ზურაბ აბაშიძე პრემიერის მიმართვაზე ოპონენტების დასკვნას არაკვალიფიციურს უწოდებს

საქართველოს პრემიერმინისტრის სპეციალურმა წარმომადგენელმა რუსეთთან ურთიერთობების საკითხებში ზურაბ აბაშიძემ ტელეკომპანია "იმედის" ეთერში, იმ განცხადებაზე ისაუბრა, რომლითაც საქართველოს პრემიერმინისტრმა 9 მარტს ოფიციალურ მოსკოვს მიმართა. აბაშიძემ, მიმართვასთან დაკავშირებით, ოპონენტების შეფასებებს არაკომპეტენტური უწოდა.

"ჩვენი ოპონენტები ამ თემაზე საუბრისას მთავარ მომენტს გვერდს უვლიან; რატომ გააკეთა პრემიერმა ეს განცხადება. ჩვენ ავამოქმედეთ პრაქტიკულად ყველა საერთაშორისო ბერკეტი იმისთვის, რომ არჩილ ტატუნაშვილის ცხედარი ოჯახისთვის გადაეცათ და ჩვენი მოქალაქეები გაეთავისუფლებინათ. ამას შედეგი არ მოჰყოლია. 

ჩვენ ბევრი ისეთი ადამიანი, რომელიც 24 საათის განმავლობაში ეკრანზე არ ჩანს, გვეკითხებოდა, რატომ არ მივმართავდით თავად რუსეთს, როდესაც ყველა საერთაშორისო საზოგადოებას მივაწოდეთ ამაზე ინფორმაცია. ამ კითხვაში, თავისთავად, არსებობს ლოგიკა.

ამიტომაც, პრემიერმა ეს ნაბიჯი გადადგა. მიმართვას მოჰყვა ნაწილობრივი შედეგი; გაათავისუფლეს ჩვენი ორი მოქალაქე.

ალბათ მან ისიც იცოდა, რომ ამ მიმართვას კრიტიკა მოჰყვებოდა.

როგორც ჩანს, მიმართვასთან დაკავშირებით, ჩვენმა ოპონენტებმა ნაჩქარევად, ემოციებზე ააგეს საკუთარი შეფასებები. ისინი ამ აჩქარებული შეფასებების გამო, აკეთებენ არაკვალიფიციურ დასკვნებს"- თქვა აბაშიძემ.

პრემიერმინისტრმა გიორგი კვირიკაშვილმა რუსეთის მიმართ განცხადება 9 მარტს გაავრცელა. მიმართვაში აღნიშნული იყო, რომ საქართველოს მთავრობა დაინტერესებულია, მიაღწიოს რეალურ პროგრესს ჟენევის საერთაშორისო დისკუსიებში. 

რუსეთის საგარეო საქმეთა სამინისტრომ პრემიერმინისტრ გიორგი კვირიკაშვილის 9 მარტის განცხადებას 12 მარტს უპასუხა.

როგორც რუსეთის საგარეო უწყების განცხადებაშია აღნიშნული, მოსკოვში პრემიერ კვირიკაშვილის განცხადებას ყურადღებით გაეცნენ და კმაყოფილებას გამოხატავენ მიმართვაში გამოთქმულ განწყობებთან დაკავშირებით.

მოგვიანებით, კვირიკაშვილი რუსეთის საგარეო უწყების პასუხს გამოეხმაურა. მისი თქმით, რუსეთის პასუხი ტოვებს სივრცეს საუბრისთვის. 

არჩილ ტატუნაშვილი 22 თებერვალს დილით ახალგორიდან გაიტაცეს, 23 თებერვალს, გამთენიისას კი, დეფაქტო ცხინვალის ინფორმაციით, ის სუნთქვის უკმარისობით გარდაიცვალა. მისი ცხედარი ოკუპირებულ ცხინვალს ქართული მხარისთვის ჯერ არ გადმოუცია.