გიორგი ტუღუში საქართველოს მხარდამჭერი რეზოლუციის მიღებას ეხმიანება

"ევროპული საქართველოს" წევრი გიორგი ტუღუში გაეროს ადამიანის უფლებათა საბჭოს მიერ მიღებულ საქართველოს მხარდამჭერ რეზოლუციას ეხმაურება. მისი თქმით, ძალიან მნიშვნელოვანია, რომ ეს ორგანო საქართველოში შექმნილ ვითარებას იხილავს და ქვეყანაში არსებული პრობლემები კონკრეტულ რეზოლუციაში აისახა.

"ბოლო წლებში ვსაუბრობთ, რომ საერთაშორისო თანამეგობრობის მხრიდან ყურადღება მოკლებულია საქართველოს საკითხის მიმართ და ფაქტიურად არაერთხელ გამოიყენებოდა ტერმინი, რომ ჩვენ საერთაშორისო რადარებიდან გავქრით. სამწუხაროა, რომ ჩვენი თემის აქტუალიზება ხდება ისეთი მძიმე შემთხვევების გამო, როგორიცაა ტატუნაშვილის სიკვდილი. ჩვენ ალბათ აქამდე არც მივიდოდით, რომ ეს ნაბიჯები რეალურად გაცილებით ადრე გადადგმულიყო. მნიშვნელოვანია, რომ ყველა ფორმატი გამოვიყენოთ, მათ შორის გაეროს ადამიანის უფლებათა საბჭოს, რომელიც ძირითადი გადაწყვეტილებების მიმღები ორგანოა ამ მიმართულებით. საუბარი იმაზე, რომ ოკუპირებულ ტერიტრიებზე საერთაშორისო მისია უნდა აწარმოებდეს მონიტორინგს, ხელი უნდა შეუწყოს უფლებადარღვევების კლებას, ეს ძალიან მნიშვნელოვანია. იმედს ვიტოვებ, რომ ეს არ არის პირველი და უკანასკნელი ნაბიჯი საერთაშორისო სტრუქტურებიდან და კიდევ იქნება მიღებული მხარდამჭერი დოკუმენტი", - განაცხადა გიორგი ტუღუშმა. 

გაეროს ადამიანის უფლებათა საბჭომ საქართველოს მხარდამჭერი რეზოლუცია გუშინ დაამტკიცა. ამის შესახებ ინფორმაცია საგარეო საქმეთა მინისტრის მოადგილემ, დავით ზალკალიანმა Facebook-ის საკუთარ გვერდზე გამოაქვეყნა. 

ქართული მხარის მიერ ინიცირებული რეზოლუციის განხილვისას, მხარდამჭერი განცხადებები გააკეთეს ამერიკის შეერთებული შტატების, გაერთიანებული სამეფოსა და ავსტრალიის დელეგაციებმა. თავიანთ გამოსვლებში, აღნიშნული ქვეყნები მიესალმნენ საქართველოს თანამშრომლობას გაერო-ს ადამიანის უფლებათა უმაღლესი კომისრის ოფისთან. დელეგაციებმა ერთხმად გამოხატეს შეშფოთება საქართველოს აფხაზეთისა და ცხინვალის რეგიონებში ადამიანის უფლებათა დაცვის კუთხით არსებულ მდგომარეობასთან დაკავშირებით და ისაუბრეს ამ რეგიონებში ადამიანის უფლებათა მონიტორინგის მექანიზმების შესვლის საჭიროებაზე. თავის განცხადებაში ავსტრალიის დელეგაცია ასევე გამოეხმაურა აფხაზეთისა და ცხინვალის რეგიონებში რუსეთის საპრეზიდენტო არჩევნებთან დაკავშირებით, საარჩვენო უბნების გახსნას და განაცხადა, რომ მსგავსი ფაქტები მიუღებელია. ყოველივე აღნიშნულის გათვალისწინებით, გამომსვლელებმა მოუწოდეს საბჭოს წევრებს ქართული მხარის მიერ წარდგენილი რეზოლუციის მხარდაჭერისკენ.

23 მარტს მიღებულ რეზოლუციაში, ადამიანის უფლებათა საბჭო კიდევ ერთხელ ადასტურებს საქართველოს სუვერენიტეტისა და ტერიტორიული მთლიანობის მხარდაჭერას მის საერთაშორისოდ აღიარებულ საზღვრებში. დოკუმენტში აღიარებულია საქართველოს მთავრობის ძალისხმევა ქვეყანაში დემოკრატიის, კანონის უზენაესობისა და ადამიანის უფლებათა განმტკიცების კუთხით. ამასთან, საბჭო მიესალმება საქართველოს მთავრობის თანამშრომლობას გაერო-ს ადამიანის უფლებათა უმაღლესი კომისრის ოფისთან და ადამიანის უფლებათა დაცვის სხვა, რეგიონულ თუ საერთაშორისო მექანიზმებთან.

რეზოლუციაში აღნიშნულია უმაღლესი კომისრის 2017 წლის ანგარიშში მოცემული შეფასებები და ხაზგასმულია საქართველოს რეგიონებში ეფექტური კონტროლის მქონე ძალის პასუხისმგებლობა - უზრუნველყოს ადგილზე ადამიანის ფუნდამენტური უფლებებისა და თავისუფლებების დაცვა.

რეზოლუციაში ადამიანის უფლებათა საბჭო გამოთქვამს სერიოზულ შეშფოთებას საქართველოს აფხაზეთისა და ცხინვალის რეგიონებში ეთნიკური ნიშნით დისკრიმინაციას, მშობლიურ ენაზე განათლების მიღების შეზღუდვასა და ეთნიკურად ქართველი მოსახლეობის სახლების მიზანმიმართულ ნგრევასთან დაკავშირებით. ამასთანავე, გამოთქმულია შეშფოთება, რომ იძულებით გადაადგილებული პირები და ლტოლვილები, კვლავაც ვერ ახერხებენ თავიანთ საცხოვრებელ სახლებში უსაფრთხოდ და ღირსეულად დაბრუნებას.

დოკუმენტში გამოთქმულია შეშფოთება, რომ რეგიონულ და საერთაშორისო მონიტორინგის მექანიზმებს არ ეძლევათ აფხაზეთისა და ცხინავლის რეგიონებში შესვლის საშუალება. აღნიშნულიდან გამომდინარე, რეზოლუციაში არის მოწოდება - მოხდეს უმაღლესი კომისრის ოფისისა და მონიტორინგის სხვა მექანიზმების დაუყოვნებლივი შეღწევის უზრუნველყოფა.

ამასთან, ადამიანის უფლებათა საბჭო, მიღებული რეზოლუციით ავალებს გაერო-ს ადამიანის უფლებათა უმაღლეს კომისარს, განაგრძოს საქართველოსთვის ტექნიკური დახმარების გაწევა და წარმოადგინოს ანგარიში რეზოლუციაში ასახულ საკითხებთან დაკავშირებით, საბჭოს მომდევნო - 38-ე და 39-ე სესიებზე“, - ნათქვამია საგარეო უწყების განცხადებაში.