ხმალაძე: სითი პარკი სასამართლოზე ზეწოლას ცდილობს

თბილისის ვიცემერის ირაკლი ხმალაძის განცხადებით, კომპანია "სითი პარკი" სასამართლოზე ზეწოლის მოხდენას და საქმის პოლიტიზებას ცდილობს. ამის შესახებ ხმალაძემ სასამართლოს გადაწყვეტილების კომენტირებისას განაცხადა. ინფორმაციას 1tv ავრცელებს.

„დღეს სასამართლომ წარმოებაში არ მიიღო „სითი პარკის“ სარჩელი. სასამართლომ განუმარტა, რომ მათ ამ აქტის გასაჩივრების მიმართ იურიდიული ინტერესი არ აქვთ და ამიტომ არ მიიღო წარმოებაში. ეს არის ჩვეულებრივი სამართლებრივი პროცესი. ეს არის ჩვეულებრივი სამართლებრივი პრაქტიკა და თითოეულ გადაწყვეტილებაზე, რომელიც მიიღება სასამართლოს მხრიდან, ასეთი შეურაცხმყოფელი განცხადებების გაკეთება, მე მგონი მიუღებელია. განცხადებები, რომ ასეთი ორკესტირირებულიასასამართლო და მერიის ქმედება უბრალოდ შეურაცხმყოფელია”, – აცხადებს ირაკლი ხმალაძე.

ვიცე-მერი აღნიშნავს, რომ „სითი პარკს“ აქვს სრული უფლება სასამართლოს გზით დაიცვას საკუთარი კანონიერი ინტერესები, ისევე როგორც ამის უფლება აქვს მერიას.

„პოლიტიზირებას ცდილობენ, რადგან მათი მოქმედებები პრაქტიკულად გაცდენილია სამართლებრივ ჩარჩოებს. მათ არაფერში არ სჭირდებათ ასეთი განცხადებების გაკეთება, რასაც ადგილი ჰქონდა დღეს. „სითი პარკი“ ცდილობს პროცესის პოლიტიზებას, რაც არ გამოუვათ. წამოწყებული აქვთ მედიაკამპანია, თითქოს კომპანია ხელშეკრულებით ნაკისრ ყველა ვალდებულებას ასრულებდა. ყველა მოქალაქეს შეუძლია, გადახედოს საპარკინგე ინფრასტრუქტურას და ნახავენ, რა დონეზეა მოწესრიგებული. სწორედ ეს გახდა ხელშეკრულების შეწყვეტის საფუძველი”, – განაცხადა ირაკლი ხმალაძემ.

კომპანია სითი პარკის განცხადებით, მათი სარჩელი თბილისის საქალაქო სასამართლომ წარმოებაში არ მიიღო. საქმე ეხება არა უშუალოდ მერიის მიერ კომპანიასთან ხეშეკრულების გაწყვეტის გასაჩივრებას, არამედ თბილისის მერიის მიერ გასული წლის 23 აგვისტოს მიღებული განკარგულების გასაჩივრებას. 2017 წლის 23 აგვისტოს დედაქალაქის მერიამ გამოსცა გაფრთხილება-განკარგულება, სადაც საუბრობდა, რომ არასწორად ხდება ჯარიმა-საურავების გამოწერა „სითი პარკის“ მხრიდან, რისთვისაც დიდი რაოდენობით საჩივრებია დაწერილი. 

თბილისის მერია 2018 წლის 10 აპრილიდან სითი პარკთან კონტრაქტს წყვეტს. ამის შესახებ კალაძემ ბრიფინგზე განაცხადა.  სითი პარკთან ხელშეკრულების გაწყვეტის გამო მერია პირგასამტეხლოს არ გადაიხდის. 

კომპანია "სითი პარკმა" განაცხადა, რომ თბილისის მერიის გადაწყვეტილება პოლიტიკურად მოტივირებულია. კომპანიაში აცხადებენ, რომ ისინი თავიანთ უფლებებს სამართლებრივი გზით დაიცავენ. 

კომპანია "სითი პარკსა" და თბილისის მერიას შორის ხელშეკრულება 2007 წელს გაფორმდა და ის ძალაში 2024 წლის 31 დეკემბრამდე უნდა ყოფილიყო.