დავით ზალკალიანი ჟენევაში გაეროს ოკუპირებულ ტერიტორიებზე ინფორმაციას მიაწვდის

საგარეო საქმეთა მინისტრის პირველი მოადგილე დავით ზალკალიანი სამუშაო ვიზიტით ჟენევას ჩავიდა, სადაც გაეროს ადამიანის უფლებათა საბჭოს წევრი სახელმწიფოების დელეგაციებს შეხვდება. ინფორმაციას საგარეო უწყება ავრცელებს.

დავით ზალკალიანი დელეგაციებს მიაწვდის ინფორმაციას საქართველოს ოკუპირებულ რეგიონებში ადამიანის უფლებებს კუთხით შექმნილ მძიმე ვითარებაზე, რაც გამოიხატება ადგილზე  სიცოცხლის უფლების ხელყოფის, თავისუფალი გადაადგილების შეზღუდვის, მშობლიურ ქართულ ენაზე განათლების მიღების აკრძალვისა  და ადამიანის უფლებების უხეში დარღვევევის სხვა ფაქტებში.

შეხვედრებზე მინისტრის პირველი მოადგილე ყურადღებას გაამახვილებს ამ გარემოებების საპასუხოდ, საერთაშორისო თანამეგობრობის, განსაკუთრებით, გაეროს ადამიანს უფლებათა საბჭოს მხრიდან კონსოლიდირებული პოზიციის აუცილებლობაზე. ასევე, ისაუბრებს საქართველოს ოკუპირებულ რეგიონებში ადამიანის უფლებათა მდგომარეობის საერთაშორისო მონიტორინგისა და გაერო-ს ადამიანის უფლებათა უმაღლესი კომისრის ოფისის აქტიური ჩართულობის მნიშვნელობაზე.

ჟენევაში ვიზიტის ფარგლებში, 23 მარტს, დავით ზალკალიანი სიტყვით გამოვა ადამიანის უფლებათა საბჭოს 37-ე სესიაზე, სადაც იგეგმება საქართველოს მიერ ინიცირებული რეზოლუციის -„თანამშრომლობა საქართველოსთან“ მიღება.

ჟენევის დისკუსიების მორიგი რაუნდის გამართვა 27-28 მარტს იგეგმება.

შეგახსენებთ, რომ „ამიერკავკასიას ზეპირი მშვიდობისთვის ამზადებენ“, - ამ სათაურით გამოაქვეყნა სტატია რუსულმა „კომერსანტმა“. გაზეთი წერს, რომ საქართველოს საკითხზე შექმნილი ჟენევის დისკუსიის მონაწილეები ძალის გამოუყენებლობაზე დეკლარაციის მიღებას გეგმავენ.