დეპუტატებმა ევროპარლამენტარებთან არჩილ ტატუნაშვილის გარდაცვალების და უვიზო მიმოსვლის საკითხები განიხილეს

საქართველოს პარლამენტის წევრებმა ბრიუსელში ევროპარლამენტარებთან ორმხრივ შეხვედრებზე უვიზო მიმოსვლის, საქართველოს მხარდამჭერი რეზოლუციის მიღების და არჩილ ტატუნაშვილის გარდაცვალების საკითხები განიხილეს. ინფორმაციას პარლამენტის პრესსამსახური ავრცელებს.

„ვისაუბრეთ საქართველოს ტერიტორიული მთლიანობის თაობაზე, ევროპარლამენტის რეზოლუციის მიღების აუცილებლობაზე. ამ იდეას იზიარებენ ჩვენი ევროპელი კოლეგები სხვადასხვა პოლიტიკური ჯგუფებიდან. მნიშვნელოვანია, რომ რუსეთ-საქართველოს ომიდან 10 წლის შემდეგ ჩვენი ოკუპაციის საკითხი ევროპის ყურადღების ცენტრში მუდმივად იდგეს. ვფიქრობთ, რომ ევროპარლამენტის სპეციალური რეზოლუცია, რომელიც ძალიან მძიმეწონიანი პოლიტიკური აქტია, რუსული ოკუპაციის წინააღმდეგ, იმედია მხარდაჭერას მოიპოვებს და ზაფხულამდე იქნება მიღებული”, - განაცხადა თამარ ჩუგოშვილმა.

ევროპარლამენტარებთან ჰაიდი ჰაუტალასთან, კნუტ ფლეკენშტაინთან, ვიქტორ ბოშტინარუსთან, პეტრა აუსტრევიჩიუსთან, დევიდ მაკალისტერთან და სხვებთან გამართულ ორმხრივ შეხვედრებზე საუბარი იყო ევროკავშირთან უვიზოდ მიმოსვლის საკითხზე, რომ ვიზალიბერალიზაციას საფრთხე არ ემუქრება ამ ეტაპზე, თუმცა მნიშვნელოვანია საქართველოს მოქალაქეებმა ბოროტად არ გამოიყენონ ქვეყნის ის მნიშვნელოვანი მიღწევა, რომელსაც ევროპასთან უვიზო მიმოსვლა ქვია. 

”საქართველოს ხელისუფლება ყველაფერს აკეთებს იმისთვის, რომ შემცირდეს საქართველოს მოქალაქეების მხრიდან უვიზო მიმოსვლის შეთანხმების პირობების დარღვევა. საუბრის თემა იყო ასევე არჩილ ტატუნაშვილის გარდაცვალების ფაქტი, რასაც ევროპარლამენტარების მხრიდან რეაგირება მოჰყვა”, - ნათქვამია პარლამენტის მიერ გავრცელებულ ინფორმაციაში.

არჩილ ტატუნაშვილი 22 თებერვალს დილით ახალგორიდან გაიტაცეს, 23 თებერვალს, გამთენიისას კი, დეფაქტო ცხინვალის ინფორმაციით, ის სუნთქვის უკმარისობით გარდაიცვალა. 

ტატუნაშვილთან ერთად დაკავებული ორი მოქალაქე - ლევან ქუტაშვილი და იოსებ პავლიაშვილი - ცხინვალის ციხიდან გაათავისუფლეს, თუმცა ჯერ კიდევ ოკუპირებულ ტერიტორიაზე არიან. ახალგორის გამგებელმა, ნუგზარ თინიკაშვილმა თქვა, რომ მათ ოკუპირებული ტერიტორიის დატოვების უფლებას არ აძლევენ, არ უბრუნებენ პირადობის მოწმობებსა და “საშვებს.”

ოკუპირებული ცხინვალის დეფაქტო პრეზიდენტის წარმომადგენელმა პოსტკონფლიქტურ საკითხებში მურატ ჯიოევმა თქვა, რომ ტატუნაშვილს ქართულ მხარეს რუსეთში დამოუკიდებელი ექსპერტიზის ჩატარების შემდეგ გადასცემენ.