას - “მინდა ვენდო სასამართლოს.” ინფორმაციას სააგენტო "ინტერპრესნიუსი" ავრცელებს.

კოალიციის წევრი 38 არასამთავრობო ორგანიზაციის პოზიცია “საერთაშორისო გამჭვირვალობა - საქართველოს” აღმასრულებელმა დირექტორმა ეკა გიგაურმა, "საქართველოს ახალგაზრდა იურისტთა ასოციაციის" ხელმძღვანელმა სულხან სალაძემ და EMC-ის პროგრამების დირექტორმა სოფო ვერძეულმა გაახმოვანეს. 

კამპანიის - “მინდა ვენდო სასამართლოს” მოთხოვნებია: პოლიტიკურმა ხელისუფლებამ აიღოს თავისი წილი პასუხისმგებლობა სასამართლო სისტემაში არსებულ კრიზისზე; სასამართლო სისტემა გათავისუფლდეს კლანური მმართველობისგან; პროკურატურა დაინტერესდეს და სრულფასოვნად გამოიძიოს მართლმსაჯულების სისტემასთან დაკავშირებით ყველა შესაძლო დანაშაულის შემთხვევა; პარლამენტმა დაუყოვნებლივ გაატაროს რეალური რეფორმები, რის საფუძველზეც სასამართლოში არსებული გავლენიანი ჯგუფი ვეღარ შეძლებს კანონმდებლობა არაჯანსაღი მიზნებისთვის გამოიყენოს.

ეკა გიგაურის განცხადებით, კამპანია მიზნად ისახავს, წარმოაჩინოს ის პრობლემები, რაც სასამართლო სისტემაში არსებობს. გიგაური მიიჩნევს, რომ სასამართლო სისტემაში არსებულ პრობლემებზე პოლიტიკური პასუხისმგებლობა ხელისუფლებამ უნდა აიღოს.

“ვფიქრობთ, რომ საკითხი თუ როგორი იქნება ჩვენი სასამართლო, ძალიან მნიშვნელოვანია იმიტომ, რომ ეს არის პირდაპირ დაკავშირებული ქვეყნის დემოკრატიულ განვითარებასთან. ვხედავთ, რომ დღეს არ არსებობს სათანადო პოლიტიკური ნება ეფექტური და სიღრმისეული რეფორმები ჩატარდეს სასამართლო სისტემაში. ვხედავთ, რომ სასამართლოში გვაქვს კლანური მმართველობა. ვხედავთ, სასამართლოში ინიშნებიან ისეთი ადამიანები, რომლებიც არ არიან ღირსნი იყვნენ მოსამართლეები და მათ წარსულთან დაკავშირებით გვაქვს ბევრი კითხვა”, - განაცხადა ეკა გიგაურმა. 

ამასთან, საქართველოს ახალგაზრდა იურისტთა ასოციაციის ხელმძღვანელის სულხან სალაძის თქმით, ბათუმის საქალაქო სასამართლოს მოსამართლის ირაკლი შავაძის შემთხვევაც ადასტურებს, რომ სასამართლოში კლანური მმართველობაა, რაც ყველაზე დიდი გამოწვევაა ამ სისტემაში და რაც უნდა შეიცვალოს. 

“როცა საუბარია კლანურ მმართველობაზე, ბოლო მაგალითი - ბათუმის საქალაქო სასამართლოს მოსამართლის ირაკლი შავაძის განცხადება ნათლად აჩვენებს, რომ ნამდვილად არის კლანური მმართველობა, არის კონკრეტული ჯგუფი, რომლის გავლენის ქვეშაც არის მოქცეული მთელი სასამართლო კორპუსი. ამიტომაც, მოსამართლეების დისტანცირება და გათავისუფლება ამ ჯგუფისგან არის მნიშვნელოვანი და ეს არის ერთ-ერთი მთავარი გამოწვევა როგორც ჩვენი კოალიციისთვის ასევე, სასამართლო რეფორმისთვის”, - განაცხადა სულხან სალაძემ. 

EMC-ის პროგრამების დირექტორის სოფო ვერძეულის განცხადებით, კამპანიის მიზანია, გამოჩნდეს ვის ეკისრება პასუხისმგებლობა სასამართლოში შექმნილი ვითარების გამო. 

“რეფორმები, რომელსაც ერთი ხელით ატარებდა პარლამენტი, სრულად იყო გაბათილებული იმ საკადრო გადაწყვეტილებებით, რომელიც ასევე პარლამენტმა მიიღო იუსტიციის უმაღლესი საბჭოს დაკომპლექტებასთან დაკავშირებით. ამიტომ ჩვენთვის სრულიად გაუგებარია მაღალი პოლიტიკური თანამდებობის მქონე პირების გაკვირვება მოსამართლეების დანიშვნის პროცესთან დაკავშირებით იმ პირობებში, როცა სწორედ საპარლამენტო უმრავლესობამ განსაზღვრა იუსტიციის საბჭოს ისეთი შემადგენლობა, როგორიც გვყავს. ძალიან ნათელია კავშირი პარლამენტის გადაწყვეტილებებსა და იმ პროცესებს შორის, რომელიც სასამართლოში მიმდინარეობს. ძალიან ნათელია, რომ მხოლოდ სასამართლო კორპუსი ვერ შექმნიდა იმ კრიზისს, რომელიც ახლა არის სასამართლოში. ამიტომ ნათლად უნდა განისაზღვროს ხელისუფლების ყველა შტოს სათანადო პასუხისმგებლობა”, - განაცხადა სოფო ვერძეულმა.

კოალიცია "დამოუკიდებელი და გამჭვირვალე მართლმსაჯულებისათვის“ 2011 წელს შეიქმნა.