ციხელაშვილი: ჟენევის ფორმატი მოლაპარაკებების მთავარი პლატფორმაა

სახელმწიფო მინისტრის ქეთევან ციხელაშვილის განცხადებით, ჟენევის საერთაშორისო დისკუსიები მოლაპარაკებების მთავარი და ერთადერთი პლატფორმაა. 

"ჩვენი ამოცანა გახლავთ კიდევ უფრო გაიზარდოს ეფექტურობა, მათ შორის საჭიროების შემთხვევაში უმაღლეს დონეზე პრემიერის ჩართულობითაც", - თქვა ქეთევან ციხელაშვილმა.

მინისტრის განცხადებით, აუცილებელია გადაიდგას ყველა ნაბიჯი ქვეყანაში მშვიდობისათვის და რუსეთთან კონფლიქტის მოგვარებისკენ.

ქეთავენ ციხელაშვილი პრემიერ მინისტრის განცხადებას ეხმაურება. ჟურნალისტების კითხვაზე თუ რას გილისხმობდა გიორგი კვირიკაშვილი ახალ სივრცეში ის პასუხობს:

"იგულისხმება ის, რომ ქართული მხარე კვლავ მზად არის გააგრძელოს კონსტრუქციული მონაწილეობა ჟენევის საერთაშორისო დისკუსიებში, რომელიც არის რუსეთთან ამ საკითხებზე მოლაპარაკების ერთადერთი და მთავარი ფორმატი.. იმედს გამოვთქვამთ, რომ რუსეთის მონაწილეობა იქნება კონსტრუქციული, რადგან ჟენევის საერთაშორისო დისკუსიების დღის წესრიგი უკავშირდება ძალიან მნიშვნელოვან თემებს, მათ შორის 2008 წლის ცეცხლის შეწყვეტის შეთანხმებას და აქედან გამომდინარე ვალდებულებების შესრულებას რუსეთის მხრიდან. ამ მიმართულებით ნაბიჯების გადადგმა იქნებოდა გონივრული გამოსავლისკენ ნაბიჯების გადადგმა. 

ამ განცხადებაში ხაზი გაესვა, რომ ქართულ-რუსული ურთიერთობების მოწესრიგებისათვის ფაქტობრივად, წინა პირობა არის ის, რომ დაძლეული იქნას მთავარი გამოწვევა, მოგვარებული იქნას მთავარი კონფლიქტი, რაც წარმოადგენს ჩვენი სახელმწიფოს ძალიან მნიშვნელოვან ამოცანას იმიტომ, რომ ეს განცხადება გაკეთებულია ყველას საყურადღებოდ და ბუნებრივია საერთაშორისო თანამეგობრობის საყურადღებოდ. ეს არის ჩვენი სამშვიდობო პოლიტიკის ღია განაცხადი. ჩვენ არ ვაპირებთ ამ გზიდან გადახვევას, ჩვენი დღის წესრიგი არის კონსტრუქციული და ძალიან ძალიან პრინციპული იმასთან დაკავშირებით, რომ ვერ შევურიგდებით ჩვენი მოქალაქეების სიცოცხლისა და უსაფრთხოების ხელყოფას და გადავდგამთ ყველა ნაბიჯს იმისათვის, რომ ადამიანის უფლებები იყოს დაცული და მათი მდგომარეობა გაუმჯობესებული. ამას ემსახურებოდს ეს განცხადება და ამ სივრცეს ვგულისხმობთ, როცა ვსაუვრობთ სივრცეზე" _ აცხადებს ქეთევან ციხელაშვილი.

მთავრობის დღევანდელ სხდომაზე გიორგი კვირიკაშვილმა თქვა: "რუსეთის პასუხში შეიძლება, ბევრი რამ არ იყოს მისაღები, მაგრამ ეს პასუხი ტოვებს სივრცეს საუბრისთვის ".

რუსეთის საგარეო საქმეთა სამინისტრომ პრემიერმინისტრ გიორგი კვირიკაშვილის 9 მარტის განცხადებას 12 მარტს უპასუხა.

როგორც რუსეთის საგარეო უწყების განცხადებაშია აღნიშნული, მოსკოვში პრემიერ კვირიკაშვილის განცხადებას ყურადღებით გაეცნენ და კმაყოფილებას გამოხატავენ მიმართვაში გამოთქმულ განწყობებთან დაკავშირებით.

როგორც პრემიერმინისტრ კვირიკაშვილის მიმართვაში იყო აღნიშნული, საქართველოს მთავრობა კვლავ ადასტურებს, რომ დაინტერესებულია, მიაღწიონ რეალურ პროგრესს ჟენევის საერთაშორისო დისკუსიებში. გიორგი კვირიკაშვილი განმარტავს, რომ ის მზად არის ამ პროცესში პირადად ჩაერთოს.

არჩილ ტატუნაშვილი 22 თებერვალს დილით ახალგორიდან გაიტაცეს, 23 თებერვალს, გამთენიისას კი, დეფაქტო ცხინვალის ინფორმაციით, ის სუნთქვის უკმარისობით გარდაიცვალა. მისი ცხედარი ოკუპირებულ ცხინვალს ქართული მხარისთვის ჯერ არ გადაუცია.