დავით ქაცარავა ტატუნაშვილის ცხედრის გადმოსვენების მოთხოვნით აქციებს აანონსებს

მოძრაობა „ძალა ერთობაშია“ საგანგებო განცხადებას ავრცელებს, რომელიც თბილისი-სტეფანწმინდა-ლარსის გზაზე საპროტესტო აქციების ორგანიზებას შეეხება. "ძალა ერთობაშიას“ სახელით, დავით ქაცარავა განმარტავს, რომ მოძრაობა ბოლო რამდენიმე დღეა თავს იკავებს აქციების დაგეგმვისგან:

"მას შემდეგ, რაც არჩილ ტატუნაშვილის ოჯახმა გადაწყვიტა, დაელოდოს ცხედრის გადმოცემის მიზნით საქართველოს ხელისუფლების ძალისხმევის შედეგებს, "ძალა ერთობაშია“ თავს იკავებდა მწვავე საპროტესტო აქციების დაგეგმვისგან, აცნობიერებდა რა, რომ პირველ რიგში სწორედ ხელისუფლების ვალია, შეძლებისდაგვარად უზრუნველყოს როგორც ცხედრის გადმოცემა, ასევე არჩილ ტატუნაშვილის მკვლელობაში მონაწილე პირების დასჯა,"- წერია განცხადებაში.

დავით ქაცარავა წერს, რომ რუსეთის საოკუპაციო რეჟიმი ყველაფერს გააკეთებს არჩილ ტატუნაშვილის ცხედრის გადმოცემის გაჭიანურებისთვის:

"ამ ვარაუდის საფუძველს გვაძლევს ისიც, რომ საოკუპაციო რეჟიმის წარმომადგენლები ჩვეული სტილით მოქმედებას აგრძელებენ და 1 მარტს კიდევ ერთ ოკუპირებულ რეგიონში - აფხაზეთში საქართველოს მოქალაქე მალხაზ წურწუმია გაიტაცეს, ხოლო ე.წ. სამხრეთ ოსეთის დე ფაქტო ხელისუფლების წარმომადგენლებმა გაავრცელეს განცხადება, რომ ახალგორში თითქოსდა ნაპოვნი თვითნაკეთი ასაფეთქებელი მოწყობილობა, შესაძლოა, არჩილ ტატუნაშვილის დამონტაჟებული ყოფილიყო. ეს "ახალი“ გარემოება შემთხვევითი არ არის, რადგან რუსეთის ფედერაციაში მოქმედი კანონით, ტერორიზმში ბრალდებულის ცხედარი ოჯახს არ უბრუნდება,“- წერია განცხადებაში.

ამ ფონზე, დავით ქაცარავა თვლის, რომ „ერთადერთი, რამაც საოკუპაციო რეჟიმი, შესაძლოა, აიძულოს არჩილ ტატუნაშვილის ცხედრის გადმოცემის პროცესი დააჩქაროს, ახალგორში დატყვევებულ კიდევ ორ საქართველოს მოქალაქეს ქართული მხარის მიერ კონტროლირებად ტერიტორიაზე გადასვლის უფლება მისცეს და 1 მარტს ენგურის ხიდიდან გატაცებული მალხაზ წურწუმია გაათავისუფლოს, სწორედ საპროტესტო აქციებია, თბილისი-სტეფანწმინდა-ლარსის გზის გადაკეტვისა და ლარსის გავლით შემოსული ტრანზიტული ტვირთების ბლოკირების ჩათვლით, რაც რეალურად, დისკომფორტის შემქმნელი იქნება რუსეთისთვის.“ 

მოძრაობა „ძალა ერთობაშია“ აცხადებს, რომ თუკი უახლოესი დღეების განმავლობაში არჩილ ტატუნაშვილის ცხედარი არ გადაეცემა ოჯახს, ან არ დაზუსტდება გადმოსვენების თარიღი, დაიწყება საპროტესტო აქციების ორგანიზება თბილისი-სტეფანწმინდა-ლარსის გზაზე და სხვა ადგილებში, რომელთა მიზანიც რუსეთიდან შემოსული ტვირთების ბლოკირება იქნება.

ოსური სააგენტო "რესის" ცნობით, ახალგორის რაიონში ხიდის ქვეშ თვითნაკეთი ასაფეთქებელი მოწყობილობა იპოვეს. თვითნაკეთი ასაფეთქებელი მოწყობილობა კი ოკუპირებული ცხინვალის რეგიონში გარდაცვლილი არჩილ ტატუნაშვილის სახელს უკავშირდება.

"თვითნაკეთი ასაფეთქებელი მოწყობილობა შედგებოდა მაგნიტის ნაჭრების, ასაფეთქებელი ნივთიერებისა და სადენებისგან. ეს ყველაფერი ერთმანეთზე და აგრეთვე მობილურ ტელეფონზე იყო მიმაგრებული საიზოლაციო ლენტით. უნდა აღინიშნოს, რომ მდინარე ქსანზე მდებარე ხიდი, რომლის ქვეშაც აღმოაჩინეს ასაფეთქებელი მოწყობილობა, ერთადერთია, რომელიც ლენინგორს რესპუბლიკის დანარჩენ ნაწილთან აკავშირებს", - აცხადებენ ცხინვალში.

ცხინვალის რეჟიმის მტკიცებით, ასაფეთქებელი მოწყობილობა დაკავშირებულია არჩილ ტატუნაშვილის მიერ დაგეგმილ დივერსიებთან, რადგან სამართალდამცავი ორგანოების ხელთ არსებული სარწმუნო ოპერატიული ინფორმაციის თანახმად, ის ამზადებდა პროვოკაციებს სამხრეთ ოსეთში რუსეთის ფედერაციის პრეზიდენტის არჩევნებისთვის.

არჩილ ტატუნაშვილი 22 თებერვალს დილით ახალგორიდან გაიტაცეს, 23 თებერვალს, გამთენიისას კი, დეფაქტო ცხინვალის ინფორმაციით, ის სუნთქვის უკმარისობით გარდაიცვალა. 

ოკუპირებული ახალგორის გამგებელმა, ფილიპ ხაჩიროვმა განაცხადა, რომ არანაირი კონფლიქტი არ ჰქონია არჩილ ტატუნაშვილთან და მის გარდაცვალებასთან კავშირი არ აქვს.

სამოქალაქო მოძრაობის "ძალა ერთობაშია“ ხელმძღვანელმა დავით ქაცარავამგანაცხადა, რომ მისი ინფორმაციით, ტატუნაშვილის მკვლელობის დამკვეთი ოკუპირებული ახალგორის გამგებელი ფილიპ ხაჩიროვია, შემსრულებელი კი დეფაქტო ცხინვალის მილიციის წარმომადგენელი ლუდვიგ ხაჩიროვი.

ტატუნაშვილთან ერთად დაკავებული ორი მოქალაქე - ლევან ქუტაშვილი და იოსებ პავლიაშვილი - ცხინვალის ციხიდან გაათავისუფლეს, თუმცა ჯერ კიდევ ოკუპირებულ ტერიტორიაზე არიან. ახალგორის გამგებელმა, ნუგზარ თინიკაშვილმა თქვა, რომ მათ ოკუპირებული ტერიტორიის დატოვების უფლებას არ აძლევენ, არ უბრუნებენ პირადობის მოწმობებსა და “საშვებს.”